Участковэ анахь дэгъур къыхахыщт

УФ-м хэгъэгу кIоцI IофхэмкIэ и Министерствэ кIэщакIо зыфэхъугъэ Урысые зэнэ­къокъоу «Народный участковый-2024» зыфиIорэм иятIонэрэ едзыгъо чъэпыогъум и 7-м рагъэжьагъ. Хабзэ зэрэхъугъэу, Iоф­тхьабзэр уцугъуищэу зэтеутыгъ.
Апэрэ едзыгъор Iоныгъом и 11-м щегъэжьагъэу и 20-м нэс муниципалитетхэм ащыкIуагъ. КъулыкъушIэ анахь дэгъухэр чIыпIэхэм къащыхахыгъэх.
ЯтIонэрэ уцугъом къыдыхэлъытагъэу АР-м хэгъэгу кIоцI IофхэмкIэ и Министерствэ исайт шъуихьанышъ, шъугу рихьырэ къулыкъушIэм шъумакъэ фэшъутын амал шъуиI. Чъэпыогъум и 16-м нэс ар кIощт.
Чъэпыогъум и 7-м щыублагъэу онлайн шIыкIэм тетэу цIыфхэм амакъэ атын алъэкIыщт. Ахэм анахьэу зыдырагъэштэгъэ, амакъэ зыфатыгъэ къулыкъушIэр къэнэфэщт. ТекIоныгъэр къыдэзыхыгъэм Адыгеир ящэнэрэ федеральнэ едзыгъом къыщигъэлъэгъощт.
Полициемрэ обществэмрэ зэпхыныгъэу яIэр гъэпытэгъэным, цIыфхэм хэбзэухъумакIохэм цыхьэу афашIырэм хэгъэхъогъэным, мы къулыкъум имэхьанэ зыкъегъэIэтыгъэным фэIорышIэ илъэс пчъагъэ хъу­гъэу зэхащэрэ зэнэкъокъур.
Ащ икIэух федеральнэ мэхьанэ иIэу шэкIогъум зэфахьысыжьыщт. Шъолъыр пэпчъ текIоныгъэ къыдэзыхыгъэ участковэ анахь дэгъухэр ащ хэлэжьэщтых. Урысыем хэгъэгу кIоцI IофхэмкIэ и Министерствэ полицием иуполномоченнэ участковэ и Мафэ зыщыхагъэунэфыкIырэм тефэу народнэ участковэ цIэ лъа­пIэр къэзылэжьыгъэм мэфэкI шIыкIэм тетэу шIухьафтыныр фагъэшъошэщт.

Егъэджэнхэр афызэхащагъэх

Мыекъопэ гурыт еджапIэу N 17-м иполицейскэ класс щеджэхэрэм АР-м хэгъэгу кIоцI IофхэмкIэ и Министерствэ икинологическэ къулыкъу игупчэ иIофышIэхэм егъэджэнхэр афызэхащагъ.
КъэIогъэн фае, къулыкъумрэ еджапIэм япащэхэмрэ зэгурыIоныгъэ азыфагу илъэу Iоф зэрэзэдашIэрэр. Ащ ишIуагъэкIэ министерствэм илIыкIохэр еджэпIэ учреждениехэм макIох, хэгъэгу кIоцI къулыкъум иIоф­шIэн епхыгъэу лекциехэм къяджэх. Подразделением иIофшIэн зэрэзэхэщагъэм я 10-рэ классым ис кIэлэеджакIохэр ащагъэгъозагъэх.
АпэрапшIэ курсантхэр ведомствэм икинологическэ къулыкъу игупчэ щыIагъэх. ХьакIэхэм къапэгъокIыгъ полицием икапитанэу Надежда Шаяновар. Ащ игуапэу гупчэм иIофшIэн зэрэзэхэщагъэр, пшъэрылъэу ыкIи мурадэу иIэхэр къафиIотагъэх, джащ фэдэу хьэхэр зэрагъасэхэрэм, ахэм Iоф адэзышIэхэрэм шIыкIэу агъэфедэхэрэм ащигъэгъозагъэх.

Полицием икъулыкъушIэхэм къызэраIуагъэмкIэ, гупчэм хьэ гъэсагъэхэр щаIыгъ, общественнэ рэхьатныгъэм икъэухъумэн ыкIи бзэджашIэхэм язещэн фэгъэзагъэх нэмыц овчаркэхэр. Хьэ лъэпкъэу лабрадорхэр наркотикхэр хэбзэнчъэу къезыгъэкIокIыхэрэм, къэорэ пкъыгъохэм, Iашэхэм ялъыхъун хагъэлажьэх.
Полицием икапитанэу Байкъулэ Айдэмыр ныбжьыкIэхэм къафиIотагъ охътэ зэфэшъхьафхэм кинологхэр хъугъэ-шIэгъэ гъэшIэгъонэу зэрихьылIагъэхэр, бзэджэшIэгъэ хьылъэхэм якъыхэгъэщынкIэ хьэхэм яшIогъэшхо къызэрэкIорэр.
КIэухым зэхэщакIохэм къызэрэхагъэщыгъэмкIэ, мыщ фэдэ Iофтхьабзэхэм мэхьанэшхо яI, полицейскэ ныбжьыкIэхэм теориер зэрэзэрагъашIэрэм имыза­къоу, ясэнэхьат епхыгъэу шIэныгъэ арагъэгъотынымкIэ яшIогъэшхо къэкIо.

