АР-м ибзылъфыгъэхэм я Союз зэхищэгъэ форумэу «Расцветай» зыфиIорэм иапэрэ мафэ къекIолIэгъэ хьакIэхэр Лъэпкъ музеим ихьакIэщ рагъэблэгъагъэх. Егъэджэн сервисым ипащэу, бзылъфыгъэхэм я Союз хэт Къохъужъ Саидэ зэхищэгъэ Iофтхьабзэу «Хэбзэ дахэу тэ тиIэр джащ фэд» зыфиIорэм ахэр хэлэжьагъэх.

Абхъазым, Къэрэщэе-Черкесым, Къэ­бэртэе-Бэлъкъарым, Калининград, Ростов, Краснодар краим ыкIи нэмыкIхэм бзылъфыгъэ хьакIэхэр къарыкIыгъэх.
Бзылъфыгъэм ищыIэныгъэ зэхъокIыныгъэшхохэр фэхъугъэх. ЩыIэныгъэм ащ чIыпIэу щиубытырэм зыкъиIэтыгъ, сыд фэдэрэ зэхъокIыныгъи дырегъаштэ, мыхъуным пэуцужьы, уахътэм дэлъэбакъо.
Iофтхьабзэм изэхэщакIоу Къохъужъ Саидэ адыгэ бзылъфыгъэм ищыIэныгъэ гъогу къытегущыIагъ щысэхэмкIэ къыушыхьатыжьызэ.
Адыгэ пIукIэ-гъэсакIэм инэшэнэ шъхьа­Iэр сабыим, анахьэу пшъэшъэжъы­ем, уемыгуаоу дахэу, гукIэгъу пхэлъэу удэзекIон зэрэфаер, щэIагъэ дызепхьэзэ гъогу тэрэз тепщэнэу зэрэщытыр хьакIэ­мэ къафаIотагъ.
Ащ къыкIэлъыкIоу атегущыIагъэх пшъэ­шъэ ныбжьыкIэм ишэн-хабзэхэм. Псэогъу фаеу ежьэрэр екIолIэн ылъэкIынэу пшъэ­шъэ унэ, пшъэшъэ лэгъунэ адыгэ унагъо пэпчъ зэриIагъэр. Пшъэшъэ унэм псэлъыхъокIэ хабзэу щырекIокIыщтыгъэр. Псэлъыхъохэр щэсыфэхэ пшъашъэм дитынэу пшъэшъэжъые Iэтахъо, ышыпхъу­ми игъунэгъуми, унэм рагъахьэщтыгъ. Iэужыр, пIэлъэ зэтыжьыныр зыфэдагъэр къекIолIагъэхэм къафаIотагъ.
Нысэщэ хабзэхэм, пшъэшъэ гъэтэ­джыпкIэм, пшъашъэр унэгъуакIэм зыхахьэкIэ, тыщ унашъор къызэринэкынышъ, зэрыхьэгъэ унагъом иунашъо зэрэтехьэрэми тегущыIагъэх. Гуащэм нысэр ышъхьэ дигъасэщтыгъ, ащ сабыеу къыкIахъорэр дипIути, цIыкIу-цIыкIоу унэгъо зехьаныр ритыжьыщтыгъ.

Бысымгуащэм хэбзэ дахэу тиIэр зэрэзэрихьэрэр, хьакIэпэгъокIыным къешIэкIыгъэ хабзэм къыщыублагъэу унэгъо зэгъэ­зэфэным нэсыжьэу ащ зэрэфэгъэзагъэр кIагъэтхъыгъ.
