Республикэм и Мафэ ихэгъэунэфыкIын фытегъэпсыхьэгъэ программэ гъэшIэгъон къыгъэхьазырыгъ АР-м физическэ культурэмкIэ ыкIи спортымкIэ и Комитет.

Анахь шъхьаIэхэр чъэпыогъум и 5-м рагъэкIокIыщтых. Мы мафэм республикэ ипподромым шыгъачъэ щыкIощт. Ащ илъ шIухьафтынхэм языр АР-м и ЛIышъхьэ ыцIэкIэ агъэнэфагъ. Къызэдэчъэнхэм язэпыугъо уахътэ творческэ коллективхэм концерт къатыщт, джащ фэдэу ермэ­лыкъхэр зэхащэщтых, кIэлэцIы­кIухэр зыщыджэгунхэ алъэкIыщт чIыпIэхэр агъэпсыщтых, аттракционхэм, зоопаркым Iоф ашIэщт. Шыгъачъэр сыхьатыр 12-м рагъэ­жьэщт.
Мы мафэм футболымкIэ АР-м и Къэралыгъо – Совет Хасэм и Кубок икъыдэхын фэгъэхьыгъэ зэнэкъокъум ифинал республикэ стадионэу «Зэкъошныгъэм» щыкIощт. Ащ щызэIукIэщтых командэхэу «Кавказ-Адэмый» (Красногвардейскэ район) ыкIи «Асбир» (Адыгэкъал). Стадионым узэрэдэхьащтым ыпкIэ лъыптын ищыкIагъэп. ЕшIэгъур рагъэжьэным ыпэкIэ пенальтистхэм язэнэкъокъоу «Зэкъошныгъэм» икъэлэпчъэIут Iэгуао фыдадз» зыфиIорэр рагъэкIокIыщт. Зы­ныбжь илъэс 16-м нэмысыгъэхэр ащ хэлэжьэнхэ алъэкIыщт.