Адыгэ кIэлэегъэджэ колледжыр (училищыр) загъэпсыгъэр къихьащт илъэсым лIэшIэгъу хъущт. А уахътэм къыкIоцI республикэм имызакъоу, Урысыем, IэкIыб къэралыгъохэм ащызэлъашIэгъэ, Адыгеим ыцIэ дахэкIэ рязыгъэIогъэ ыкIи зисэнэхьат хэшIыкIышхо фызиIэ цIыфыбэ ащ къычIитIупщыгъ. ГъэхъэшIухэр зышIыгъэхэм ыкIи еджапIэм дэгъу дэдэу щеджагъэхэм ащыщ «Адыгэ макъэм» къыфэтхэгъэ Наталия Крафт.

Мыщ Адыгэ кIэлэегъэджэ училищыр, нэужым Адыгэ къэралыгъо университетыр къыухыгъэх. Игупсэ училищым Iоф щишIэнэуи игъо ифагъ. Джырэ уахътэм физическэ культурэмкIэ ыкIи спортымкIэ Лъэпкъ къэралыгъо университетэу Санкт-Петербург дэтым педагогикэмкIэ икафедрэ щэлажьэ, доцент, кIэлэегъэ­джэ шIэныгъэхэмкIэ кандидат.
— КIэлэегъэджэ сэнэхьатым сищыIэныгъэ гъогу зэреспхыгъэм сырыкIэгъожьэу зы такъикъи къыхэкIыгъэп. СицIыкIугъом къыщегъэжьагъэу сянэу Нина Крафт сыкIэрыплъыщтыгъ, ар кIэлэегъэджэ пэрытхэм ащыщыгъ. Ащ фэдэ сыхъунэу ыкIи игъогу сырыкIонэу сыфаеу 1988-рэ илъэсым Адыгэ кIэлэегъэджэ колледжэу Андырхъое Хъусен ыцIэ зыхьырэм сычIэхьагъ. Студент илъэсхэр гъэшIэгъонэу кIуагъэх, мыщ щызэзгъэгъотыгъэ шIэныгъэхэр нэужым лъэшэу къысшъхьэпэжьыгъэх. Къыздеджагъэхэр, сикIэлэегъаджэхэр ыкIи Iоф зыдэсшIагъэхэр джы къызнэсыгъэми сщыгъупшэхэрэп, — еIо Наталие.
Ар зыщеджэгъэ уахътэм зисэнэхьат хэшIыкIышхо фызиIэ специалистхэр училищым Iутыгъэх. Бзылъфыгъэм шIукIэ ыгу къинэжьыгъэх икIэлэегъэджагъэхэу Елена Ступкинар, Надежда Жуковар, Нэгъой Галинэ, Елена Королевар, Хьакъунэ Фатимэ, Аулъэ Къэрэл­хъан, Хьакурынэ Казбек, Ацумыжъ Казбек, Шэуджэн Светланэ, Ольга Фотиевар, нэмыкIхэри. Непэ гъэхъа­гъэу иIэхэм ахэм яIахьышхо хэлъэу елъытэ.
— Лъэшэу сырэгушхо ыкIи шIукIэ ренэу сыгу къэ­кIыжьы Адыгэ кIэлэегъэджэ училищым щызгъэкIогъэ илъэс еджэгъухэр. Синасып къыхьи педагог шIагъохэм сатефагъ, ахэм яшIуагъэкIэ сищыIэныгъэ гъогу пытэу сытеуцуагъ. Училищыр сыдигъуи еджэпIэ пэрытхэм ащыщыгъ, непи арэущтэу щыт, ащ сырэгушхо. Илъэсишъэ хъущт тиеджапIэ тапэкIи гъэхъэгъэшIухэр ышIынхэу, пэрытныгъэм игъогу темыкIынэу фэсэIо, — къыIуагъ Наталия Крафт.