«Бзылъфыгъэм зэкIоцIимыпхэгъэлI шыбг итIысхьэрэп» адыгэхэм зэраIорэм гупшысэ куу хэлъ. Исабыигъом бзылъфы­гъэм ыкокI ар зэрэщагъэшIорэ закъор арэп — хъулъфыгъэр зыгъэпэрытэу, зыгъэинырэр, сабыйхэр лIыгъэм фэзыпIухэрэр, лIыгъэм къыфэзыгъэущыхэрэр бзылъфыгъэр ары. ЩыIэныгъэм щызэокIрэ пстэури зэригъэкIоу, гъашIэм лъапсэ фэхъурэр бзылъфыгъэр арэу зэрыщытыр къекIолIагъэхэм къыхагъэщыгъ. Бзылъфыгъэ лIэужищым ищысэкIэ хэбзэ дахэу тиIэр къагъэлъэгъуагъ.
Iофтхьабзэм икIэухым АР-м ибзылъфы­гъэхэм я Союз ипащэу Вэрэкъо Хьалимэт хьакIэхэм закъыфигъэзагъ.
— Лъэныкъо зэфэшъхьафхэмкIэ сэнаущыгъэ зыхэлъ бзылъфыгъэу хэгъэ­гум исхэр нэIуасэ зэфэтшIынхэр, щыIэныгъэм епхыгъэ шIэныгъэу тIэкIэлъымкIэ тызэхъожьынхэр ары пшъэрылъ шъхьаIэу зыфэдгъэуцужьыгъэр. Лъэп­къэу тызщыщхэм, тыныбжь, тызыфэгъэзэгъэ Iофхэм ямылъытыгъэу, бзылъфыгъэхэм тищыIэкIэ-псэукIэ нахьышIу шIыгъэным, гъэхъагъэхэр тшIынхэм, тиунагъохэм зэгурыIоныгъэ арылъыным, насыпышIоу тыпсэуным тыфэлажьэ. Адыгэ бзылъфыгъэм шэн-хэбзэ дахэу хэлъхэр тиныбжьыкIэхэм аIэкIэгъэхьэгъэныр ти­пшъэ­рылъ. ЛIэужыкIэм пIуныгъэ тэрэз­ егъэгъотыгъэнымкIэ бзылъфыгъэм мэхьанэу иIэр непэ къидгъэлъэгъукIыгъ. ТихьэкIэ лъапIэхэм адыгэ бзылъфыгъэр зыфэдэм нэIуасэ шъуфэтшIыгъ. Адыгэмэ хэбзэ дахэу тиIэхэр къышъодгъэлъэ­-гъугъ. Тхьашъуегъэпсэу шъукъызэрэкIуа­гъэм пае, — къыIуагъ Вэрэкъо Хьалимэт.
— Адыгэ бзылъфыгъэм щытхъоу пы­лъыр дунаим щызэлъашIэ. Ащ лъэпкъ зэхэтыкIэ-хабзэхэр зэрэзэрихьэхэрэр, ищысэкIэ ныбжьыкIэхэр ппIунхэ зэрэплъэкIыщтыр непэ нэрылъэгъу тфэхъугъ. Абхъазым сыкъикIи Адыгеим сыкъызэрэкIуагъэм сыщэгушIукIы. Адыгеир тэгъэлъапIэ, илIыхъужъэу тимамырныгъэ фэбэнагъэхэм шъхьащэ афэтэшIы. Мыщ фэдэ Iофтхьабзэ сызэрэхэлажьэрэм гушхуагъэ къысхелъхьэ, — къыIуагъ Абхъазым и Общественнэ палатэ исекретарэу, ныхэм якомитет ипащэу Гульнара Кичба.
Зэхахьэм игъэхьазырын дэлэжьагъэх филологие шIэныгъэхэмкIэ докторэу, профессорэу Унэрэкъо Рае, бзылъфыгъэхэм я Союз хэтхэр, ансамбэу «Зэрдахэр», нэмыкIхэр.
Iофтхьабзэм икIэухым адыгэ шхынхэр зытет Iэнэ шыгъэм хьакIэхэр рагъэб­лэгъагъэх. Адыгэ джэгукIэ зэхахьэр аухыгъ.