Адыгеим и Мыекъопэ район хэхьэрэ къушъхьэлъэ псэ­упIэу Гъозэрыплъэ ифельдшер-мамыку IэзапIэрэ цIыф псэупIэхэмрэ гъэстыныпхъэ шхъуантIэр ящэлIэ­гъэным фэгъэхьыгъэ Iофтхьабзэу АР-м и ЛIышъхьэу КъумпIыл Мурат зыхэлэжьагъэр тыгъуасэ щыIагъ.

Джащ фэдэу мы Iофтхьабзэм хэлэжьагъэх федеральнэ инспектор шъхьа­Iэу Сергей Дрокиныр, Iахьзэхэлъ обществэу «Газпром газораспределение Майкоп» зыфиIорэм ипащэу ЕкъутэкI Аслъан, муниципальнэ образованиеу «Мыекъопэ районым» иадминистрацие ипащэу Михаил Марьиныр.
ПсэупIэу Гъозэрыплъэ къалэу Мыекъуа­пэ километрэ 76-кIэ пэIудзыгъэу Адыгеим икъушъхьэлъэ лъэныкъо щыI. ЦIыфхэм ящыIэкIэ амалхэр нахьышIу хъунхэм, зекIоным зиушъомбгъуным, ящыкIэгъэ инфраструктурэр, мыщ хэхьэ газыр аIэкIэгъэхьэгъэнри, афэшIыгъэным тегъэ­псыхьэгъэ амалхэр щарагъэгъотых.
АР-м и ЛIышъхьэ къызэрэхигъэщыгъэм­кIэ, зекIоным зегъэушъомбгъугъэнымкIэ ыкIи газыр икъоу аIэкIэгъэхьэгъэнымкIэ программэхэм республикэр зэрахэла­жьэрэм ишIуагъэкIэ псэупIэм газыр ращэлIэн алъэкIыгъ. Нафэу зэрэщытымкIэ, Урысые политическэ партиеу «Единэ Россиер» кIэщакIо зэрэфэхъугъэм тетэу ыкIи УФ-м и Президентэу Владимир Путиным ащ зэрадыригъэштагъэм яшIуа­гъэкIэ а Iофтхьабзэр зэшIуахын алъэ­кIыгъ.

«Мыекъопэ районыр зызэхащагъэр илъэси 100 зэрэхъурэмкIэ шIухьафтын дэгъоу щыт непэрэ хъугъэ-шIагъэр. Къо­джэ псэупIэм ищыкIэгъэ амалхэр егъэгъотыгъэнхэмкIэ, джырэ уахътэм диштэрэ инфраструктурэр гъэпсыгъэнымкIэ, зекIоным хэхъоныгъэ егъэшIыгъэнымкIэ зэкIэхэми Iофтхьэбзэ гъэнэфагъэхэу зэшIотхыгъэхэм ар къакIэкIуагъ», — къы­хигъэщыгъ КъумпIыл Мурат.
Шъугу къэтэгъэкIыжьы: Гъозэрыплъэ екIолIэрэ газрыкIуапIэр зекIонымкIэ инфраструктурэм хэхъоныгъэ егъэшIыгъэным икъэралыгъо программэ къыдыхэ­лъытагъэу 2020-рэ илъэсым агъэпсы­гъагъ. ПстэумкIи ащ километрэ 90-рэ икIы­хьагъ, псэупIэм екIурэ газрыкIуапIэр зэрэхъурэр километри 2, псэупIэ кIоцIым щыпхыращыгъэр зэрэхъурэр километри 3,1-рэ. Социальнэ газификацием ипрограммэ къыдыхэлъытагъэу ар ашIыгъ. Тыгъуасэ газрыкIуапIэм Iоф ышIэу ригъэжьагъ.
Пстэуми апэу гъэстыныпхъэ шхъуантIэр зэращэлIагъэр псэупIэу Гъозэрыплъэ дэт фельдшер-мамыку IэзапIэр ары. 1960-рэ илъэсым къыщыублагъэу ащ Iоф ешIэ, 2018-рэ илъэсым къыщегъэжьагъэу унакIэу зычIэхьажьыгъагъэхэр электричествэкIэ непэ нэс агъэфабэщтыгъэ. Iахьзэхэлъ обществэу «Газпром газораспределение Майкоп» зыфиIорэм а IэзапIэм техникэ амалхэу щыIэхэр иIэ хъун­хэм пае чIычIэгъымкIэ метрэ 15 хъурэ газрыкIуапIэр ышIыгъ, чIышъхьашъомкIэ метрэ 37-рэ ыгъэпсыгъ. Мы псэуалъэм хэт газ Iэмэ-псымэм тыгъуасэ къыщегъэ­жьагъэу Iоф ышIэу ригъэжьагъ.
