«Дахэм дахэ ипэгъокI» аIо адыгэхэм. Сыд фэдэ пкъыгъо тинахьыжъхэм ашIыми, ар дэхагъэм инэпэеплъэу зэрэщытыгъэр къыушыхьатыгъ Адыгеим и Мафэ ихэгъэунэфыкIын къыдыхэлъытагъэу «Черкесский стиль» зыфиIорэ къэгъэлъэгъонэу Шъхьэгуащэ инэпкъ щыкIуагъэм. IэпэщысэшIыным пылъхэ Хьамырзэ Саидэ, Гумэ Ларисэ, Мыгу Рузанэ ыкIи Джарымэкъо Зурет яIэшIагъэхэр Iофтхьабзэм къыщагъэлъэгъуагъэх.

Адыгэ Республикэм культурэмкIэ и Министерствэ, лъэпкъ культурэмкIэ и Гупчэ, IэпэIасэхэм ыкIи лъэпкъ IэпэщысэшIыным пылъхэм я Ассоциацие, «Территория развития «Сфера роста» зыфиIорэр, модельнэ еджапIэу «Лакшери ЭС ТЭ» Iофтхьабзэм кIэщакIо фэхъу­гъэх.
Адыгэ дышъэидэм изэтегъэуцожьын, изэгъэшIэн ыкIи игъэфедэн мэхьанэшхо зиIэ лъэпкъ Iофыгъу. Лъэпкъ IэшIагъэхэр зыщагъэфедэгъэ шъуашэхэр зэщымыщэу, непэрэ мафэм диштэу гъэпсыгъэх. Къэ­гъэлъэгъоныр ныбжьыкIэхэм шIухьафтын шъыпкъэ афэхъугъ. Нэбгырэ пэпчъ ежь ыгу пэблэгъэ шъуашэр къыхихыгъ.
Модельерхэм адыгэ лъэпкъ шъуашэм инэшанэхэр амыгъэкIодэу, джырэ уахътэм диштэу шъошэ дахэхэр ашIых. Ахэр хэдыкIыгъэхэмкIэ, тхыпхъэхэмкIэ гъэ­кIэрэкIагъэх. Шъуашэхэм лъэпкъ культурэм ибаиныгъэ къыраIотыкIы.
ИжъыкIэ адыгэ щыIакIэм диштэу шъуашэри щытыгъ, лые зи хэмылъэу, шъохэр зэдиштэхэу саери, цыери агъэ­псыщтыгъ. Бзылъфыгъэ IэпэIасэхэм яIофшIагъэхэр гупшысэ гъэнэфагъэ яIэу гъэпсыгъэх, непэрэ щыIакIэм дештэх, псынкIэх, пкъыгъо дахэхэр ахэлъых.
Модэм инэшанэхэм тэ анахьэу къа­хэтхырэр шъор, щыгъыным ишIыкI. Аужырэ уахътэм къытхэхьэгъэ щыгъын быхъур, кIакоуи шIы, гъончэджэуи шIы, ащ щыщ. ШъошакIэхэм «черкесскэ стилыр» къябэкIэу хъугъэ.

— Непэрэ Iофтхьабзэр адыгэ шъуа­шэм, дышъэидэм якъэухъумэн зегъэушъо­мбгъугъэным фэгъэхьыгъ. Лъэпкъ культурэр, тарихъыр тымыгъэкIодхэу, джырэ лъэхъаным щыIэ модэм де­дгъаштэзэ шъуашэхэр дгъэпсыным тыпылъ. Уахътэу тызхэтым къегъэлъагъо ныбжьыкIэмэ стилизованнэ шъуашэхэр зэрашIогъэшIэгъоныр. Тинахьыжъхэм къытфагъэнэгъэ кIэныр, лъэпкъ культурэр дгъэкIоды хъущтэп, ар къыткIэхъухьэрэ лIэужхэм ядгъэшIэн фае, — къыIуагъ Гумэ Ларисэ.
Къэгъэлъэгъоным хэхьэгъэ шъуашэ, сурэт пэпчъ адыгэ шэн-хабзэр къыраIотыкIэу, гупшысэ ин ахэлъэу гъэпсыгъэх.
— Ижъырэ лъэпкъ шъуашэр умыгъэ­кIодэу джырэ лъэхъаным дебгъэштэныр IэшIэхэп. Ассоциацием хэт IэпэIасэхэм екIолIакIэхэм талъэхъу, ныбжьыкIэхэм агъэфедэн алъэкIыщт лъэпкъ пкъыгъо цIыкIухэм нэIуасэ афэтшIыгъэх. Лъэхъэ­нэ зэфэшъхьафхэм агъэфедэщтыгъэ пкъыгъохэр щыгъын пстэуми адегъэштэгъуай. Непэ нысэ джанэхэр, цыехэр къэзгъэлъэгъуагъ ыкIи мафэ къэс бгъэ­федэн плъэкIыщт пкъыгъохэу Iэлъмэ­къыр, жьыфыр, бгырыпхыр, гъэдэхалъэхэр, шъхьэрыхъоныр, — къытфиIотагъ Мыгу Рузанэ.
— Адыгэхэм якультурэ, яшэн-хабзэхэр къыткIэхъухьэрэ лIэужхэм ягъэшIэгъэнымкIэ непэрэ Iофтхьабзэм ишIогъэшхо къэкIощт. ЛъэпкъыцIэр зыгъэIурэ шъуа­шэр ныбжьыкIэхэм ядгъэшIэныр типшъэ­рылъ, — къыIуагъ Джарымэкъо ­Зуриет.
— Шъуашэм мэхьанэшхо иI: цIыфхэм уахещэ, нэмыкI лъэпкъхэм уакъыхегъэ­щы, уикультурэ идэхагъэ, ибаиныгъэ цIыф лъэпкъхэм къафызэIуехы. Адыгэ шъуашэм идэхагъэ бэмэ зэлъашIагъ, зыщалъагъ, къытхэс лъэпкъхэм тишъуашэ иэстетическэ шIуагъэ зэрагъэшIагъ. Адыгэ лъэпкъ шъуашэм инэшанэхэр мыкIодэу, джырэ уахътэм диштэхэу «Черкесскэ стилыр» къебэкIэу тэшIых, — къыIуагъ Хьамырзэ Саидэ.
Iофтхьабзэр зэрищагъ АР-м изаслуженнэ журналистэу Биданэкъо Замирэ.
Лъэпкъ шъуашэм Iоф дэзышIэхэрэм япчъагъэ зэрэхахъорэм лъэшэу тегъэгушIо. Адыгэ шъуашъэр лъэпкъым ибаиныгъ.