ГандболымкIэ Урысыем и Суперлигэ хэт «АГУ-Адыифым» зичэзыу ешIэгъу Мыекъуапэ щыриIагъ. Тикомандэ Ижевскэ къэзыгъэлъэгъорэ «Университетым» IукIагъ ыкIи текIоныгъэр къыдихыгъ.

«АГУ-Адыиф» — «Университет» — 36:26 (24:12).
«АГУ-Адыифым» хэтхэм якъэ­гъэлъэгъонхэр: Суздальцевар – 6, Бондаренкэр – 4, Краснокутскаяр – 4, Болоба – 4, Тишинар – 4, Коваленкэр – 4, Кавера – 3, Къэбжьыр – 2, Пономаревар – 2, Гогия – 1, Селиверстовар – 1, Коблыр — 1.
«Университетыр»: Шулятьевар – 8, Жуковар – 5, Вахрушевар – 4, Голубевар – 4, Низовцевар – 3, Басанговар – 1, Кондратюк – 1.
Наталья Дерепаскэр зипэщэ тикомандэ ешIэкIэ дахэ къыгъэлъэгъуагъ. Пшъашъэхэм къагурыIощтыгъ мы зэIукIэгъур къахьын зэрэфаер. Апэрэ такъикъитфым ыуж «АГУ-Адыифым» хэтхэр нахьыбэрэ ыпэкIэ илъхэу ­аублагъ, ухьазырыныгъэ дэгъу зэряIэр къагъэшъыпкъэжьыгъ. Апэрэ таймым икIэухым республикэм илIыкIохэр Iэгоо 12-кIэ хьакIэхэм апэ итыгъэх. Мы мафэм дэгъу дэдэу ешIагъ командэм икапитанэу Кобл Зурет. Ар ыпэкIи илъыщтыгъ, зыухъумэжьын Iофри зэрифэшъуашэу ыгъэцакIэщтыгъ.
ЯтIонэрэ таймым тигандболисткэхэр нахь рэхьатэу джэгугъэх, пчъагъэр 36:26-у зэIукIэгъур аухыгъ. «АГУ-Адыифым» иешIэкIо анахь дэгъоу алъытагъэр Елизавета Краснокутскаяр ары, ащ къэлапчъэм Iэгоуи 4 дидзагъ.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Ростов-Дон» — 14.
2. «Астраханочка» — 11.
3. «ЦСКА» — 10.
4. «Кубань» — 9.
5. «Черноморочка» — 8.
6. «Лада» — 6.
7. «Луч» — 4.
8. «Динамо-Синара» — 4.
9. «Звезда» — 2.
10. «АГУ-Адыиф» — 2.
11. «Университет» — 0.
    КъыкIэлъыкIощт ешIэгъур «АГУ-Адыифым» Краснодар щыриIэщт, чъэпыогъум и 13-м «Кубань» IукIэщт. Чъэпыогъум и 18-м командэу «Ладэр» тихьакIэщт.