Хьисап олимпиадэу «Ассара» зыфиIоу Урысыем и Къыблэ ипшъэшъэжъыехэм азыфагу щызэхащагъэр Мыекъуапэ щыкIуагъ. ПстэумкIи шъолъыр 21-мэ къарыкIыгъэ кIэлэеджэкIо нэбгырэ 60 ащ хэлэжьагъ.

Аныбжь елъытыгъэу ахэр купитIоу гощыгъагъэх: я 8-рэ ыкIи я 9 — 10-рэ классхэм арысхэр. КупитIумкIи хагъэ­унэфыкIырэ чIыпIэхэр агощыгъэх. Адыгеир нэбгырипшIымэ къагъэлъэгъуагъ, зэкIэри республикэ естественнэ-хьисап еджапIэм икIэлэеджакIох.
Зэнэкъокъум къекIокIыгъуитIу къыды­хэлъытэгъагъ, ары пэпчъ гъэцэкIэн плIырыплI иIагъ. НахьыкIэхэм сыхьати 3,5-рэ аратыгъ, нахьыжъхэм — 4.
— Зэнэкъокъур олимпиадэ шъуашэм илъыгъ. ГъэцэкIэн псынкIэхэри нахь къиныIохэри хэтыгъэх. Ежь пшъэшъэжъы­ехэми яшIэныгъэхэр зэфэдагъэхэп. Урысые зэнэкъокъухэм ахэлэжьагъэхэри, ар зыщыщыр зымышIэхэрэри ахэтыгъэх. Арышъ, зэкIэми ашIогъэшIэгъо­ныным тыдэлэжьагъ. — къыхегъэщы Урысыем хьисапымкIэ ихэшыпыкIыгъэ куп итренерэу Кирилл Суховым.
Зэфэхьысыжьхэм къызэрагъэлъэгъуа­гъэмкIэ, анахьыкIэхэмкIэ апэрэ чIыпIэр къахьыгъ Мамый Яра (Адыгеир), Мария Воронцовам (Тюмень хэку), Ксения Скориковам (Ростов хэку). НахьыжъхэмкIэ нэбгыритфымэ апэрэ чIыпIэр афагъэшъошагъ: Ульяна Кучинам (Киров хэку), Латифа Тимерхановам (Респуб­ликэу Татарстан), Агата Бородинам (Курган хэку), Ульяна Семенищевам (Киров хэку), Эмилия Левковскаям (ФТ Сириус), Мария Бабушкинам (Московскэ хэку).

Адыгеим ипшъэшъэжъые нэбгырип­шIымэ ащыщэу 6-мэ хагъэунэфыкIырэ чIыпIэхэр къыдахыгъэх.
Олимпиадэм икIэщакIохэр Адыгэ къэралыгъо университетым и Кавказ хьисап Гупчэ, республикэ естественнэ-хьисап еджапIэр ыкIи «Полярис-Адыгеяр». Пшъэрылъ шъхьаIэр пшъэ­шъэжъыехэр хьисапым фэщэгъэнхэр ыкIи Урысыем и Къыблэ икIэлэеджакIохэу хьисапым пылъхэм азыфагу зэныбджэгъуныгъэ илъыныр ары.