Тыгъосчэщ Мыекъуапэ иIэгъо-блэгъу пыим пилот зэрымыс быбырэ ипкъыгъохэу къытебыбагъэхэм апкъ къикIэу ащ машIом зыкъыщиштэгъагъ ыкIи пэгъунэгъоу щыт псэупIэу Родниковэм дэсхэр охътэ гъэнэфагъэкIэ агъэкощынхэ фае хъугъэ.

Мы хъугъэ-шIагъэм фыкъуагъэрэ лые зэрихыгъэрэ къыхэкIыгъэп. ЧIыпIэм хэушъхьафыкIыгъэ къулыкъухэм, къэгъэ­нэжьакIохэм Iоф щашIагъ. ОшIэ-дэмышIэ IофхэмкIэ къулыкъум имэшIогъэкIуасэхэр лыгъэм пэшIуекIуагъэх.
ПсэупIэу Родниковэм дэсхэр зыдащагъэхэр станицэу Ханскэм культурэм и Унэу дэтым къыщызэIуахыгъэ шъхьэ­егъэзыпIэр ары. ЦIыфхэм ящыкIэгъэщт пстэумкIи ар зэтырагъэпсыхьагъ. Къулыкъу пстэуми Iофхэр зэрэзэшIуа­хыхэрэм ежь ышъхьэкIэ лъыплъагъ Адыгэ Республикэм и ЛIышъхьэу КъумпIыл Мурат ыкIи исоциальнэ хъытыу­хэмкIэ къэбарэу щыIэр къыриIотыкIыщтыгъ.
Охътэ гъэнэфагъэм щыIэнхэу къызэIуахыгъэ чIыпIэм нэбгырэ 40 фэдиз ащагъэр, нэмыкIхэр яIахьылхэм якIолIэжьыгъэх. ЧIыпIэм министрэхэм я Кабинет илIыкIохэм, Мыекъопэ къэлэ администрацием, социальнэ къулыкъу­хэм ялIыкIохэм, волонтерхэм Iоф щашIагъ. Шхыныгъо стырыр, нэмыкI фэIо-фашIэу ящыкIагъэхэр цIыфхэм арагъэгъотыгъэх. Медицинэм иIофышIэхэм ахэр ауплъэ­кIугъэх, анахьэу анаIэ зытырагъэтыгъэ­хэр ныбжь хэкIотагъэ зиIэхэр ары. Пенсионерхэм ащыщэу нэбгырищыр сымэджэщым игериатрическэ отделение чIагъэгъолъхьагъ.
Хъурэ-шIэрэм ынаIэ зэрэтыригъэтырэр, хэушъхьафыкIыгъэ къулыкъухэм яIофшIэн къызаухыкIэ, цIыфхэр япсэупIэхэм зэрякIужьышъущтхэр Адыгеим и ЛIышъхьэ къытхыгъ. Нэужым, мафэм сыхьатыр 2-м адэжь, КъумпIыл Мурат къыIопщыгъ:
— Пилот зэрымыс быбырэ пкъыгъохэр Мыекъуапэ иIэгъо-блэгъу къызышъхьащэхьэхэм ошIэ-дэмышIагъэу къэхъугъэ­хэр дагъэзыжьыгъахэх. ЦIыфхэм яинфраструктурэ фыкъоныгъэхэр фэхъугъэ­хэп. ПсэупIэу Родниковэм щыщхэу хэушъхьафыкIыгъэ къулыкъухэм Iоф ашIэфэкIэ охътэ гъэнэфагъэкIэ нэмыкI чIыпIэ ащэгъагъэхэр япсэупIэхэм охътэ благъэм якIужьышъущтых. Зэдегъэштэныгъэ хэлъэу Iоф зэдэзышIэгъэ пстэуми сафэраз!
Шъугу къэдгъэкIыжьын, быбырэ пкъы­гъохэу пилот зэрымысхэр шъулъэгъугъэ­хэмэ, хэушъхьафыкIыгъэ къулыкъухэм къэбарыр алъыжъугъэIэсын фае, сурэт­хэр атешъухыхэу социальнэ хъытыухэм арыжъугъахьэхэ хъущтэп. ШъузэрэзекIон фаер нахь игъэкIотыгъэу я 3-рэ нэкIубгъом ит.