Адыгэ Республикэм ия 33-рэ илъэс ихэгъэунэфыкIын къыдыхэлъытэгъэ шыгъачъэр спорт мэфэкI шъхьаIэ хъугъэ. Iофтхьабзэм кIэщакIо фэхъугъэх Адыгеим физическэ культурэмкIэ ыкIи спортымкIэ и Комитетрэ АР-м шыхэм яхъункIэ и Ассоциациерэ.

Къызэпэчъэнхэр гъэшIэгъонэу, узыIэпащэу рекIокIыгъэх. Анахь къахэщыгъэр Мырзабек Каппушевыр ары. Шы зэфэшъхьафхэм атесэу ащ гъогогъуиплIэ текIоныгъэр къыдихыгъ. АР-м и Къэралыгъо Совет – Хасэм, Адыгеим иминистрэхэм я Кабинет, Кубэщыч зэшхэм яшIухьафтынхэр къыфагъэшъошагъэх. Джащ фэдэу шэу Славер тесэу Адыгеим и ЛIышъхьэ ишIухьафтынэу сомэ миллион хъурэр къыдихыгъ, чемпионым и Кубок къыхьыгъ. Шыр зиер Кубэщыч Анзор, тренерыр Пщыжъ Артур. ЯтIонэрэ чIыпIэр Щыгъущэ Айдэмыр къыфагъэшъо­шагъ, Пщыжъ СултIан ящэнэрэ хъугъэ.
Адыгэ Республикэм шыхэм яхъункIэ и Ассоциацие ишIухьафтын къыдэзыхыгъэр Пщыжъ СултIан зытесыгъэ шэу Бармалей. «Краса Адыгеи» зыфиIорэ шIухьаф­тыныр Мирбек Мамуровым къыхьыгъ.
Шыгъачъэм имызакъоу, нэ­мыкI культурнэ Iофтхьабзэхэри мы мафэм рагъэкIокIыгъэх, респуб­ликэм иартистхэм ыкIи итворческэ купхэм концерт къатыгъ. Ермэлыкъхэм Iоф ашIагъ, кIэлэцIыкIухэр зыщыджэгунхэ алъэ­кIыщт чIыпIэхэм цIыфыбэ къя­олIагъ.