Гриппым пэуцужьырэ вакцинэм ихэлъхьан епхыгъэ урысые Iофтхьабзэр Iоныгъом рагъэжьагъ. Ар етIупыщыгъэу Адыгеим щылъэкIуатэ.

Ащ къыдыхэлъытагъэу, тыгъуасэ АР-м и Правительствэ зычIэт Унэм ыкIи муниципалитетхэм яадминистрациехэм ар ащызэхащагъ. Прививкэм ихэлъхьан епхыгъэ Iофтхьабзэм дырагъэштагъ депутатхэм, министрэхэм, комитетхэм япащэхэм, къулыкъу зэфэшъхьафхэм яIофышIэхэм. Вакцинэхэм ащыщэу «Флю-М» зыфиIорэр ахэм ахалъхьагъ.
Мы илъэсым гриппым пэуцужьырэ вакцинэр Адыгеим щыпсэурэ нэбгырэ мин 299-мэ ахалъхьанэу агъэнэфагъ, ащ щыщэу мин 66-р кIэлэцIыкIух.
Апэу вакцинэр зыхязыгъэлъхьагъэр АР-м и Къэралыгъо Совет – Хасэм и Тхьаматэу Владимир Нарожнэр ары. Ащ къызэрэхигъэщыгъэмкIэ, псауныгъэр къэухъумэгъэнымкIэ шъолъыр министерствэм мы Iофтхьабзэм изэхэщэн дэ­гъоу регъэкIокIы. Гриппым пэуцужьырэ вакцинэр республикэм щыпсэухэрэм игъом зыхарагъэлъхьаным, вирусхэм къахэкIырэ уз хьылъэхэм защаухъумэнхэм ар къыфэджагъ.

— Гриппыр псынкIэу зэпахырэ ыкIи зызыушъомбгъурэ узхэм ащыщ. ГухэкI нахь мышIэми, бэхэм мыр уз къызэрыкIоу алъытэ, ау ащ уз хьылъэхэр хэзыхыхэрэри, зидунай зыхъожьхэрэри къыхэкIых. Непэ УФ-м псауныгъэр къэ­ухъумэгъэнымкIэ и Министерствэ сымэджэгъу лъэхъаным къекIокIырэ штаммхэм апэуцужьын зылъэкIыщт вакцинэхэр къегъэхьазырых. Арышъ, республикэм щыпсэухэрэм зафэсэгъазэ, унагъохэмкIэ зэхэтэу привикэр зыхарагъэлъхьанэу, — хигъэунэфыкIыгъ Владимир Нарожнэм.
Вакцинэр зыхалъхьагъэхэм ащыщ псауныгъэр къэухъумэгъэнымкIэ министрэу Мэрэтыкъо Рустем ыкIи фина­нсхэмкIэ министрэу Виктор Орловыр.
— Пшъэрылъэу зыфэтшIыжьыгъэмкIэ, «коллективнэ иммунитет» щыIэ хъуным пае Адыгеим щыпсэурэ нэбгырэ мин 299-м (процент 60-м) гриппым пэуцужьырэ вакцинэр ахэтлъхьан фае. Мы уахътэм ехъулIэу мин 80 фэдизмэ привикэр афашIыгъ, ащ щыщэу мин 31-рэ фэдизыр кIэлэцIыкIух. Дгъэнэфэгъэ пчъагъэм вакцинэр захалъхьэкIэ, гриппым ти­шъолъыр зыкъыщиIэтыным ищынагъо щыIэщтэп, — къыIуагъ Мэрэтыкъо Рустем.
Шъугу къэдгъэкIыжьын, вакцинацием пае агъэфедэхэрэр Урысыем къыщашIыгъэ препаратхэу «Совигрипп» (валентни III-у зэхэт), «Ультрикс квадри»(валентни IV-у зэхэт), «Флю-М» зыфиIохэрэр ары. Мы уахътэм ехъулIэу хэлъхьагъу 135200-рэ Адыгеим къыIэкIэхьагъ.
Тишъолъыр иIэзапIэхэм IофшIэгъу мафэхэм прививкэр зыщахарагъэлъхьан алъэкIыщт. IофшIэпIэ купхэр зэхэтэу арагъэшIынэу фаехэмэ, Мыекъопэ къэ­лэ IэзапIэм зыфагъэзэн амал щыI. Джащ фэдэу ны-тыхэмкIэ Iэрыфэгъу хъунэу кIэлэцIыкIухэм апае вакцинациер кIэлэцIыкIу IыгъыпIэхэми, еджапIэхэми ащызэхащэ.
Гриппым зыщыуухъумэнымкIэ прививкэр амалышIухэм ащыщ. Вакцинэр икъоу республикэм IэкIэлъ, зэкIэми афикъущт.
Iэшъынэ Сусан.
Сурэтхэр: Iэшъынэ Аслъан.