Фельдшер-мамыку IэзапIэм ипащэу Валентина Сланко къыIуагъ проектым ипхырыщынкIэ республикэм ипащэхэмрэ газым епхыгъэ къулыкъумрэ Iофэу зэ­шIуа­хыгъэм пае зэрафэразэр. Ащ ишIуа­гъэкIэ медицинэ IэпыIэгъур нахь дэгъоу ыкIи нахь игъэкIотыгъэу цIыфхэм аратын алъэкIыщт. Джащ фэдэу ащ къыхигъэщыгъ псэупIэм дэсхэм анэмыкIэу зекIо нэбгырабэхэми яфэIо-фашIэхэр зэшIуа­хынхэ зэралъэкIыщтыр.
Адыгеим и ЛIышъхьэ къыкIигъэтхъыгъ Iахьзэхэлъ обществэу «Газпром газораспределение Майкоп» зыфиIорэм шIуагъэ къытэу зэрэдэлэжьагъэхэр ыкIи Мыекъо­пэ районым иинфраструктурэ ихэхъоныгъэкIэ тапэкIи Iофэу зэшIуахыщтым мэ­хьанэшхо зэриIэр къыIуагъ. Къушъхьэ­лъэ зыгъэпсэфыпIэу «Лэгъонакъэ» игъэ­псынкIи, шъолъырым зекIоу къихьэрэр нахьыбэ шIыгъэнымкIи а пстэуми яшIуа­гъэ къэкIощт.
«Газыр щыIэмэ, чIыпIэм хэхъоныгъэ ышIынымкIэ, зекIоным нахь зиушъомбгъунымкIэ амалыкIэхэри щыIэ хъущтых. Ащ ишIуагъэкIэ псэупIэм дэсхэм ящыIакIи нахь зэтегъэпсыхьагъэ, нахь Iэрыфэгъу хъущт, зекIохэми джырэ уахътэм диштэу яфэIо-фашIэхэр нахьышIоу афызэшIуа­хыщтых», — къыхигъэщыгъ АР-м и ЛIышъхьэ.
Iахьзэхэлъ обществэу «Газпром газораспределение Майкоп» зыфиIорэм къызэритыгъэмкIэ, 2024-рэ илъэсым зекIоным епхыгъэ гъогухэм къахиубытэрэ цIыф псэупIэхэм газрыкIуапIэхэр ащагъэ­псыгъэх. Ахэр: псэупIэхэу Дахъор, Новосвободнэр, Усть-Сахрай. Джы псэупIэхэу ХъымыщкIэй, Севастольскэм, Новопрохладнэм, Меркулаевкэм гъэстыныпхъэ шхъуантIэр ящэлIэгъэнымкIэ техническэ амалхэр къэзытырэ газрыкIуа­пIэхэр агъэтIылъых. Мы илъэсым ыкIэм ехъулIэу IофшIэнхэр аухын мурад яI.

Социальнэ газификацием ипрограммэ къыдыхэлъытагъэу уни 107-мэ ыкIи социальнэ мэхьанэ зиIэ псэолъэ 12-мэ газыр аIэкIэгъэхьэгъэнымкIэ техническэ амалхэр щыIэ хъугъэх. Унэгъуи 10-мэ ыкIи коммунальнэ фэIо-фашIэхэм япхыгъэ псэолъи 4-мэ гъэстыныпхъэ шхъуан­тIэр аIэкIэгъэхьэгъэным епхыгъэ IофшIэнхэр тыгъуасэ рагъэжьагъэх.
А Iофтхьабзэхэм ауж пенсионеркэу Канавина Валентина Алексей ыпхъум иунагъо КъумпIыл Мурат еблэгъагъ. Апэрэхэм ащыщэу ащ иунэ газыр ращэ­лIагъ. Газ Iэмэ-псымэхэр унэм итых, ищыкIэгъэ зэзэгъыныгъэхэр зэкIэ хьазырых. Бзылъфыгъэм къыIотагъ Гъозэрыплъэ къызэрэщыхъугъэр, бэшIагъэу ащ зэрэщыпсэурэр ыкIи мы хъугъэ-шIэгъэ гушIуагъом зэрежэщтыгъэр. Валентина Канавинам къыIуагъ иунэ гъэстыныпхъэ шхъуантIэр ращэлIэнымкIэ КъумпIыл Мурати, газ къулыкъум илIыкIохэми ашIыгъэмкIэ зэрафэразэр.
