Адыгэ республикэ клиническэ сымэджэщым нэхэм яIэзэгъэнымкIэ иотделение гъэхъэгъэшIухэр ешIых. РеспубликэмкIэ апэрэу мы отделением щашIыгъ «кератопластика» зыфаIорэ операциер – нэапчыр зэблэхъугъэныр.

Республикэ клиническэ сымэджэщым нэхэм яIэзэгъэнымкIэ иотделение ипащэу ТIэшъу Адамрэ Москва къикIыгъэ профессорэу, офтальмохирургэу Андрей Золоторевскэмрэ ар къызыдэхъугъэр.
Мыщ фэдэ операциеу технологие пэрытхэр зыщыгъэфедагъэхэр «кератоконус» зыфаIорэ узыр зиIэ нэбгыритIум афашIыгъах. А узыр къызэузыхэрэм янэапч пIуакIэ мэхъу, мэушIоркъы, зэхъокIыныгъэ фэхъу. Ащ къыхэкIэу цIыфым ынэхэм зэралъэгъурэм къыщэкIэ, ары пакIошъ, нэшъуи хъун ылъэ­кIыщт.
— Джынэс мыщ фэдэ операциехэр федеральнэ сымэджэщхэр ары, гущыIэм пае, Москва, Санкт-Петербург, зыщашIыщтыгъэхэр. Республикэ клиническэ сымэджэщым нэхэм зыщяIэзэхэрэ иотделение иофтальмологхэм мы технологиер аIэ къызэрэрагъахьэрэм ишIуагъэ­кIэ, Адыгеим щыпсэухэу мыщ фэдэ операцие зищыкIагъэхэр чыжьэу кIонхэр, чэзыум хэтынхэр ищыкIэгъэжьыщтэп. ЦIыфхэм технологие пэрытхэм адиштэрэ медицинэ IэпыIэгъу ягъэгъотыгъэнымкIэ программэм ишIуагъэкIэ, кератопластикэр республикэм щыпсэухэрэм ыпкIэ хэмылъэу афашIыщт, — къыIуагъ Адыгэ Республикэм псауныгъэр къэухъу­мэгъэнымкIэ иминистрэу Мэрэтыкъо Рустем.