«Бысымгуащ» зыфиIорэ фестивалыр АР-м и Лъэпкъ музей щыкIуагъ. Iо­ф­тхьабзэм общественнэ организациеу «Адыгэ Республикэм ибзылъфыгъэхэм я Союз», Мыекъопэ къэралыгъо гуманитарнэ-техническэ колледжым гурыт профессиональнэ гъэсэныгъэ кластерэу «Адыгэ Республикэм зекIонымкIэ ыкIи ащ епхыгъэ фэIо-фашIэхэмкIэ игъэсэныгъэ Гупчэ» кIэщакIо фэхъугъэх. Ар еджапIэм ригъэкIокIырэ федеральнэ проектэу «Профессионалитет» зыфиIорэм къыдыхэлъытагъ.
Адыгеим щеджэрэ еджакIохэр, гурыт сэнэхьат зэзыгъэгъотырэ студентхэр, общественнэ организациеу «Шыу Хасэр», шъолъырым щылэжьэрэ предприятиехэу гъомылапхъэхэр къыдэзгъэкIыхэрэр, лъэпкъ шхапIэхэр зыгъэлажьэхэрэр, зекIохэр ыкIи нэмыкIхэр зэхахьэм хэлэжьагъэх.
Гъэсэныгъэ кластерэу «Адыгэ Рес­публикэм зекIонымкIэ ыкIи ащ епхыгъэ фэIо-фашIэхэмкIэ игъэсэныгъэ Гупчэ» Iофтхьабзэр гъэшIэгъонэу ыгъэпсыгъ. Тызхэт лъэхъаным адыгагъэм кIуачIэу иIэр ныбжьыкIэмэ чIамынэу, щыIэныгъэм щыпхыращыным къыфэщэгъэнхэр мурад шъхьаIэу зэхэщакIохэм зыфа­гъэуцужьыгъ.
Зэхахьэр къызэIуихыгъ Адыгэ Респуб­ликэм ибзылъфыгъэхэм я Союз ыцIэкIэ фестивалым изэхэщакIоу Тепсэе Заремэ.
— АР-м и ЛIышъхьэу КъумпIыл Мурат къыгъэуцугъэгъэ пшъэрылъхэм такъыпкъырыкIызэ, ныбжьыкIэхэм ты­бзэ, тихабзэхэр, тикультурэ ядгъэшIэным еджапIэхэм тыдэлажьэ. Лъэшэу сигуапэ мыщ фэдэ фестиваль проектым къыпкъырыкIэу зэрэтшIырэр, сыда пIомэ адыгэ лъэпкъым ишэн-хабзэхэм нахь зыкъаIэтыжьыщт. Мы фестивалым унашъоу иIэр ныбжьыкIэхэр культурэм нахь пылъынхэр, адыгэ бзылъфыгъэм идэхагъэрэ ихэбзэ зехьакIэрэ джырэ адыгэ бысымгуащэм химынэныр ары,— къы­Iуагъ Тепсэе Заремэ.
Фестивалым икъызэIухын лъэпкъ творческэ купхэр хэлэжьагъэх.
Iофтхьабзэм иапэрэ Iахь адыгэ шэн-хабзэу хьакIэпэгъокIыным идесэхэр «ХьакIэщым» къыщагъэлъэгъуагъэх, къекIолIэгъэ ныбжьыкIэхэри ащ хагъэлэжьагъэх. Адыгэхэм егъашIэм хьакIэр якIэсагъ, агъэлъапIэщтыгъ. ХьакIэм къешIэкIыгъэ хабзэм фэгъэхьыгъэ сценкэхэр къашIыгъэх, хэбзэ гъэнэфагъэу хьакIэпэгъокIыным пылъхэр зэхафыгъ.

Iофтхьабзэм иятIонэрэ Iахь «Адыгэ шхыныр» зыфиIорэ зэнэкъокъу-къэгъэлъэгъоныр щырекIокIыгъ.
Адыгэ шхыным ишlуагъэ къэпшlэным пае адыгэ lанэм, адыгэ шхакlэм ихабзэхэр пшIэнхэр ищыкlагъ. Илъэс минкlэ узэкlэlэбэжьмэ, ышlэгъагъэм цlыфыгур еплъыжьы. Гъомылапхъэу лъэпкъым ылъ хэхьагъэм лъэпкъи, хабзи, ыбзи къегъэ­нэжьых.
— Лъэпкъэу тызщыщым уасэ фэтшIынымкIэ, тыбзэ, тихабзэхэм ягугъу тшIынымкIэ, ныбжьыкIэхэм зэхядгъэхынымкIэ мыщ фэдэ Iофтхьабзэхэр амалышIух. ГущыIэм пае, бысымгуащэр хьакIэм зэрэпэгъокIырэм, гъомылапхъэу апигъо­хырэм нахь мэхьанэ еттыгъ. Чэтыр зэрэзэпкъырыпхыщтым, хьакIэм тефэрэ пкъым пылъ унашъохэр зэхахьэм щызэхэтфыгъэх, — къыIотагъ Гупчэм иIофы­шIэу Нэгъой Фатимэ.
Лъэпкъ IэпэщысэшIыным икъэгъэлъэ­гъон фестивалым щызэхащагъ: лъэпкъ шъуашэхэр, нысхъапэхэр, музыкальнэ Iэмэ-псымэхэр, лIэкъо тамыгъэхэр, бгырыпх дахэхэр, пIуаблэхэр ыкIи нэмыкIхэр ащ хэлъыгъэх.
Гуфэбагъэ хэлъэу, лъэныкъо пстэоу хэлажьэхэрэмкIэ гъэшIэгъонэу зэхахьэр кIуагъэ.
ТекIоныгъэ зэнэкъокъум къыщыдэзыхыгъэ бысымгощэ ныбжьыкIэхэм дипломхэмрэ рэзэныгъэ тхылъхэмрэ афагъэшъошагъ. Анахь бысымгощэ дэгъоу хахыгъ Мыекъопэ къэралыгъо гуманитарнэ-техническэ колледжым истудентэу ХьапэкIэ Раситэ.
«Пчэгу хъурай» зыфиIорэ джэгумкIэ Iофтхьабзэр зэфашIыжьыгъ.
НэкIубгъор зыгъэхьазырыгъэр
Лъэпшъыкъо Фатим.
Сурэтхэр авторым иех.