Сэкъатныгъэ зиIэхэу, медицинэ уплъэкIунхэм къызэрагъэлъэгъуагъэм тетэу автомобиль зищыкIагъэхэм Урысыем и Социальнэ фонд Адыгэ РеспубликэмкIэ и Къутамэ ОСАГО-м иполис ыуасэ ипроцент 50-р къыфилъэгъужьын ылъэкIыщт.

Мыщ дэжьым къыхэгъэщыгъэн фае илъэсым къыкIоцI зы транспортым шIокIынэу ар зэрэщымытыр. Страховой полисми водители 3-м нахьыбэ итхэгъэ­нэу щытэп. А пчъагъэм къыхеубытэ автомобилыр зиер (е хабзэм тетэу ащ лIыкIоу иIэр).
«СФР-м и Къутамэу Адыгэ Респуб­ликэм щыIэм ахъщэу къафилъэгъужьыщ­тым пае лъэIу тхылъ е документ горэ рахьылIэныр ищыкIагъэп. ФэIо-фашIэхэр зэрагъэцакIэхэрэмкIэ пшъэдэкIыжь зыхьырэ организациехэм къэбарэу а Iофым пылъыр сэкъатныгъэ зиIэхэм я Федеральнэ реестрэ, къэбархэмкIэ сис­темэ зыкIым, автостраховщикхэм я Урысые союз иреестрэ аIэкIагъахьэ», — къызэхифыгъ СФР-м и Къутамэу Адыгэ Республикэм щыIэм ипащэу МэщлIэкъо Хьамидэ.
Къэбар икъу къэтпчъыгъэ реестрэхэм аIэкIэмыхьагъэ зыхъукIэ, транспортыр зищыкIэгъэ цIыфым ежь-ежьырэу СФР-м и Къутамэу Адыгэ Республикэм щыIэм лъэIу тхылъкIэ зыфигъэзэн ылъэкIыщт. Джащ фэдэу къэралыгъо фэIо-фашIэхэмкIэ порталым, МФЦ-м ыкIи нэмыкIхэм ащ зафигъазэми хъущт.
ЛъэIу тхылъыр заIэкIигъэхьэрэ нэужым IофшIэгъу мэфи 5-м къыкIоцI ахъщэу къыфалъэгъужьыщтым епхыгъэ унашъор аштэ.
ШъузыгъэгумэкIырэ Iофыгъоу къэ­уцухэрэмкIэ Урысыем и Социальнэ фонд и Къутамэу Адыгэ Республикэм щыIэм зыфэжъугъэзэн шъулъэкIыщт: 8(800)-200-01-48 (блыпэ – мэфэку мафэхэм: пчэдыжьым сыхьатыр 9-м къыщегъэ­жьагъэу пчыхьэм сыхьатыр 6-м нэс; бэрэскэшхом: сыхьатыр 9-м къыщегъэжьагъэу пчыхьэм сыхьатыр 7-м нэс), ыпкIэ хэмылъэу шъутеон шъулъэ­кIыщт.