1987-рэ илъэсым къыщегъэжьагъэу мы мафэр Урысыем щыхагъэунэфыкIы, ау мыр мэфэкIэп, зипсауныгъэ амал зэщыкъуагъэхэр къызэрэтхэтхэм обществэм ынаIэ тыридзэным, IэпыIэгъу афэхъуным фытегъэпсыхьагъ. Бэщ фыжьыр — зымылъэгъухэрэм ятамыгъэ къодыеп, мыр яIэмэ-псым, анэхэм ачIыпI.

Псауныгъэр къэухъумэгъэнымкIэ Дунэе организацием къызэритырэмкIэ, хьафизэ нэбгырэ миллион 39-рэ фэдиз ыкIи дэеу зылъэгъурэ миллион 246-рэ дунаим щэпсэух, республикэм — нэбгырэ 938-рэ фэдиз. Хьафизэхэм я Урысые обществэ ичIыпIэ организациеу Мыекъуапэ дэтым итхьаматэу Алексей Хлоповым къызэриIуагъэмкIэ, республикэм икъэлэ шъхьаIэкIэ зымылъэгъурэ нэбгырэ 356-рэ яучет хэт.
— Илъэс къэс, хабзэ зэрэхъугъэу, чъэпыогъум и 15-м къыщегъэжьагъэу шэкIогъум и 15-м нэс хьафизэхэр зыхэлэжьэрэ Iофтхьабзэхэр рагъэкIокIых. Ахэм япшъэрылъ шъхьаIэр дунэе нэфым идэхагъэ зымылъэгъухэрэм ягумэкIыгъо­хэм общественностым ынаIэ атыридзэныр ыкIи ящыкIэгъэ IэпыIэгъур арагъэгъотыныр ары. Къыхэзгъэщымэ сшIоигъу, АР-м и ЛIышъхьэу КъумпIыл Мурат хьафизэхэм ыкIи дэеу зылъэгъухэрэм яфэIо-фашIэхэр, ягумэкIыгъохэр зэшIохыгъэнхэмкIэ лъэшэу ынаIэ къызэрэттетыр, IэпыIэгъу къызэрэтфэхъурэр. Джащ фэдэу республикэм ихэбзэ органхэм якъулыкъушIэхэр къыткъотхэу ятхьылIэрэ лъэIур зэкIэ къытфагъэцакIэ. Мы мафэм ипэгъокIэу Мыекъопэ къэлэ администрацием имылъкукIэ нахьыбэрэ агъэфедэрэ гъомылапхъэхэр зэрылъ Iалъмэкъхэр къэлэ учетым хэт нэбгырэ пэпчъ фагъэ­хьазырыгъ. Адыгеим и ЛIышъхьэу Къум­пIыл Мурат иунашъокIэ IофшIэнымкIэ ыкIи социальнэ хэхъоныгъэмкIэ Министерствэм сомэ мини 100 къытфитIупщыгъ. Ащ «федеральнэ перечень» зыфаIорэм хахьэу ыпкIэ хэмылъэу къаратыхэрэм анэмыкIхэр къырытщэфы- щтых: къэгущыIэрэ сыхьатым термометрэ хэтэу ыкIи сэкъатныгъэ зиIэхэу зипсауныгъэ лъыплъэхэрэм апае джэхашъом тет щэчалъэхэр, — хигъэунэфыкIыгъ Алексей Хлоповым.

Бэщ фыжьым и Мафэ къыдыхэлъытагъэу мэзэ псаум зэIукIэгъухэр, лекциехэр, семинархэр, творческэ фестивальхэр, спорт зэнэкъокъухэр респуб­ликэм щырекIокIыщтых. Ахэм яшIуагъэкIэ сэкъатныгъэ зиIэхэр щыIэныгъэм хагъэ­гъуазэх, япсауныгъэ агъэпытэ.
АкIуачIэ аушэтыгъ
ЗэрамылъэгъурэмкIэ сэкъатныгъэ зиIэхэм щыIэныгъэм зыкъыхагъотэнымкIэ физическэ культурэр ыкIи нэмыкI спорт лъэпкъ зэфэшъхьафхэр амалышIоу агъэфедэх. Мы купым хэхьэрэ цIыфхэм кIуачIэр зыщагъэфедэрэ спортыр нахь якIас ыкIи ащ епхыгъэ зэнэкъокъухэм ахэлажьэх.
АР-м физическэ культурэмкIэ ыкIи спортымкIэ и Комитет адаптивнэ спортымкIэ бэмышIэу зэнэкъокъухэр ригъэ­кIокIыгъэх: пауэрлифтингыр, армспортыр, гырэ Iэтыныр.
КIэух зэфэхьысыжьхэм къызэрагъэлъэгъуагъэмкIэ, хьафизэхэм я Урысые обществэ ичIыпIэ организациеу Мыекъуа­пэ дэтым испортсменхэм хагъэунэфыкIырэ чIыпIэхэр къахьыгъэх. Шорэ Бис­лъан армспортымкIэ ятIонэрэ чIыпIэр къыдихыгъ, пауэрлифтингымкIэ ыкIи гырэ IэтынымкIэ ящэнэрэ хъугъэ. Даниил Уминскэм гырэ IэтынымкIэ ятIонэ­рэ чIыпIэр къыфагъэшъошагъ. Юрий Курочкиным пауэрлифтингымкIэ ятIонэрэ ыкIи Владислав Колесник армспортымкIэ ящэнэрэ чIыпIэхэр къахьыгъэх. Та­пэ­кIи гъэхъэгъэшIухэр ашIынхэу афэтэIо.
Iэшъынэ Сусан.
Сурэтхэр: хьафизэхэм яорганизаций.