ШIэныгъэхэмкIэ Урысые академием иакадемикэу, биологие шIэныгъэхэмкIэ докторэу, профессорэу, Урысые Федерацием шIэныгъэмкIэ иIофышIэшхоу, Урысые Федерацием апшъэрэ профессиональнэ гъэсэныгъэмкIэ иIофышIэ гъэшIуагъэу, Пшызэ шъолъыр IофшIэнымкIэ и ЛIыхъужъэу ыкIи Адыгеим иапшъэрэ тынэу «Адыгеим и Щытхъузехь» зыфиIорэр къызфагъэшъошагъэу Шэуджэн Асхьад цlэ лъапlэу иlэхэм джыри зы къахэхъуагъ — гъэсэныгъэм ылъэныкъокlэ УФ-м и Правительствэ итын къыфагъэшъошагъ

ЧIыгъэшIухэмкIэ зыфэдэ къэмыхъугъэ шIэныгъэ екIолIакIэу ыгъэунэфыгъэу агрохимиемкIэ томибл хъурэ IофшIа­гъэу ылэжьыгъэм ар къыкIэкIуагъ. Гъэсэныгъэм ылъэныкъокIэ Правительствэм итын икъыдэхынкIэ зэнэкъокъум ар къыщигъэлъэгъуагъ ыкIи осэшI купым хэтхэм зыкIыныгъэ ахэлъэу анахь дэгъоу
алъытагъ. IофшIагъэм итхын шIэныгъэлэжьыр илъэсыбэрэ дэлэжьагъ. Апэрэ томыр 2010-м къыдигъэкIыгъ. 2017-м нэс Iахь-Iахьэу къыхиутыгъ. Том пэпчъ тхьапэшхоу нэкIубгъо 50-м къыщыкIэрэп. Непэ мэкъу-мэщым епхыгъэ сэнэхьат къыхэзыхыгъэ студентхэм еджэнымкIэ ар агъэфедэ, IэпыIэгъушхо афэхъу. Хаплъэ зышIоигъохэм дунэе хъытыум инэкIубгъохэм ар къарагъотэщт. IофшIагъэр икIэрыкIэу къыдагъэкIыжьынэу рахъухьэ.
Къэралыгъо мэхьанэ зиIэ тын лъапIэр Шэуджэн Асхьад Правительствэм и Унэ къыщыфагъэшъошагъ, УФ-м и Правительствэ и Тхьаматэу Михаил Мишустиным ежь ышъхьэкIэ ар къыритыжьыгъ.
«Агрономыр, агрохимикыр шIогъэшхо зыпылъ ыкIи анахь тищыкIэгъэ сэнэхьатхэм ащыщ. Неущ къэралыгъом имэкъумэщ къыдэгъэкIыжьын хъызмэт хэшIыкI ин фызиIэ цIыфхэу щылэжьэщтхэр дгъэхьазырынхэмкIэ тэ амалэу тиIэр зэкIэ непэ етэхьылIэ», — ­къыщиIуагъ Шэуджэн Асхьад Правительствэм и Унэ.
Шэуджэн Асхьад пынджым илэжьын игъашIэ фигъэхьыгъ. Пшызэ къэралыгъо мэкъумэщ университетым агрохимиемкIэ икафедрэ ипащэу мэлажьэ. Тхылъи­пшI пчъагъэхэм, шIэныгъэ IофшIэгъэ 1400-мэ, патент 32-мэ яавтор. ШIэныгъэ Iофэу зыпылъым дакIоу игъа­шIэ адыгэ тарихъым изэгъэшIэн, ащ шIэныгъэ лъапсэ фэшIыгъэным афигъэ­хьыгъ.
Анцокъо Ирин.