Адыгеим и ЛIышъхьэ къыхигъэщыгъ газрыкIуапIэм ишIынкIэ пшъэдэкIыжьэу республикэм ыхьырэр ухыгъэ зэрэмыхъу­рэр. Джы цIыфхэм газыр яунэхэм арыщэгъэн фае, къэралыгъори а Iофыгъом изэшIохынкIэ къадеIэ. Партиеу «Единэ Россиер» кIэщакIо зэрэфэхъугъэм тетэу газрыкIуапIэхэр ыпкIэ хэмылъэу чIыгу Iахьхэм ягъунапкъэхэм къанэсэу ашIыгъ. ЦIыф куп гъэнэфагъэхэми социальнэ IэпыIэгъоу а лъэныкъомкIэ сомэ мини 100 зырыз аIэкIагъэхьанэу рахъухьагъ. 2022 – 2024-рэ илъэсхэм республикэм щыщ нэбгырэ 1060-мэ ащ фэдэ IэпыIэгъур аратыгъ, ахэм ащыщэу унэгъуи 160-р хэушъхьафыкIыгъэ дзэ операцием хэлажьэхэрэм яунагъох.

«Хэгъэгум и Президент, и Правительствэ, партиеу «Единэ Россием» инэу тафэраз социальнэ газификацием ипрограммэ республикэм гъэцэкIагъэ щыхъу­ным пае яшIуагъэ къызэрагъакIорэм, Адыгеим игазификациекIэ IофшIэнэу агъэцакIэрэмкIэ къызэрадеIэхэрэм апае. Тэ Урысыем энергетикэмкIэ и Министерствэ, Газпромым чанэу тадэлажьэ газ инфраструктурэр икъоу гъэпсыгъэным иIофыгъохэм язэшIохынкIэ. Ащ фэдэ зэдэлэжьэныгъэ-зэгурыIоныгъэм ишIуагъэкIэ республикэм гъэстыныпхъэ шхъуан­тIэр IэкIэгъэхьэгъэным епхыгъэ Iофтхьабзэхэр зэрэщыкIохэрэмкIэ хэгъэгум анахь чIыпIэ дэгъу щызыубытыгъэхэм ащыщ хъугъэ ыкIи процент 96,18-м нэсэу газыр аIэкIахьэ. Республикэм исоциальнэ-экономикэ хэхъоныгъи ащ ифэмэ-бжьымэшIу къытырехьэ», — къыхигъэщыгъ АР-м и ЛIышъхьэ.
2021-рэ илъэсым, социальнэ газификацием ипрограммэ ублагъэ зыщыхъугъэм, къыщегъэжьагъэу лъэIу тхылъ мин 13,4-рэ фэдиз республикэм къыщатыгъ. Мы лъэхъаным хэпIэ мин 13-м фэдизмэ гъэстыныпхъэ шхъуантIэр аIэкIэхьанымкIэ техническэ амал яIэ хъугъэ, хэпIэ мини 4-м ехъур газрыкIуапIэхэм апышIагъэ хъугъэх. Джащ фэдэу Адыгеим исоциальнэ газификацие ипрограммэ къыдыхэлъытагъэу социальнэ псэолъэ 18-мэ газрыкIуапIэхэр мы лъэхъаным ящэлIагъэ хъугъэх, ахэм ащыщэу фельдшер-ма­мыку IэзэпIи 6-мэ ыкIи зы еджапIэм гъэстынып­хъэ шхъуантIэр аIэкIагъэхьэгъах. IофшIэнхэр зэкIэ ипIалъэм гъэцэкIагъэ мэхъух, социальнэ газификацием епхыгъэ республикэ программэм тетэу ахэр зэшIуахых. Газыр икъоу алъыгъэIэсыгъэным ипрограммэ къыдилъытэрэ лъэныкъохэмкIэ Урысые Федерацием ишъолъырхэр пштэхэмэ, Адыгэ Республикэм я 13-рэ чIыпIэр еубыты.
АР-м и ЛIышъхьэ ипресс-къулыкъу къытыгъэ къэбархэмкIэ
Тхьаркъохъо Сафыет.