Тульскэ станичнэ къэзэкъ обществэм хэтхэр, яатаманэу Андрей Бондаревыр, гуетыныгъэ зиIэ IэпэIасэхэр зэгъусэхэу цIыф зэрымыс быбырэ аппаратхэр, дронхэр аугъоих. Непэ дзэ зэпэуцужьыр зыщыкIорэ чIыпIэм ащ фэдэ Iэшэ лъэпкъыр лъэшэу ящыкIагъ.

Дронхэр аугъоиныр агу къызэрэкIыгъэр къедгъэIотагъ зэхэгъэуцокIо-къыдэгъэкIэкIо компанием ипащэхэм ащыщэу Роман Миниевым.
— ХэушъхьафыкIыгъэ дзэ операциер амыублэзэ пкъыгъомэ яугъоин ед­гъэжьагъ… Лъакъохэр зыкIэт тачанкэр тшIыгъэ, нэужым ащ турель (пулеметыр е автоматыр зытырагъэпытыхьэрэ пкъыгъор – ред.) тед­гъэуцуагъ, охътабэ темышIэу дзэ операциер къызежьэм, цIыф зэрымыс быбырэ аппаратхэм яшIын тыфежьагъ. Iофэу тшIэрэм къыдез­гъаштэхэрэр къытфэ­кIох, япсауныгъэкIэ фронтым кIожьын зымылъэкIыщт къэзэкъхэр къыддеIэх. Амалэу тиIэм елъытыгъэу тидзэкIолI­хэм IэпыIэгъу тызэра­фэхъущтым тыпылъ, техническэ пкъыкъохэу ахэр къызкIэлъэIухэрэр тэгъэпсых ыкIи подразделениехэм афэтэщэх, зэрэбгъэфедэщтхэр ятэгъэлъэгъу.
КъэугупшысэкIо, зэхэгъэуцо­кIо, ушэтэкIо ыкIи программист нэбгырэ 20 фэдиз быбырэ ап­паратхэм, ахэм ахэт системэхэм, видеоинформациер ухъу­мэгъэным дэлажьэх. Мы Iэпэ­Iасэхэм ашIыгъэ быбырэ пкъыгъо 10000-м ехъу «кIэпсэжъыем» зэпырарагъэщыгъ. Дзэ­кIолIхэм ялъэIу елъытыгъэу зы мафэм пкъыгъо 50-м къыщегъэ­жьагъэу 100-м нэс аугъои.
Джащ фэдэу хэушъхьафыкIыгъэ дзэ операциер зырагъа­жьэм, БАРС-м иухьазырын мы компаниер пылъыгъ, джыри а IофшIэныр лъегъэкIуатэ ыкIи БПЛП-хэм Iоф зэрадэпшIэщтыр ныбжьыкIэхэм арагъашIэ.
Мыекъопэ район къэзэкъ обществэм иатаманэу, подъесаулэу Андрей Мамонтовым иунашъокIэ ащ ипшъэрылъхэр зыгъэцэкIэрэ Александр Даниловым зэхэгъэуцокIо-къыдэгъэ­кIэкIо компаниер зыгъэпсыгъэ­хэм медалэу «Урысыем ипатриот» зыфиIорэр аритыжьыгъ.
Агу рихьырэ IофшIэным емызэщхэу зэрэпылъхэм, текIоныгъэр къэблэгъэным иIоф зэрэфэшъыпкъэхэм афэшI IэпэIасэхэм «тхьашъуегъэпсэу» ятэIо!
Екатерина Даниловар.
Адыгеим икъэзэкъ ныбжьыкIэхэм я Союз итхьамат.
Сурэтыр: район къэзэкъ обществэр.