ЛIыхъужъхэм яшIэжь фагъэ­хьыгъ

АР-м хэгъэгу кIоцI IофхэмкIэ и Министерствэ икъулыкъушIэхэм Iоф адэшIэгъэнымкIэ игъэIорышIэпIэ шъхьаIэ ыкIи общественностым ялIыкIохэр зэгъусэхэу Урысые Iофтхьабзэу «ШIэжьым ичъыгхат» зыфиIорэм хэлэжьагъэх.
Апэрэ илъэсэп мы Iофтхьабзэм полицием иIофышIэхэр зыхэлажьэхэрэр. Хэгъэгу зэошхом хэкIодагъэхэм яшIэжь фэгъэхьыгъэу чъыгыкIэхэр агъэтIысхьанхэр зигукъэкIыр АР-м хэгъэгу кIоцI IофхэмкIэ и Министерствэ икъулыкъушIэхэм Iоф адэшIэгъэнымкIэ игъэIорышIэпIэ шъхьаI ары. Мы илъэсым Iофтхьабзэр Урысые экологическэ шэмбэт шIыхьафэу «Зеленая Россия» зыфиIорэм фагъэхьыгъ.
Iофтхьабзэм изэхэщэн къыдырагъэштагъ министерствэм епхыгъэ Общественнэ советым итхьаматэ игуадзэу Николай Киселевым, ветеранхэм я Совет исекретарэу Ирина Плетневам, гъогу-патруль къулыкъум иIофышIэ ныбжьыкIэхэм, участковэ уполномоченнэхэм ыкIи Мыекъопэ отделым иследовательхэм.

Бзыфыр, блащэр ыкIи зэрыджэр аIоу къыхахыгъэ чъыг цIыкIухэр къэзэрэугъоигъэхэм министерствэм икъулыкъушIэ унэ дэжь щагъэтIысхьагъэх.
Мыщ фэдэ Iофтхьабзэхэм ныбжьыкIэхэр къазэрэхэ­лажьэхэрэр щытхъукIэ афилъэгъугъ Николай Киселевым. Джащ фэдэу ащ къыIуагъ чъыг цIыкIоу агъэтIысхьагъэ пэпчъ заом илIыхъужъхэм яшIэжьэу зэрэщытыр, ащ нэмыкIэу чIыопсыр къызэтегъэнэгъэ­нымкIэ ыкIи мэзхэр къэухъумэгъэнхэмкIэ мэхьанэ­шхо зиIэ лъэбэкъушIу.
КъэIогъэн фае, Урысые Iофтхьабзэу «ШIэжьым ичъыгхат» зыфиIорэм хахьэу мыщ фэдэхэр респуб­ликэм ирайонхэм зэкIэми ащырагъэкIокIыгъэх.

