ШахматхэмкIэ зэIухыгъэ къэлэ зэнэкъокъу мы мафэхэм Мыекъуапэ щыкIуагъ. Хэгъэгу зэошхом хэлэжьагъэу, Урысыем изаслуженнэ юристэу, Адыгеим иочыл гъэшIуагъэу Владимир Бибичевым ишIэжь ар фэгъэхьыгъагъ. Псаоу къытхэтыгъэмэ, шышъхьэIум и 26-м ар илъэси 100 хъущтыгъ.

Ветераныр зышIэщтыгъэхэр, шахматхэмкIэ, спортым имастерхэр, ветеран организациехэм ахэтхэр, юридическэ общественностыр Iофтхьабзэм къекIолIагъэх. Ахэм шIуфэс къарихыгъ ветераным ипшъашъэу Светланэ.
— Сятэ шахмат клубым кIоныр сыдигъуи икIэсагъ, мы лъэныкъомкIэ сэнаущыгъэ хэлъэу зэнэкъокъоу зэхащэхэрэм ахэлажьэщтыгъ, текIоныгъэ къыдихыщтыгъ. Анахьэу игуапэу зэкIуа­лIэщтыгъэр Очылхэм япалатэ зэхищэрэ Iофтхьабзэхэр ары. Илъэс пчъагъэм Iоф зидишIэгъэ, иныбджэгъухэм ахэтыгъэу къызыкIожькIэ, ащ рыгушхощтыгъ, ягъэ­хъагъэхэр къытфиIуатэщтыгъ, — къы­Iуагъ бзылъфыгъэм.
Светлана Бибичевам нэужым ятэ ишахматхэр Очылхэм япалатэ ритыжьыгъэх. Шъолъырым иочылхэм афэгъэхьыгъэ музееу къызэIуахыщтым ар чIалъхьащт.
— ЦIыфым идунай тIо зэрихъожьырэр. Апэрэр – ыгу къытемыожьы, ятIонэрэр шIу зылъэгъухэрэм, ибын-унагъо, иныбджэгъухэм игугъу амышIыжьы зыхъукIэ ары. Владимир Павел ыкъор цIыф хьалэлэу, гукIэгъушхо хэлъэу, Iушэу тыгу къинагъ. Адыгеим иочыл лIэуж пчъагъэхэм ар ящысэтехыпIагъ. Фэгъэ­хьыгъэ гукъэкIыжьхэм тыгу агъэфабэ, тиIофшIэн хэдгъэхъонэу, сыд фэдэрэ къиныгъо тапэ къикIыгъэми, хэкIыпIэ фэдгъотынэу тыфещэ, — Светлана Бибичевам зифигъэзагъ Адыгеим и Очылхэм япалатэ ипрезидентэу Мамый Алый.
Мыщ фэдэ шахмат турнир зэхащэнымкIэ IэпыIэгъу къафэхъугъэхэ Мые­къопэ къэлэ администрацием ипащэу Геннадий Митрофановым, физическэ культурэмкIэ ыкIи спортымкIэ Комитетым ипащэхэм зэрафэразэр Мамый Алый къыIуагъ.
— Хэгъэгу зэошхом лIыхъужъныгъэ тидзэкIолIхэм щызэрахьагъ. ЩэIэгъэшхо къызхагъафэзэ ахэр пыим ебэныгъэх. Владимир Бибичевым къиныбэ ылъэ­гъугъ, хэгъэгум инеущырэ мафэ зыфэдэщтыр елъытыгъагъ заоу зыхэлэжьагъэм кIэухэу фэхъущтым. ЯлIыхъужъныгъэ ишIуагъэкIэ текIоныгъэр къыдахыгъ. Сталинградскэ заом ыкIи Орловскэ-Курскэ дугам щыкIуагъэм ахэлэжьагъ, — къыIуагъ Адыгеим иветеранхэм я Совет итхьаматэу Къоджэ Аслъан.
Мыекъопэ администрацием ыцIэкIэ къэзэрэугъоигъэхэм шIуфэс къарихыгъ физическэ культурэмкIэ ыкIи спортымкIэ къэлэ Комитетым ипащэ игуадзэу Игорь Бандуркиным. ШахматхэмкIэ зэнэкъокъур къэзэрэугъоигъэхэм ашIогъэшIэгъонынэу зэрэгугъэрэр къыIуагъ.
— Владимир Бибичевым ишIэжь фэгъэхьыгъэ турнирым изэхэщэн тэркIэ мэхьанэшхо иI. Мы спорт лъэпкъымкIэ хэхъоныгъэхэр тшIынхэм ащ иIахьышIу хэлъ. Непэрэ Iофтхьабзэм хэлажьэхэрэм афэдэу сэри Владимир Павел ыкъом шахмат сыдешIэу хъугъэ. ДжэгукIэ дахэмкIэ ар щысэтехыпIагъ. Гупшысэ ин хэлъэу шахмат ешIэщтыгъ, — игукъэ­кIыжьхэмкIэ ар къадэгощагъ.
Зэнэкъокъум шахматхэр зикIэсэ нэбгырэ 20 фэдиз хэлэжьагъ.
Турнирыр швейцарскэ шIыкIэм тетэу кIуагъэ. Арслан Рамазановым, Николай Удовиченкэм ыкIи Сергей Сифунда текIоныгъэ къыдахыгъ.
ИщыIэныгъэ гъогу
Владимир Бибичевыр шышъхьэIум и 26-м Саратовскэ шъолъырым ит къалэу Ершов къыщыхъугъ. Гурыт еджапIэр къыухыгъэ къодыеу 1941-рэ илъэсым ижъоныгъокIэ мазэ дзэ къулыкъум ­ащагъ, ащ лъыпытэу авиатехническэ еджапIэм чIэхьэгъагъ. Курсантэу ­1942-рэ илъэсым фронтым агъэкIуагъ. Сталинград дэжь апэрэ уIагъэр Владимир къыщытыращагъ. Ипсауныгъэ зызэтеуцожьым Орловскэ-Курскэ дугам минометчикэу къулыкъу щихьыгъ, нэужым отделением командирэу фашIыгъагъ. 1943-рэ илъэсым, шышъхьэIу мазэм Старый Оскол пэмычыжьэу уIэгъэ хьылъэ къыщытыращэгъагъ, ипсауныгъэ бэрэ зэтыригъэуцожьыгъ, сэкъатныгъэ иIэ хъугъэ.

1950-рэ илъэсым Саратовскэ юридическэ институтыр къыухыгъ. Нэужым прокуратурэ зэфэшъхьафхэм Iоф ащишIагъ. 1958-рэ илъэсым къыщегъэ­жьагъэу 2007-м нэс очылэу иIофшIэн пидзэжьыгъ, нэужым апшъэрэ еджапIэми щылэжьагъ.
Хэгъэгу зэошхом псэемыблэжьэу зэрэхэлэжьагъэм фэшI медальхэу «За оборону Сталинграда», «За отвагу», «За победу над Германией», «За воинскую доблесть» зыфиIохэрэр, Хэ­гъэгу зэошхом иорденэу апэрэ шъуашэ зиIэр къыфагъэшъошагъэх, IофшIэным иветеран. Урысые Федерацием изаслуженнэ юрист, «За верность адвокатскому долгу», «Адыгэ Республикэм иочыл ГъэшIуагъ» зыфиIохэрэр ищыIэныгъэ гъогукIэ къылэжьыгъэу Владимир Бибичевым идунай ыхъожьыгъ.
ДЕЛЭКЪО Анет.
Сурэтхэр авторым иех.