КаратэмкIэ Урысые зэнэкъокъухэр Владимирскэ хэкум щыкIуагъэх. Къалэу Суздаль загъэпсыгъэр илъэс 1000 зэрэхъурэм Iофтхьабзэр фэгъэхьыгъагъ.

Урысыем ишъолъыр 28-мэ къарыкIыгъэ спортсмен 950-рэ фэдизмэ заушэтыгъ, яухьазырыныгъэ къагъэлъэгъуагъ. Тренерхэу Владимир Васильченкэмрэ Вячеслав Леусрэ агъэсэрэ нэбгыриплIымэ Адыгеир зэнэкъокъухэм къащагъэлъэгъуагъ. Республикэм илIыкIохэм гъэхъэгъэшIухэр ашIыгъэх, медалищ къахьыгъ. Мыекъо­пэ гурыт еджапIэу N 15-м щеджэрэ Никита Макаровым текIоныгъэр къыдихыгъ. Ящэнэрэ чIыпIэхэр къафагъэшъошагъэх республикэм икъэлэ шъхьаIэ игурыт еджапIэу N 7-м чIэс Назар Христофоровымрэ Тэхъутэмыкъое районым ипсэупIэу Инэм дэт еджапIэу N 25-м илIыкIоу ХъорэлI Алинэрэ.
Турнирым изэфэхьысыжьхэмкIэ тиспортсменхэм спорт разрядхэр къафагъэшъошэщтых.
КаратэмкIэ Дунаим ичемпи­онатрэ ипервенствэрэ ахэлэжьэнхэу республикэм илIыкIохэм загъэхьазыры. Ахэр шэкIогъу мазэм Орловскэ хэкум щыкIощтых.