ТIопсэ районым ит псэупIэу Кирпичнэм щыщ Нэгъуцу Тэйбат Шъалихьэ ыпхъоу игъашIэ къоджэ тхылъеджапIэм езытыгъэм имэфэкI джырэблагъэ хигъэунэфыкIыгъ.

БэшIагъэу щыIэ журналист шапхъ — цIыф гъэшIэгъонэу, зэпстэумэ афэмыдэхэр къытпэблагъэу мэпсэух, зытплъы­хьанэу ары ныIэп ищыкIагъэр. Мызэу, мытIоу ар дгъэунэфыгъ. ЩыIэныгъэ гъогоу къыкIугъэмкIэ, исэнэхьат зэрэфэшъыпкъэмкIэ, хэгъэгум, обществэм зы­къаригъэшъхьэпэным зэрэфэхьазырымкIэ рэзэныгъэр къэзылэжьыгъэ тичIыпIэгъухэм янахьыбэр хы ШIуцIэ Iушъо Шапсыгъэм ипсэупIэ цIыкIухэм адэсых. Мары ащ фэдэ щысэ.
Нэгъуцу Тэйбат къуаджэу ЦIэпс игъу­нэгъу псэупIэу Кирпичнэм итхылъеджапIэ илъэс 55-рэ хъугъэу щэлажьэ. IэпэIэсэныгъэу хэлъым, творческэ екIо­лIакIэу иIэм ыкIи исэнэхьат зэрэфэшъып­къэм афэшI мызэу, мытIоу щытхъу ыкIи рэзэныгъэ тхылъхэмкIэ къыхагъэщыгъ. Ау ежьыр анахь ыгъэлъапIэрэр икъоджэгъухэм лъытэныгъэу къыфашIырэр ары. ЕтIани, ар Гъуакъо псэупIэ коим идепутатэу пчъагъэрэ хадзыгъ, клубнэ системэм ипрофсоюзхэм якомитет ипащ.
Тэйбат Ныбэм къахэкIыгъ, ШIоикъо къыщыхъугъ. 1964-рэ илъэсым еджапIэр къызеухым, Адыгэ кIэлэегъэджэ училищым чIэхьэгъагъ. Пэублэ классхэм якIэлэегъэджэ сэнэхьат зэзыгъэгъотыгъэ специалист ныбжьыкIэу Кирпичнэм дэт еджапIэм иIофшIэн зыщыригъэжьагъэм ыуж бэ темышIагъэу Гъуакъо къоджэ Советым а лъэхъаным ипэщэгъэ Шъхьэ­лэхъо Айсэ илъэIукIэ тхылъеджапIэу псэупIэм къыщызэIуахыгъэм ипащэ хъугъагъэ.
Джырэблагъэ Нэгъуцу Тэйбат ыныбжь илъэс 75-рэ зэрэхъугъэр хигъэунэфыкIыгъ. Непи ащ Iоф ешIэ, еджапIэм зэпхыныгъэ дыриIэу, кIэлэеджакIохэм десэхэм анэмыкI егъэджэнхэр афызэхещэх, Iофтхьэбзэ зэфэшъхьафэу игупсэ хъугъэ псэупIэм щыкIохэрэм ары якIэщакIор. Ащ дакIоу ар ипхъорэлъфэу Заремэ, ащ ипшъашъэхэу Самирэ ыкIи Миланэ нэнэ пхъашэу, зафэу, ау нэнэ гукIэгъу-гуIалэу яI.
ТIопсэ районым культурэмкIэ иIофышIэхэм ацIэкIэ зимэфэкI бзылъфыгъэм къыфэгушIуагъ муниципалитетым культурэмкIэ иотдел ипащэу Юлия Даниловар.
— Уигупсэхэр, угукIэ къып­пэблагъэхэу уигушIуагъо зыдэбгощымэ пшIоигъохэр зэкIэ сыдигъокIи уабгъукIэ щытынхэу, анаIэ къыптетынэу, уагъэгушIо зэпытынэу, псауныгъэ пытэ ори уиIахьылхэми шъуиIэнэу сы­шъуфэлъаIо! – къыIуагъ ащ.
ИIахьыл-гупсэхэри, икъоджэгъухэри ащ тетэу Тэйбат фэгушIуагъэх. Псауныгъэрэ кIуачIэрэ иIэ зэпытынэу, мэфэ нэфынэ, чэфыбэ, хъугъэ-шIэгъэ гушIогъуабэ джы­ри къекIунэу, щыIэкIэшIу иIэнэу фэлъэ­Iуагъэх. НасыпышIоу Тхьэм джыри бэрэ ущегъаI, Тэйбат!
НЫБЭ Анзор.
Сурэтыр авторым ий.