Урысые Федерацием и Президент иунашъокIэ мы илъэсыр унагъом и Илъэсэу аштагъ. Ащ къыдыхэлъытагъэу Адыгеим щыпсэурэ унэгъо зэфэшъхьафхэм адэжь тэкIо, гущыIэгъу тафэхъу, тигъэзетеджэхэр нэIуасэ афэтэшIых.

Ахэм ащыщ Инэм щыпсэухэрэ Трэхъо Вячеславрэ Светланэрэ. Зэшъхьэгъусэхэр зызэдэпсэухэрэр илъэс 21-рэ хъугъэ, сабыиплI зэдапIу.
Светланэ непэ фэдэу ыгу къэкIыжьы нэIуасэ зэрэзэфэхъугъагъэхэр. Офицерхэм я Унэ щызэхащэгъэ Iофтхьабзэм ахэр апэрэу щызэрэлъэгъугъэх. Илъэс 16 ныIэп пшъэшъэжъыем ыныбжьыгъэр, гурыт сэнэхьат зыщарагъэгъотырэ колледжым щеджэщтыгъ. Вячеслав апшъэрэ еджапIэм чIэсыгъ. Еджэныр кIэлэ ныбжьыкIэм къызеухым, Щынджые ыгъэзэжьыгъ, яунагъокIэ нэшхъэй яIэти, илъэситIум Мыекъуапэ къакIозэ гум къыхихыгъэ пшъэшъэжъыер зэригъэлъэ­гъущтыгъ.
— Илъэс 21-рэ сыныбжьыгъэр Трахъохэм сакъызыхэхьэм. НэмыкI лъэпкъ сыкъызэрэхэкIы­гъэм пае зы мафи гуцаф сагъэшIыгъэп. СицIыкIугъом къыщегъэжьагъэу адыгэ пшъэшъэ­гъухэр сиIагъэх, ащ къыхэкIыкIэ шэн-хабзэхэр дэгъоу сшIэщтыгъэх. Апэрэ мафэм къыще­гъэжьагъэу ащыщ шъыпкъэ сыхъугъ, — еIо тигущыIэгъу.
Бзылъфыгъэм къызэриIуагъэмкIэ, яунагъо ылъапсэр зэгурыIоныгъэр ары. ШъхъэкIафэ зэфашIыжьэу, рэхьатныгъэ яунагъо илъэу мэпсэух, ясабыйхэр щыIэныгъэ гъогум тыращэх.
— Апэрэ илъэсхэм Щынджые тыдэсыгъ, ау IофшIэпIэ тэрэз зэрэтымыгъотыгъэм къыхэкIыкIэ Мыекъуапэ зыдгъэзагъ, нэужым Инэм тыкъэкIожьыгъ. 2008-рэ илъэсым унэ тшIи тычIэхьажьыгъ, — еIо Светланэ.
ТигущыIэгъу бысымгощэ хъупхъ, пщэрыхьаныр икIас. Лъэпкъым щыщ нахьыжъхэм акIырыплъызэ адыгэ шхынхэм яшIыни дэгъоу къызIэкIигъэхьагъ. Адыгэ щыпс-пIастэр иунагъо исхэм лъэшэу якIас. Зы адыгэ мэфэкI бламыгъэкIэу агъэмэфэкIы. Трахъохэм ялIэкъо къэбархэр ялъфыгъэхэм афаIуатэ. ЯунагъокIэ тарихъым мэхьанэ раты, ижъы­рэ лъэхъан фэдэу яунэ дэпкъхэм Iашэхэр апылъагъэх, пхъэкIычхэр илъых.
Вячеслав Адыгэ къэралыгъо университетыр 2001-рэ илъэсым къыухыгъ. ТарихъымкIэ ыкIи правэмкIэ кIэлэегъэ­джэ сэнэхьатыр зэригъэгъотыгъ. ИлъэситIо Щынджые дэт гурыт еджапIэм Iоф щишIагъ. 2006-рэ илъэсым психологием фэгъэхьыгъэ сэнэхьат Рязанскэ академием щызэригъэгъотыгъ, бзэджэшIагъэ зезыхьагъэхэр зыщагъэпщынэрэ колонием психологэу Iоф щишIагъ. 2008-рэ илъэсым къыщегъэжьагъэу 2013-м нэс психологическэ лабораторием ипащэу Iоф ышIагъ, ащ нэмыкI IэнатIэхэри ыIыгъыгъэх. Пенсием зэкIом, пчыхьэрэ зыщеджэхэрэ гъэсэныгъэ учреждениеу N 2-м тарихъымкIэ кIэлэегъаджэу Iоф щишIагъ, нэужым пащэ фэхъугъ, непэ къызнэсыгъэм ащ Iоф щешIэ. Ипшъэ­рылъхэр зэрифэшъуашэу зэригъэца­кIэхэрэр къэзыушыхьатырэ щытхъу тхылъ пчъагъэ Вячеслав иI.
Светланэ кIэлэцIыкIу IыгъыпIэм кIэлэпIоу илъэс 15 Iоф щишIагъ. Мы илъэ­сым игъэтхэпэ мазэ къыщегъэжьагъэу музыкальнэ пащэу мэлажьэ. ЫгукIэ культурэм, орэд къэIоным бзылъфыгъэр афэщагъ. КIэлэцIыкIухэм апае адыгэ къашъо зэхегъэуцо, иIофшIэн шIу елъэгъу.
Трахъохэм якIэлэцIыкIухэр лъэныкъо зэфэшъхьафхэмкIэ къахэщых. КIэлэ нахьыжъэу Алан Пшызэ къэралыгъо университетым щеджэ, инженер сэнэхьат зэрегъэгъоты. Атлетикэ хьылъэм пыль ыкIи спортым имастер хъунымкIэ кандидат. Ащ нэмыкIэу, пхъэм пкъыгъо зэфэшъхьафхэр хишIыкIынхэр икIас. Айдар я 7-рэ классым щеджэ, гъэхъэгъэшIухэр ешIых, диплом ыкIи щытхъу тхылъ пчъагъэ къыратыгъ, сурэтшIыныр икIас. Унэгъо ныбжьыкIэр пшъэшъэ­жъые фэягъ, 2017-рэ илъэсым ар къадэхъугъ. Амелие янэ фэдэу орэд дахэу къеIо ыкIи илъэси 3,5-рэ хъугъэу спорт, бальнэ ыкIи джырэ къашъохэр зыщарагъэшIэрэ кружокым макIо. Фестиваль зэ­фэшъхьафхэм ахэр ахэлажьэх, текIоныгъэхэр къыдахых. Алинэ кIэлэцIыкIу IыгъыпIэм макIо, ыныбжь емылъытыгъэу, сэнаущыгъэ хэлъэу зыкъегъэлъагъо.
Вячеславрэ Светланэрэ ясабыйхэр ягъусэхэу районым щызэхащэрэ Iоф­тхьабзэхэм ахэлэжьэнхэр якIас. БэмышIэу творческэ зэнэкъокъоу «Моя семья» зыфиIорэм яунагъо ятIонэрэ чIыпIэ къыщыдихыгъ. Инэм дэт культурэм и Унэ и Щытхъу тхылъ къафагъэшъо­шагъ.
ДЕЛЭКЪО Анет.
Сурэтыр: Iэшъынэ Аслъан.