Сэнэхьатым ишъэфхэм ащагъэгъозагъ

АР-м хэгъэгу кIоцI IофхэмкIэ и Министерствэ икъулыкъушIэхэм ныбжьыкIэхэр мы сэнэхьатым щыгъэгъозэгъэнхэм фэгъэхьыгъэ Iофтхьабзэ Мыекъуапэ щырагъэкIо­кIыгъ.
Къэлэ паркым къэгъэлъэгъон ин къыщызэIуахыгъ. Полицейскэхэм нэмыкI хэбзэухъумэкIо къулыкъухэм ялIыкIохэр ягъусэу ахэм агъэфедэрэ Iашэхэр, щыгъын­хэр, хэушъхьафыкIыгъэ дзэ техникэр къагъэлъэгъуагъэх.
Iофтхьабзэм къырагъэблэгъагъэх Мыекъопэ еджапIэхэм ащеджэхэрэр, джащ фэдэу Адыгэ къэралыгъо ыкIи Мыекъопэ къэралыгъо технологическэ университетхэм яаужырэ курс ащеджэрэ студентхэр. ЗэкIэмкIи ахэр нэбгырэ 500 фэдиз хъущтыгъэх.
Iофтхьабзэр къызэIуихыгъ АР-м хэгъэгу кIоцI Iоф­хэмкIэ иминистрэ игуадзэу Виталий Элибековым. НыбжьыкIэхэм апашъхьэ къыщыгущыIэзэ ащ ицыхьэ телъэу къыIуагъ хэгъэгур къэухъумэгъэным епхыгъэ сэнэхьатым къэзэрэугъоигъэхэм ащыщыбэхэм ящыIэныгъэ рапхы зэрашIоигъор. Ягухэлъхэр къадэхъунхэм мы Iофтхьабзэр фытегъэпсыхьагъ.
НыбжьыкIэхэр къэгъэлъэгъонихмэ арагъэплъыгъэх. Министерствэм икъулыкъушIэхэм къагъэхьазырыгъэ площадкэм цIыф зэрымыс къэзыбыбыхьэрэ пкъыгъор къыщагъэлъэгъуагъ. ЦIыфыр ешъуагъэмэ къэзыгъэлъэ­гъорэ пкъыгъоу гъогу-патруль къулыкъум иIофышIэхэм агъэфедэрэм ыкIи хэушъхьафыкIыгъэ автомобилэу къызэрекIокIыхэрэм ныбжьыкIэхэр ащагъэгъозагъэх. Джащ фэдэу кинологхэм хьэ гъэсагъэу ягъусэхэм нэIуасэ афашIыгъэх.
Ащ нэмыкIэу министерствэм икъулыкъушIэхэм Iоф адэшIэгъэнымкIэ гъэIорышIапIэм иIофышIэхэм Урысыем и МВД иапшъэрэ еджапIэ учIэхьан зэрэплъэ­кIыщтыр ныбжьыкIэхэм къафаIотагъ.
Iофтхьабзэм шъолъырым икъулыкъу зэфэшъхьафхэри хэлэжьагъэх: хьыкум приставхэр, бзэджэшIагъэ зезыхьагъэхэм пшъэдэкIыжь ягъэхьыгъэнымкIэ федеральнэ къулыкъоу АР-м щыIэр, УФ-м ошIэ-дэмышIэ IофхэмкIэ и Министерствэ АдыгеимкIэ и ГъэIорышIэпIэ шъхьаIэ, Росгвардием и ГъэIорышIапIэу респуб­ликэм щыIэр ыкIи УФ-м и Следственнэ комитет иследственнэ ГъэIорышIапIэу АР-м щыIэр.
КIэлэеджакIохэм ыкIи студентхэм яупчIэхэр хэбзэухъумэкIо къулыкъухэм ялIыкIохэм чанэу афагъэзагъэх, игъэкIотыгъэ джэуапхэри агъотыгъэх.

Ящэнэрэ едзыгъом икIэух зэфахьысыжьыгъ

Оперативнэ-пэшIорыгъэшъ Iофтхьабзэу «Iушъхьэ-2024» зыфиIорэм иящэнэрэ едзыгъо икIэуххэр Адыгеим щызэфахьысыжьыгъэх.
Мы IофтхьабзэмкIэ мурадэу яIагъэр наркотикыр хэбзэнчъэу къезыгъэкIокIыхэрэр, IузыгъэкIыхэрэр ыкIи ар зыгъэфедэхэрэр къэубытыгъэнхэр, ахэм пшъэ­дэкIыжь ягъэхьыгъэныр ары.
Iофтхьабзэр окIофэ мы лъэныкъомкIэ бзэджэшIэгъэ 76-рэ къыхагъэщыгъ.
Щысэхэр къэтхьын. Къалэу Мыекъуапэ щыпсэурэ илъэс 26-рэ зыныбжь кIалэр полицием икъулыкъушIэхэм къаубытыгъ. Ащ синтетикэм хэшIыкIыгъэ наркотик щыхьэгъэ 22-рэ къыкъуагъотагъ. ЗэрагъэунэфыгъэмкIэ, бгъэфедэ мыхъущт веществор интернетымкIэ IуигъэкIын гухэлъ иIагъ. КIалэм илъэс 20-м нэс хьапс къыхьын ылъэкIыщт.
Мыщ фэдэ хъугъэ-шIагъэ Теуцожь районым щагъэу­нэфыгъ. Къутырэу Краснэм иурам горэм илъэс 37-рэ зыныбжь хъулъфыгъэр къыщаубытыгъ. Ар къызалъы­хъум синтетикэм хэшIыкIыгъэ наркотик щыхьагъэр къыкъуахыгъ.
Зэфэхьысыжьхэм къызэрагъэлъэгъуагъэмкIэ, зэхэубытэгъэ оперативнэ-пэшIорыгъэшъ Iофтхьабзэу «Iушъхьэ-2024» зыфиIорэм иящэнэрэ едзыгъо окIофэ уголовнэ Iофи 2 къызэIуахыгъ, нэбгырэ 22-мэ административнэ пшъэдэкIыжь арагъэхьыгъ.
Хэутыным фэзыгъэхьазырыгъэр
КIАРЭ Фатим.

Сурэтхэр: АР-м и МВД.