Академическэ музыкэм ия V-рэ Дунэе фестивалэу «Музыкальнэ Адыгеир» тиреспубликэ щыкIуагъ. Туркменистан икомпозиторхэм я Союз илъэс 85-рэ зэрэхъурэм ар фэгъэхьыгъ.

Адыгеимрэ Туркменистанрэ язэкъошныгъэ-зэдэлэжьэныгъэ къыпкъырыкIызэ, АР-м культу­рэмкIэ и Министерствэ Iоф­тхьабзэм кIэщакIо фэ­хъугъ. Адыгеим икъэралыгъо программэу «Культурэм ихэ­хъоныгъ» зыфиIорэм ар къыдыхэлъытагъ.
Къэралыгъо филармонием щызэхащэгъэ пчыхьэзэхахьэм КъумпIыл Мурат, Правительст­вэм ацIэкIэ къыщыгущыIагъ АР-м культурэмкIэ иминистрэу Аулъэ Юрэ. Дунэе фестивалым лъэпкъхэр зэрэзэфищэхэрэр, музыкальнэ искусствэм хэхъоныгъэ ышIыным фестивалыр зэрэфэIорышIэрэр ащ хигъэунэфыкIыгъэх.
— АР-м и ЛIышъхьэрэ министрэхэм я Кабинетрэ тиIэпы­Iугъухэу академическэ мэ­къа­мэм икъызэтегъэнэнрэ ихэ­гъэ­хъонрэ тадэлажьэ. Академическэ мэкъамэхэм яфестиваль гухахъо хэжъугъотэнэу сышъу­фэлъаIо, — къыхигъэщыгъ ми­нистрэм.
«Музыкальнэ Адыгеир» зыфиIорэ Дунэе фестивалым Туркменистан, Татарстан ыкIи Адыгеим якомпозиторхэр хэлэжьагъэх. Нэхэе Аслъан, Жэ­нэлI Светланэ, КIыргъ Юрэ, Рэ­щыд Калимуллиным, Анзэ­рэкъо Чеслав, Къабэрдэкъо Мурат, Алсу Абдулинам, Виталий Харисовым, Ровшан Непесовым, фэшъхьафхэм япроизведениехэр щыIугъэх. Зэлъа­шIэрэ музыкантхэм яIэпэIэсэныгъэ къагъэлъэгъуагъ.
А пстэумэ адырагъэштагъ АР-м исимфоническэ оркестрэ ихудожественнэ пащэу ыкIи идирижер шъхьаIэу СтIашъу Къэплъан, АР-м инароднэ артистэу, дирижерэу Аркадий Хус­нияровым.
— Алсу Абдулинам ытхыгъэ академическэ мэкъамэу «Танец scerco» ыкIи Виталий Харисовым ипроизведениеу «Вариации и танец» зыфиIохэрэмрэ апэрэу симфоническэ оркестрэм къыригъэIуагъэх. Р. Калимуллиным исимфоническэ поэмэу «Ас­лъан» цIэу зыфишIыгъэр лъэпкъым икомпозитор цIэрыIоу, УФ-м инароднэ артистэу, ансамблэу «Ислъамыем» ихудожественнэ пащэщтыгъэу Нэхэе Аслъан фитхыгъэри тигуапэу цIыфхэм зэхядгъэхыгъ, — къы­Iуагъ Къ. СтIашъум.

НэкIубгъор зыгъэхьазырыгъэр Лъэпшъыкъо Фатим.