НыбжьыкIэ дзэ-патриотическэ объединениеу «ЗыкIыныгъэр» кIэщакIо зыфэхъугъэ грант патриотическэ проектэу «ЛIыхъужъым исурэт» зыфиIорэм ипхырыщын Мыекъуапэ щырагъэжьагъ. Ащ иIэпыIэгъух фондэу «Хэгъум иухъумакIохэр» зыфиIорэм ишъолъыр къутамэрэ Адыгэ республикэ общественнэ организациеу «ХэушъхьафыкIыгъэ дзэ операцием иветеранхэм я Ассоциациерэ».

Iофтхьабзэм ипшъэрылъыр хэушъхьафыкIыгъэ дзэ операцием илIыхъужъхэр, иветеранхэр ныбжьыкIэхэм арагъэшIэнхэр, джащ фэдэу къыткIэхъухьэрэ лIэужхэр ахэм ящысэхэмкIэ я Хэгъэгу фэшъыпкъэхэу, тари­хъыр агъэлъапIэу пIугъэнхэр ары.
Патриотическэ проектым къыдыхэлъытагъэу апэрэ зэIукIэгъур Мыекъуапэ игурыт еджапIэу N2-м щызэхащагъ. Ащ хэлэжьагъэх дзэ операцием хэтхэм яшъхьэгъусэхэр, хэкIодагъэхэм янэхэр ыкIи ветеранхэр.
ЗэIукIэгъур пэублэ псалъэкIэ къызэIуихыгъ шъолъыр фондым ипащэ игуадзэу Джарымэ Еленэ. Проектым имэхьанэ, тидзэкIолI­хэм лIыхъужъныгъэу зэрахьэрэм ар кIэкIэу къатегущыIагъ.
ХэушъхьафыкIыгъэ дзэ операцием иветеранхэу Илья Донцовыр ыкIи Юрий Виятик Iоф­тхьабзэм къеблэгъагъэх. НыбжьыкIэхэм нахь агу рихьын къашIошIырэ лъэныкъохэр къырагъэубытыхэзэ, хэгъэгум итарихъ, «Урысыем и ЛIыхъужъ» щытхъуцIэ лъапIэр республикэм щыщхэу щымыIэжьхэу къызфагъэшъошагъэхэм якъэбархэр къаIотагъэх.
Нэужым ныбжьыкIэхэм упчIабэ къатыгъ, анахь ашIогъэшIэгъонэу кIалэхэм къыхагъэщыгъэ­хэм ащыщ хэушъхьафыкIыгъэ дзэ операциер къежьэнэу зыкIэхъугъэм къызэрэкIэупчIагъэ­хэр ыкIи ащ ежьхэр зыкIыхэлэжьагъэхэр.
— Хэгъэгу зэошхом илъэхъан тятэжъ пIашъэхэм лIыхъужъныгъэу зэрахьагъэр пстэуми тищысэтехыпI. ЛъэхъаныкIэу тызхэтым Урысыер пыим пэуцужьын фаеу зэхъум, ткIуачIэ зэхэлъэу Хэгъэгум тыкъоуцуагъ, мамырныгъэ щыIакIэ тикъэралыгъо илъыным тыфэбэнагъ. Сэ сшъхьэкIэ тIогъогогъо гуфакIоу дзэ операцием сыщыIагъ. Къы­хэзгъэщымэ сшIоигъу «кIэпсэжъыем» узызэпырыкIыкIэ, лъэпкъ зэхэдз щымыIэу тидзэ­кIолIхэр пытэу зэрэзэхэтхэр. ТекIоны­гъэр къызэрагъэблэгъэщтым зэкIэри фэбанэх, — къы­Iуагъ Илья Донцовым.
Джащ фэдэу ветераным къафиIотагъ фронтым имафэхэр зыфэдэхэр, чIыпIэ зэфэшъхьафэу зэрыфэщтыгъэхэр, щыIэкIэ-псэукIэу щыряIэр, нэмыкIхэри.
ЗикIалэ хэушъхьафыкIыгъэ дзэ операцием хэкIодагъэу, проектым ипхырыщын хэлэжьэрэ Наталья Штыковар мы гурыт еджапIэм щеджагъэхэу дзэ операцием хэлэжьагъэхэм, лIыгъэ зекIуакIэу зэрахьагъэхэм, нэ­мыкIхэми къатегущыIагъ.
— СикIэлэ нахьыжъ хэкIо­дагъ, нахьыкIэр мы уахътэм хэу­шъхьафыкIыгъэ дзэ операцием хэлажьэ. Проектэу пхырыт­щырэр анахьэу зыфэIорышIэрэр лIэшIэгъу пчъагъэхэм тихэгъэгу ыугъоигъэ баиныгъэр пыим зэхигъэтэкъон амал емытыгъэныр ары, — къыхигъэщыгъ Наталья Штыковам.
ЗэIукIэгъум икIэухым лIы­хъужъныгъэ зэрихьэзэ зыпсэ зыгъэ­тIылъыгъэ тидзэкIолIхэм такъикърэ афэшъыгъуагъэх.
Мы патриотическэ проектым къыдыхэлъытагъэу тичIыгогъу лIыхъужъхэу дзэ операцием хэ­кIо­дагъэхэм афэгъэхьыгъэ къэ­гъэ­лъэгъон экспозиции, 04 ашIыщт.
Iэшъынэ Сусан.
Сурэтыр: фондэу «Хэгъэгум иухъумакIохэр».