Адыгэ Республикэм икомсомол имэфэкI ихэгъэунэфыкIын зыфэгъэхьазырыгъэным фэгъэзэгъэ зэхэщэкIо комитетым зэхэсыгъо Правительствэм и Унэ щыриIагъ.

Iофтхьабзэм хэлэжьагъэх лIэшIэгъу мэфэкIым ихэгъэунэфыкIын фэгъэзагъэ­хэр ыкIи пэIудзыгъэ шIыкIэм тетэу муниципальнэ образованиехэм ялIыкIохэр.
Зэхэсыгъор зэрищагъ АР-м IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр.
— Комсомолыр лъэпкъхэр зэзып­хырэ общественнэ организациеу щытыгъ. Ащ ныбжьыкIэ нэбгырэ мин пчъагъэ щыIэныгъэ гъогу шъуамбгъом тырищагъ. ­Ады­геим икомсомол хэтхэм Iашэр аIыгъэу я Хэгъэгу къаухъумагъ, псэолъэшIын IофшIэнхэм ахэлэжьагъэх, щыIэныгъэм едж­апIэ щафэхъугъ. Мыгъэ ­Адыгеим икомсомол илъэси 100 зэрэхъурэр зэрифэшъуашэу хэдгъэунэфыкIыщт, — къыIуагъ Шъхьэлэхъо Аскэр.
НыбжьыкIэ союзым илIэшIэгъу мэфэкI ихэгъэунэфыкIын зызэрэфагъэхьазыррэм фэгъэхьыгъэу къэгущыIагъ зэхэщэкIо комитетым итхьаматэ игуадзэу Нэхэе Юрэ. Ащ къызэрэхигъэщыгъэмкIэ, комсомолым итарихъ гъогу къизыIотыкIырэ стендхэр районхэм къагъэхьазырых, ахэр мэфэкI Iофтхьэбзэ шъхьаIэр зыщыкIощт Пушкиным ыцIэ зыхьырэ ­лъэпкъ Унэм идэпкъхэм апалъэщтых. НэмыкI шъолъырхэм къарыкIыщт хьакIэхэр къы­рагъэблэгъагъэх, ахэр ыкIи республикэм икомсомольцэхэр зэгъусэхэу В.И. Лениным исаугъэт къэгъагъэхэр кIэралъхьанхэу рахъухьагъ.
— МэфэкI Iофтхьабзэм къе­кIолIэщтхэм апае юбилейнэ комсомольскэ бгъэхалъхьэхэр дгъэ­хьазырыгъэх. Тарихъ шIэныгъэ­хэмкIэ докторэу Ацумыжъ Казбек комсомолым итарихъ фэгъэ­хьыгъэ итхылъ афэдгощыщт. МэфэкI концерт щыIэщт, Къудаикъо Алый комсомолым фэгъэ­хьыгъэ фильмэу къыгъэхьазырыгъэр къэзэрэугъоихэрэм къафэдгъэлъэгъощт, — къыIуагъ Нэхэе Юрэ.
Мэфэ шъхьаIэу агъэнэфэгъэ чъэпыогъум и 28-м ехъулIэу ВЛКСМ-р илъэси 100 зэрэхъурэм епхыгъэ Iофтхьабзэу рагъэкIокIыщтхэм, ныбжьыкIэ союзым итарихъ къыхэхыгъэ пычыгъо гъэшIэгъон­хэм, пэрытэу хэтыгъэхэм якъэбархэм афэгъэхьыгъэхэр шъолъыр къэбар жъу­гъэм иамалхэм къазэрэщыхаутыщтхэм анаIэ тыраригъэдзагъ Комитетым итхьаматэу Шъхьэлэхъо Аскэр.
Культурнэ мэфэкI Iофтхьабзэу агъэ­нафэхэрэм, футболымкIэ зэнэкъокъоу зэхащэщтым къа­тегущыIагъэх АР-м культурэмкIэ иминистрэу Аулъэ Юрэрэ Адыгеим физическэ культурэмкIэ ыкIи спорт­ымкIэ и Комитет итхьаматэу Дэгужъые Муратрэ.
Республикэм икъалэхэм ыкIи ирайон­хэм ялIыкIохэу пэIудзыгъэ шIыкIэм тетэу зэхэсыгъом къыхэлэжьагъэхэм зыгъэгумэкIырэ упчIэхэр къатыгъэх.
Адыгеим икомсомол илъэси 100 зэрэхъурэм ихэгъэунэфыкIын епхыгъэу планым тетэу мэфэкI Iофтхьабзэхэр рагъэкIокIыщтых.
Iэшъынэ Сусан.