ГандболымкIэ Урысыем ипервенствэ изыфэгъэхьазырын къыдыхэлъытагъэу шъолъыр мэхьанэ зиIэ зэнэкъокъухэр Волгоград щызэхащагъэх.

Олимпийскэ джэгунхэм тыжьын медальхэр къащызыхьыгъэ Полина Шарковам (Ведехинам) ыкIи Антонина Санталовам (Скоробогатченкэм) яшIухьафтынхэр зэрылъ турнирым команди 6 хэлэжьагъ. Ахэм Адыгеир къэзыгъэлъэгъуагъэри зэу ащыщ.
Адыгеим, Волгоград, Рос­тов-на-Дону, Астрахань, Краснодар яспортсменкэхэр зэнэкъокъугъэх. Республикэр къэзыгъэлъэгъуа­гъэр спорт еджапIэу С. М. Джэнчатэм ыцIэ зыхьырэм зыщызыгъасэхэрэр ары. Тренер-кIэлэегъаджэр Валерий Гончар.
Типшъашъэхэм текIоныгъи 3 къыдахыгъ, ау Волгоград ыкIи Краснодар ялIыкIохэм адыряIэ зэIукIэгъухэр ашIуахьыгъэх ыкIи ящэнэрэ чIыпIэр къыдахыгъ. Краснодар икомандэ зэкIэми апэ ишъыгъ, Волгоград ятIонэрэ чIыпIэр къыфагъэшъошагъ.
Зэнэкъокъум изэфэхьысыжьхэмкIэ зэхэщакIохэм гандболисткэ анахь дэгъухэр къыхахыгъэх. Ахэм зэу ащыщ Мыекъуапэ икомандэ икъэлэпчъэIутэу Елизавета Погожевар.