ФутболымкIэ мы илъэсым зэхащэгъэ зэнэкъокъухэм тIогъогогъо текIоныгъэр къащыдихыгъ Красногвардейскэ районым икомандэу «Кавказ Адэмыем».

Мыщ ифутболистхэм Адыгеим ичемпионат апэрэ чIыпIэр къыщыдахыгъ. Джащ фэдэу АР-м и Къэралыгъо Совет — Хасэм и Кубок мы мафэхэм къафагъэ­шъошагъ. Финал ешIэгъум щызэIукIагъэх «Кавказ Адэмыемрэ» Адыгэкъалэ къэзыгъэлъэгъорэ «Асбиррэ».
«Кавказ Адэмый» — «Асбир» — 1:1 (0:0). ПенальтикIэ — 4:3.
Къэлапчъэм Iэгуаор дэзыдзагъэхэр: Артем Мельникрэ Дмитрий Межерецкэмрэ.
«Кавказ Адэмыем» щешIагъэх: Игорь Голубовыр, Пщыхъожь Ис­лъам, Псэунэ Тимур, Никита Шустовыр, Делэкъо Мурат, Руслан Таклиевыр, Джыгунэ Арсен, Пыщ­тыкъ Аслъан, Денис Мельник, Артем Мельник, Ис­лъам Тхалицшоковыр, Едыдж Тамирлан, Щыщэ Мэсхьуд, МэщлIэкъо Марат, Мыкъо Абрек, Мыкъо Мурат, Денис Павловыр, ЖакIэмыкъо Нарт, Виталий Квитченкэр.
Тренерыр: Тимур Ашкановыр.
«Асбирым» хэтыгъэх: Максим Васильевыр, Вячеслав Ильинскэр, Сергей Гореловыр, Нэхэе Бислъан, Хьаткъо Аслъан, Уджыхъу Рэмэзан, Сы­джахь Налбый, Устэкъо Азмэт, Дмитрий Межерецкэр, Сабаун Абдулрахман, Хьатит Алый, Еутых Щамил, ХьакIэгъогъу Мурат, Мыгу Азэмат, Еутых Азэмат, Шэртэнэ Бис­лъан.
Тренерыр: Хьадпэшъо Аслъан.
ЗэIукIэгъум иохътэ шъхьаIэ 1:1-у аухыгъ. ЯтIонэрэ таймым командэхэм гъогогъу зырызэ къэлапчъэм Iэгуаор дадзагъ. Рег­ламентым къызэригъэнафэу, пчъагъэр зэфэдизэу ешIэгъур заухыкIэ, футболистхэм пенальти къапыщылъ. «Кавказ Адэмыем» хэтхэм ар тIэкIу нахьышIоу агъэцэкIагъ ыкIи 4:3-у текIоныгъэр къыдахыгъ.
Финал ешIэгъум хэлэжьагъэхэм къалэжьыгъэ тынхэр ыкIи шIухьафтынхэр аратыжьыгъэх АР-м и Къэралыгъо Совет – Хасэм и Тхьаматэу Владимир Нарожнэмрэ Адыгеим и Парламент идепутатэу, Урысыем и ЛIыхъужъэу Цэй Эдуардрэ. Илъэс пчъагъэ хъугъэу зэхащэрэ зэнэкъокъум и Кубок апэ­рэу Красногвардейскэ районым къыхьыгъ.