ХэушъхьафыкIыгъэ дзэ операцием хэлэжьэрэ дзэкIолIхэу Херсонскэ ыкIи Запорожскэ лъэныкъохэм ащыIэхэм зичэзыу шIушIэ IэпыIэгъоу афаугъоигъэр афащагъ.

Адыгеим икъэзэкъ ныбжьыкIэхэм я Союз итхьаматэу Екатерина Даниловар ыкIи Мыекъопэ район къэзэкъ обществэм иатаман ипшъэрылъхэр зыгъэцэкIэрэ Александр Даниловыр зэгъусэхэу а пшъэрылъыр агъэцэкIагъ. Ахэр мэфищ гъогум тетыфэхэ километрэ 1800-рэ акIугъ.
Зичэзыу кIогъум афащагъэх унагъом щашIыгъэ гъомылапхъэхэр (борщ, тушенкэр, аджикэ, вареньехэр), чIэгъ-чIэ­лъхэр, хъытыухэр, псэолъэшI материалхэу базэу «Стройкомфорт» зыфиIорэм къафигъэхьазырыгъэхэр, зызэратхьакIыщт пкъыгъохэр, ныбжьыкIэхэм аIашъхьэкIэ къаугъоигъэ мыIэрысэ килограмм 300 фэдиз, нэмыкIхэри. Фронтым Iут дзэкIолIхэм агу къыдэзыщэещт письмэхэу поселкэу Победэм ыкIи станицэу Кужорскэм адэт гурыт еджапIэхэм якIэлэеджакIохэм атхыгъэхэри афащагъэх. ШIушIэ IэпыIэгъум иугъоин чанэу хэлэжьагъэх Кужорскэ ыкIи Дагестанскэ къэзэкъ обществэхэм яатаманхэу Александр Хомяковыр ыкIи Сергей Кочневыр.
ДзэкъулыкъушIэхэр кIэлэцIыкIухэм зэрафэразэхэр къыраIотыкIэу ахэр зытетхэжьыгъэхэ ТекIоныгъэм и Быракъ нэпэеплъ шIухьафтынэу къафарагъэщагъ.
ЫгукIэ мырэхьатэу тидзэкIолIхэм IэпыIэгъу афэхъурэ нэбгырэ пэпчъ «тхьауегъэпсэу» етэIо! Ахэм ащыщых купэу «Сбор нашим. Майкоп», Мые­къуапэ ипочтэ отделениехэр, предпринимательхэу Андрей Торгашкиныр (ООО-у «ОА Органик Энерджи), Александр Булгаковыр, Юрий Легеза, Максим Митровыр. ШIушIэ IэпыIэгъум амал зиIэ пстэур къыхэлэжьэн ылъэкIыщт. Тызэкъо­тэу тызэрэзэдеIэжьырэм текIоныгъэр нахь къегъэблагъэ.
ШIушIэ IэпыIэгъур зэшъухьылIэн шъу­лъэкIыщтыр: къалэу Мыекъуапэ, ур. Краснооктябрьскэр, 52, блыпэм къыщегъэжьагъэу бэрэскэшхом нэс сыхьатыр 9-м къыщыублагъэу пчыхьэм сыхьатыр 4-м нэс, телефоныр 8-962-767-81-93 (Екатерина Геннадий ыпхъур). Поселкэу Тульскэр, ур. Революционнэр, 40, блыпэм, бэрэскэжъыем, бэрэскэшхом сыхьатыр 3-м къыщегъэжьагъэу 5-м нэс, телефоныр 8-928-466-44-23 (Андрей Юрий ыкъор).
Екатерина Даниловар.
Мыекъопэ район къэзэкъ обществэм иатаман игуадз.