БзэджэшIагъэ зезыхьагъэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу Адыгэ Республикэм щыIэм иучреждениеу N 1-м быслъымэнэу чIэсхэм апае тхьэлъэIупIэ къызэIуахыгъ.

Ащ изэтегъэпсыхьан епхыгъэ IофшIэнхэм ахэлэжьагъэх учреждением щагъэпщынэхэрэ быслъымэнхэм ямызакъоу, чыристан диныр зылэжьыхэрэри.
ТхьэлъэIупIэм икъызэIухын хэлэжьагъэх Адыгеим ыкIи Пшызэ шъолъыр ащыпсэурэ быслъымэнхэм я ДиндэлэжьапIэ илIыкIохэу Мысс Асфар, ХъокIо Заурбый, ЖэнэлI Азнавур, чыристан динлэжьэу Дионисий Жильцовыр, бзэджэшIагъэ зезыхьагъэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу Краснодар краим щыIэм ипащэ игуадзэу Василий Плиска, нэмыкIхэри.
— БыслъымэнхэмкIэ мыр хъугъэ-шIэгъэ гушIуагъу. БзэджэшIагъэ зезыхьагъэу хьапсым пшъэдэкIыжь щызыхьыхэрэр гъогу занкIэ тегъэхьажьыгъэнхэмкIэ тхьэлъэIупIэр игъо шъыпкъэу щыт. Мыщ Тхьэм щелъэIух лъэпкъ зэфэшъхьафхэм ялIыкIохэр, — къы­Iуагъ Мысс Асфар.
УнакIэу ашIыгъэр гуIэтыпIэу щыт, пшъэдэкIыжь зыхьырэ пэпчъ Тхьэм зыфигъэзэн, елъэIун ылъэкIыщт, ищыIэныгъэ икIэрыкIэу ригъэгупшысэжьыным фэIорышIэ. Мыщ арапыбзэкIэ, урысыбзэкIэ ыкIи адыгабзэкIэ зэдзэкIыгъэ КъурIанхэр чIэлъых.
— Тхьэм тызэрелъэIурэр бзэ зэфэшъхьаф нахь мышIэми, а зы Тхьэр ары зэкIэми зызфэдгъазэрэр. Быслъымэнхэм къафызэIуахыгъэ тхьэлъэIупIэр краимкIэ щысэтехыпIэ хъунэу сэгугъэ, — къыIуагъ В. Плиска.
Апэрэу азаным къеджагъ Iимамэу ЖэнэлI Азнавур, апэрэ нэмазыр ригъэкIокIыгъ Iимамэу ХъокIо Заурбый.
БзэджэшIагъэ зезыхьагъэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу АР-м щыIэм ипресс-къулыкъу къызэрэщаIуагъэмкIэ, зыщагъэпщынэхэрэ учреждениеу ИК-1-м хэтэу илъэсыбэ хъугъэу чылысым Iоф ешIэ, ИК-2-м чылысымрэ мэщытымрэ хэтых.
КIАРЭ Фатим.