Лъэсыдзэхэм я Мафэ фэгъэхьыгъэу фондэу «Хэгъэгум иухъумакIохэр» зыфиIорэм ишъолъыр къутамэ, рес­публикэ проектэу «ЛIыхъужъэу къэхъухэрэп» зыфиIорэм къыдыхэлъытагъэу, къуаджэу АдыгеякIэм игурыт еджапIэу N 29-м «ЛIыхъужъныгъэм исыхьат» щызэхищагъ. КIэлэеджакIохэм аIукIагъ хэушъхьафыкIыгъэ дзэ операцием иветеранэу Владимир Кузьмин.

ЕджапIэм щыкIогъэ Iофтхьабзэм кIэлэеджэкIуи 165-рэ хэлэжьагъ. Урысые дзэкIолIхэу Хэгъэгур къэзыухъумэхэрэм лIыхъужъныгъэ зекIуакIэу, лIыгъэу зэрахьэхэрэм ветераныр къатегущыIагъ.
Шъолъыр фондым иIофышIэхэм лъэсыдзэхэм ятарихъ, джырэ Iэшэ лъэпкъэу щыIэхэр еджакIохэм къафаIотагъэх. Ежь ныбжьыкIэхэми ашIогъэшIэгъон упчIэхэр бэу къаратыгъэх.
ЗэдэгущыIэгъу шъуашэм илъэу рекIокIыгъэ Iофтхьабзэм анахьэу къызкIэупчIагъэхэр фронтым щыIэ щыIакIэр, ащ къызикIыжьхэкIэ щыIэныгъэм зыкъызэрэхагъуатэрэр. ЩысэшIу афэхъущт цIыфым зэраIуагъэкIагъэхэмкIэ кIэлэцIыкIухэр къызэрафэразэхэр къыраIотыкIыгъ.