Партийнэ проектэу «КIэлэцIыкIу спортыр» зыфиIорэм къыдыхэлъытагъэу «Единэ Россием» щагу баскетболымкIэ (командэ пэпчъ нэбгыри 3 хэт) ыкIи футболымкIэ (командэр нэбгыри 6-мэ къагъэлъагъо) Урысые фестиваль зэхищагъ. Илъэс 13 – 14 зыныбжь пшъашъэхэм ыкIи кIалэхэм ащ зыщаушэтыгъ.

Мыекъуапэ щыкIогъэ шъолъыр едзыгъом республикэм имуниципалитети 6-мэ къарыкIыгъэ спорт­сменхэр хэлэжьагъэх. Ом изытет къыхэкIэу Iофтхьабзэр стадионэу «Зэкъошныгъэм» щырагъэкIокIыгъэп, ныбжьыкIэхэр Адыгэ къэралыгъо университетым испортзал щызэрэугъоигъэх.
Зэфэхьысыжьхэм къызэрагъэлъэгъуагъэмкIэ, кIалэхэм азы­фагу щыкIогъэ зэнэкъокъум текIоныгъэр къыщыдэзыхыгъэр баскетболымкIэ Мыекъопэ академием зыщызыгъасэхэрэр ары. Пшъашъэ­хэмкIэ Джэджэ районым икомандэ анахь лъэшыгъ.
Стадионэу «Юностым» футболистхэр щешIагъэх. Поселкэу Тульскэм икомандэ апэрэ чIыпIэр къыдихыгъ. Адыгэкъалэрэ Кощ­хьэблэ районымрэ хагъэунэфыкIырэ чIыпIэхэр къахьыгъэх. Мыхэм зэкIэми медальхэр, кубокхэр ыкIи дипломхэр араты­гъэх, текIоныгъэр къыдэзыхыгъэхэм спорт шъуашэхэр ыкIи Iэгуаохэр афагъэшъошагъэх.

Партийнэ проектэу «КIэлэцIыкIу спортыр» жъугъэ ыкIи щагу спортым хэхъоныгъэ ашIыным фытегъэпсыхьагъ. Ащ къыдыхэлъытагъ муниципальнэ, шъолъыр, къэралыгъо ыкIи дунэе зэнэкъо­къухэм язэхэщэн. КъыткIэ­хъухьэрэ лIэужхэр физическэ культурэм ыкIи спортым апыщэгъэнхэр партием и Лъэпкъ программэ ипшъэрылъ шъхьаIэхэм ащыщ.