Почтэм иамалхэмкIэ атIупщыгъ
Мазэм къыкIоцI Урысыем и Почтэ Белгородскэ ыкIи Курскэ хэкухэм ащыпсэухэрэм апае посылкэ мини 135-м ехъу ытIупщыгъ.
ШышъхьэIум и 27-м къыщегъэжьагъэу Урысыем и Почтэ ыпкIэ хэмылъэу Курскэ ыкIи Белгородскэ хэкухэм посылкэ мин 60 фэдиз афищагъ. А шъолъырхэм ащыпсэухэрэм къэралыгъом инэмыкI чIыпIэхэм посылкэ мин 75-м ехъу афатIупщыгъ.
Адыгэ Республикэм икIэу Курскэ ыкIи Белгородскэ хэкухэм ащыпсэухэрэм апае ыпкIэ зыхэмылъ посылки 100-м ехъу арагъэщагъ.
Ихьылъагъэ килограмм 20-м нэсэу почтэмкIэ атIупщын алъэкIынэу ашIыгъ, а зы нэбгырэм пчъагъэу ыгъэхьыщтыр гъэнэфагъэп. Почтэм иамалхэр ыпкIэ хэмылъэу зыгъэфедэн зылъэкIыщтхэр Курскэ ыкIи Белгородскэ хэкухэм ащыщхэу егъэзыгъэкIэ нэмыкI шъолъырхэм кощыгъэхэр ары. Ахэм аугъоигъэ пкъыгъохэр нахьыбэу зыдаштэнхэм ар тегъэпсыхьагъ.
— ОшIэ-дэмышIэ ыкIи къиныгъо Iофыгъохэр къызыхъухэкIэ, почтэр сыдигъокIи къэралыгъом щыпсэухэрэм IэпыIэгъу афэхъу. Мы илъэсым ишышъхьэIу мазэ къыщегъэжьагъэу Курскэ ыкIи Белгородскэ хэкухэм ащыпсэухэрэм апае посылкэхэр ыпкIэ хэмылъэу анэтэгъэсых ыкIи ежь яехэри афызетэщэх. А шIыкIэмкIэ граждан еплъыкIэу тиIэр мэпытэ, тызэрафэгумэкIырэр зэхашIэ, — къыIуагъ Урысыем и Почтэ игенеральнэ пащэу Михаил Волковым.