«Псы къабз» зыфиIорэ федеральнэ проектыр псыр цIыфхэм аIэкIэзыгъэхьэрэ системэр гъэкIэжьыгъэным фэшI лъэпкъ проектэу «ПсэупIэр ыкIи къэлэ щыIакIэр» зыфиIорэм къыдыхэлъытагъэу аштагъ.

Адыгеир ащ зыхэлажьэрэм къыщыублагъэу псым епхыгъэу псэолъэ 27-рэ республикэм имуниципальнэ псэупIэхэм ащашIыгъ е ащагъэкIэжьыгъ. Ащ щыщэу 13-р гъэрекIу затIупщыгъэр. ЗэкIэмкIи сомэ миллион 308-рэ ахэм апэIухьагъ.
Адыгеим исхэр псэу зашъохэрэр шапхъэхэм адиштэным фытегъэпсыхьэгъэ IофшIэнхэр республикэм мы илъэс­ми щылъагъэкIуатэх. Проектым къыдыхэлъытагъэу псэолъи 6 агъэнэфэ­-
гъагъ.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, ахэр пIалъэу апылъхэм адиштэу ашIых, нахьыбэр аухыгъ. Псэуалъэхэм зэкIэмкIи апэIуагъэхьащт сомэ миллиони 162-м щыщэу сомэ миллиони 143,3-р федеральнэ бюджетым къыхэ­хыгъ.
Проектым къыдыхэлъытагъэу псыкъы­чIэщыпIэхэр Тэхъутэмыкъое районым ит къуаджэу Нэтыхъуае, поселкэу Отраднэм, Теуцожь районымкIэ къуаджэхэу Нэшъукъуае, Пэнэжьыкъуае, поселкэу Лъэустэнхьаблэ, Джэджэ районым истаницэу Дондуковскэм ащагъэпсыгъэх.
Къуаджэу Нэтыхъуае щашIыгъэ къы­чIэщыпIэм сыхьатым кубометрэ 25—30 къеты, башнеу агъэуцугъэр кубометрэ 50-м телъытагъ. ПстэумкIи псэуалъэм ишIын сомэ миллион 21,8-рэ пэIуагъэ­хьагъ.
Поселкэу Отраднэм щагъэуцугъэ къы­чIэщыпIэми сыхьатым къытырэ кубометрэ пчъагъэри, тырагъэуцогъэ башнем ифэщтыри ащ фэдиз. ПстэумкIи сомэ миллион 22,1-м ехъу ащ щызэшIуахыгъэ IофшIэнхэм атефагъ.
«Псы къабз» зыфиIорэ лъэпкъ проектым къыдыхэлъытагъэу блэкIыгъэ илъэсым Тэхъутэмыкъое районым псэолъи 8 щагъэкIэжьыгъ. Ахэм ащыщэу 5-р къуаджэу Козэт, 3-р Тэхъутэмы­къуае адэт. ЗэкIэмкIи ахэм сомэ миллиони 141-рэ апэIухьагъ.
Теуцожь районымкIэ къуаджэу Нэшъу­­къуае ипсыкъычIэщыпIэ игъэкIэжьын пстэумкIи сомэ миллион 15-м ехъу пэIуагъэхьагъ. IофшIэнхэр ащ щаухы­гъэх. Къуаджэу Пэнэжьыкъуае щагъэкIэжьыгъэм сомэ миллион 25,4-рэ тефагъ, Лъэустэнхьаблэ кIэу щашIырэ къычIэщыпIэм зэкIэмкIи сомэ миллион 45,2-рэ пэIухьащт.
Джэджэ районым ит станицэу Дондуковскэм щырагъэжьагъэм ишIын аухыгъ. Министерствэм къызэритыгъэмкIэ, ащ псыр къызчIэкIырэ скважинитIу кIэу щаубырыугъ, ахэм кIочIэгъу афэхъу­нэу башне кIэу тырагъэуцуагъ, нэмыкIэу ищыкIагъэхэр щагъэпсыгъэх, чIыпIэу къызэлъиубытырэр къашIыхьагъ, зэтырагъэпсыхьагъ. А IофшIэнхэм зэкIэмкIи сомэ миллион 31-рэ фэдиз апэIухьагъ.
— Псы къабзэу цIыфхэр зашъохэрэм епхыгъэ Iофыгъоу республикэм ит псэупIэхэм яIэхэр дэгъэзыжьыгъэнхэм фэшI проектэу «Псы къабзэм» тызэрэхэлажьэрэр тапэкIи лъыдгъэкIотэщт. Къэ­кIощт илъэсым кIэу тшIымэ е дгъэцэкIэжьмэ тшIоигъохэм апае тхылъхэр мы уахътэм тэгъэхьазырых, — къыхигъэщыгъ АР-м и ЛIышъхьэу КъумпIыл Мурат мы лъэныкъом къытегущыIэзэ.
ХЪУТ Нэфсэт.
Сурэтыр: Тэхъутэмыкъое псэупIэ коим ихъарзынэщ.