Урысые мэкъумэщ къыдэгъэкIы­жьын къэгъэлъэгъонэу «Дышъэ бжыхь» зыфиIорэр Москва щы­кIуагъ. Адыгеир ащ илъэс къэс хэлажьэ, мыгъэрэри хэз хъугъэп.

Республикэм къыщыдагъэкIырэ гъомылапхъэхэм язэмылIэужыгъуагъэ къэ­гъэлъэгъоным къекIолIагъэхэм зэрагъэ­шIэн алъэкIыгъ. Ахэр: адыгэ къуаер, гъэщхэкI зэфэшъхьафхэр, IэшIу-IушIухэр, пхъэшъхьэ-мышъхьэхэр, псыIэшIухэр, хэтэрыкIхэр, лыхэкIхэр, шъоур. Шъолъы­рым и ЛIышъхьэу КъумпIыл Мурат ителеграм-нэкIубгъо къызэрэщитыгъэмкIэ, республикэм игъэлъэгъуапIэ цIыфыбэ къызэрищэлIагъ. Анахьэу къызкIэуп­чIагъэхэр адыгэ ыкIи фэшъхьаф къое лъэпкъ­хэр ары. Хьа­кIэхэм ахэм яIэшIугъэ ауплъэкIугъ, къыдэзыгъэкIыхэрэм уп­чIэ­хэр афагъэзагъэх.
«Къэралыгъом и Президент пшъэ­ры­лъэу къытфи­гъэуцу­гъэр игъорыгъоу тэгъэ­цакIэ, тищыкIэгъэ гъо­мылапхъэ­хэр икъоу зэдгъотылIэжьынхэмкIэ хэхъоныгъэхэр тэшIых. «Адыгеим къыщыдагъэ­кIыгъ» зыфиIорэ цIэр зытедзэгъэ шхынхэм ядэгъугъэ къэд­гъэшъып­къэжьыным ыкIи щэфакIохэр нахьыбэу къыкIэупчIэнхэм Iоф адэтэшIэ, — къыщиIуагъ респуб­ликэ ЛIышъхьэм ихъытыу нэкIубгъо.

Шхын къабзэм (органическэм) илэ­жьынкIэ Адыгеим гъэлъэгъопIэ шъхьаф ыгъэпсыгъагъ. Мы лъэныкъомкIэ республикэм цIэ дахэ зыфишIыжьыгъ ыкIи органикэм ылъэныкъокIэ Iоф зышIэрэ шъолъырхэм ясатырэ хэт. Непэрэ мафэм ехъулIэу Адыгеим ихъызмэтшIэпIиплIырэ мэкъумэщ лэжьэпIитIумрэ Роскачествэм итхылъ яI. Ахэм яшхынхэри къэгъэлъэгъоным хэлэжьагъэх: шъоур, топинамбур гъэушъэбыгъэр, Iэзэгъу уц зэфэшъхьаф­хэр. Ахэм щымыщ ахэмылъэу, чIыгъэшIу ыкIи щэнаутхэр арамыхьылIэхэу къагъэ­кIыгъэх.
— Ахэм ащыщыбэр республикэм къы­­щагъэкIыхэми къэралыгъом щып­­сэухэрэм ашIэрэп. Къэгъэлъэгъоным тызэрэхэлажьэрэм ишIуагъэкIэ цIыфхэм тыкъашIэ, тикъэгъэлъэгъуапIэ щалъэгъу. Джащ фэд, тапэкIэ къыддэлажьэмэ зышIоигъо хъызмэтшIапIэхэм ялIыкIохэм тыкъагъотынымкIэ къэгъэлъэгъоныр амалышIу. ХъызмэтшIапIэхэм ялIыкIохэр къытэкIуалIэх, зэдэлэжьэныгъэмкIэ ашIогъэшIэ­гъонхэм къакIэуп­чIэх. Республикэм имэкъумэщ къыдэгъэкIыжьын зы лъэоянэкIэ дэкIоенымкIэ ащи мэхьанэшхо иI, — къыд­дэгощагъ АР-м мэкъу-мэщымкIэ и Министерствэ иIофышIэу Мэт Иринэ.
Анцокъо Ирин.
Сурэтхэр: АР-м и ЛIышъхьэ и Телеграм-нэкIубгъу.