Адыгэ Республикэм ия 33-рэ илъэс
Чъэпыогъум и 5-р — Адыгэ Республикэр зызэхащэгъэ Маф
Адыгэ Республикэм щыпсэухэу лъытэныгъэ зыфэтшIыхэрэр!
ТичIыпIэгъу лъапIэхэр!
Адыгэ Республикэр зызэхащагъэм ия 33-рэ илъэс фэшI тышъуфэгушIо!
Адыгеир зышIолъэпIэ пстэури мы мафэм зэрепхы, ащ щыпсэурэ цIыф лъэпкъхэм ягъэхъагъэхэмрэ язэгурыIоныгъэрэ ар ятамыгъ, тилъэныкъо гупсэрэ ти Хэгъэгушхоу Урысыемрэ джыри нахь зэтегъэпсыхьагъэ хъунхэм гуетыныгъэ фыряIэу фэлэжьэнхэми фегъэчэфых.
Тихэгъэгушхо инэмыкI шъолъырхэм зыкIэ ащыщ Адыгеим лъэпсэ пытэ фэзышIыгъэ пстэуми лъытэныгъэшхо афытиIэу тызэрафэразэр къыхэтэгъэщы. Республикэми хэгъэгуми яфедэ зыхэлъ Iофтхьабзэхэм яшIэныгъи акIуачIи фэзыгъэIорышIэрэ тичIыпIэгъухэм, хэушъхьафыкIыгъэ дзэ операцием хэлажьэхэзэ Украинэм инеонацистхэм апэуцужьхэрэм тарэгушхо.
Ти Хэгъэгушхоу Урысыем тыригъусэу, Урысые Федерацием и Президентэу Владимир Путиныр типащэу тикъэралыгъо игъэпытэн епхыгъэ пшъэрылъхэр зэшIотэхых. Зыгу къытфэмышIу хэгъэгухэм апкъ къикIырэ къиныгъохэу тызэуалIэхэрэм ямылъытыгъэу, зэкIэми ткIуачIэ зэхэлъэу тиэкономикэ зыкъетэгъэIэты, нэмыкI лъэныкъо шъхьаIэхэмкIи хэхъоныгъэ тэшIы.
Къэралыгъом ипащэ къыгъэуцугъэ пшъэрылъхэм язэшIохын Адыгеим иIахь хешIыхьэ. Экономикэм илъэныкъохэм хэхъоныгъэ ятэгъэшIы, цIыфхэр зычIэсыщтхэ унэхэм яшIынкIэ, псэупIэхэм язэтегъэпсыхьанкIэ, унагъохэм ящыIакIэ нахь зыкъегъэIэтыгъэнымкIэ бэ зэшIотхырэр. Хабзэ зэрэхъугъэу, унагъохэм ягъэпытэн ренэу тынаIэ тетэгъэты. А IофшIэным мэхьанэу иIэр къегъэлъагъо унагъом и Илъэс Урысыем зэрэщыхагъэунэфыкIырэм.
ТичIыпIэгъу лъапIэхэр! Непэ лъэшэу зэхэтэшIэ тизыкIыныгъэ дгъэпытэн, общественнэ-политикэ зыпкъитыныгъэр, зэгурыIоныгъэр щыIэнхэ зэрэфаер. Джырэ лъэхъаным къыгъэуцурэ Iофыгъохэм ялъытыгъэу ткIуачIэ зэкIэми зэхэтлъхьан фае.
Тызэгъусэмэ, сыд фэдэрэ къиныгъохэри зэпытчын, тигупсэ Адыгеим щыIакIэу илъым зыкъедгъэIэтын, ти Хэгъэгушхо джыри нахь зэтегъэпсыхьагъэ тшIын зэрэтлъэкIыщтым тицыхьэ телъ.
ЗэкIэми тышъуфэлъаIо псауныгъэ пытэ, насып, щыIэкIэшIу шъуиIэнэу, гъэхъэгъакIэхэр шъушIынхэу, шIоу щыIэр къыжъудэхъунэу!
АР-м и ЛIышъхьэу, Урысые политическэ
партиеу «Единэ Россием» и Адыгэ шъолъыр
къутамэ и Секретарэу КъумпIыл Мурат
АР-м и Къэралыгъо Совет — Хасэм
и Тхьаматэу Владимир Нарожнэр