Адыгэ Республикэм къэбар жъугъэмкIэ иамалхэм ялIыкIохэм апае пресс-зекIо УФ-м и Лъэпкъ гвардие и ГъэIорышIапIэу АР-м щыIэм зэхищагъ. Федеральнэ проектэу «УФ-м щыпсэурэ цIыфхэм япатриотическэ пIуныгъ» ыкIи къулыкъу Iофтхьабзэу «Урысые гвардием зы мафэрэ тыригъусэу» зыфиIохэрэм мыр къадыхэлъытагъ.

Гъэзетэу «Адыгэ макъэм» ыцIэкIэ пресс-зекIом хэлэжьагъэх Iэшъынэ Сусанэрэ Шэртэнэ Муратрэ.
Iофтхьабзэм пшъэрылъ шъхьа­Iэу иIэр Урысые гвардием къулыкъу щыпхьыным имэхьанэ зыкъегъэIэтыгъэныр, ныбжьыкIэхэм ядзэ-патриотическэ пIуныгъэкIэ ар щысэшIу афэхъуныр, зы мафэм къыкIоцI яIофшIэн журналистхэм нэрылъэгъу афэшIыгъэныр ары.
Пресс-зэIукIэм къыдыхэлъытагъэу Урысые гвардием ихэу­шъхьафыкIыгъэ подразделениехэу ОМОН «Фыщт» ыкIи СОБР «Ошъутен» зыфиIохэрэр зыдэщыIэ чIыпIэхэм тыкъыщыращэкIыгъ, ахэм яIофшIэн зытегъэ­псыхьагъэр ыкIи мы уахътэм хэушъхьафыкIыгъэ дзэ операцием пшъэрылъхэр зэрэщагъэцакIэхэрэр къытфаIотагъэх. Нэужым полигоным тызэхэтхэу тащагъ, медицинэ IэпыIэгъур уIагъэхэм зэрарагъэгъотырэр, пыир зыдэщыт чIыпIэр къыхагъэ­щышъ, зэрэзэхагъэтакъорэр пэшIорыгъэшъэу ОМОН-м икъулыкъушIэхэм къытагъэлъэгъугъ. Джащ фэдэу СОБР-м хэтхэм фэIазэхэу Iашэр зэрагъэIорышIэрэр, щэрыонымкIэ IэпэIэсэныгъэу яIэр зынэсырэр нэ­рылъэгъу тфэхъугъ.

Iофтхьабзэр пэублэ псалъэкIэ къызэIуихыгъ «Фыщтым» иотряд икомандирэу, полицием иполковникэу Юрий Юрченкэм. От­рядыр зэрэгъэпсыгъэм ар къытегущыIагъ.
— Урысые Iофтхьабзэу «Урысые гвардием имафэхэр» зыфиIорэм къыдыхэлъытагъэу тиIофшIэн нэIуасэ шъуфэтшIыщт. Шъо, журналистхэм, ар цIыфхэм алъыжъугъэIэсыжьынэу, анахьэу ныбжьыкIэхэм ядзэ-патриотическэ пIуныгъэкIэ мыщ ишIуагъэ якIынэу тыщэгугъы. ТиIофшIэн зэрэмыпсынкIэр гъэнэфагъэ, мыщ хэтхэр кIочIэшIухэу, пытагъэ зыхэлъых. Ахэм адакIоу тикъулыкъушIэхэм непэ чанэу ядзэ пшъэрылъхэр хэушъхьафыкIыгъэ дзэ операцием щагъэца­кIэх. Ащ пае мафэ къэс ухьа­зырынхэр рекIокIых, — къыхигъэщыгъ Юрий Юрченкэм.
Спецназым идзэ техникэ ыкIи ар зэрэуIэшыгъэм журналистхэм нахь благъэу нэIуасэ зыфа­шIыгъ. Щэр зыпхырымыкIырэ автомобилэу яIэхэм IофышIэхэм ащыщ къатегущыIагъ. Ом изытет ыкIи чIыпIэу зэрыфэхэрэм ялъытыгъэу ахэм бэ агъэцэкIэн алъэ­кIырэр. Къэгъэлъэгъоным хэ­фэнэу мыхъугъэ автомобилитIур зэпымыоу дзэ операциер зырагъэжьагъэм къыщыублагъэу ащ щыIэх. Ахэр яамалхэмкIэ мыд­рэхэм атекIых. Сэ сшъхьэкIэ автомобильхэм ащыщ ситIыс­хьагъ, чIым лъагэу теIэтыкIы­гъэу пстэуми укъызэрахаплъэрэр сыгу рихьыгъ.

Джащ фэдэу Iэшэ лъэпкъ зэфэшъхьафэу яIэхэм (щэхэр арымылъхэу) татеIэбэн амал тиIагъ. Ахэм ащыщых Калашниковым иавтомат, гранатометыр, карабиныр, РПГ-р, пулеметэу «Кордыр», къэзыбыбыхьэрэ ап­паратхэр.
Дзэ щэрыуапIэм тызэкIом, нахь игъэкIотыгъэу яIофшIэн нэрылъэгъу къытфэхъугъ. Журналистхэр дзэкIолIхэм ачIыпIэ итхэ фэдэу яшъуашэхэр зыща­лъэн­хэ, апэрэ медицинэ IэпыIэгъур арагъэгъотын амал яIагъ.
КъауIагъэм апэрэ медицинэ IэпыIэгъур зэребгъэгъотыщтыр, лъыр зэребгъэубытыщтыр, ащкIэ бгъэфедэщт пкъыгъохэр санитар инструкторым игъэкIотыгъэу къыIотагъэх. Медицинэ IэпыIэгъур игъом ебгъэгъотыным цIы­фым ищыIэныгъэкIэ мэхьанэшхо зэриIэр, лъынтфэ зэпычыгъэр нэгъэупIэпIэгъу 20-м къыкIоцI зэпыппхыкIын зэрэфаер инструк­то­рым къыхигъэщыгъэх. КъулыкъушIэхэр зыдэкIощтхэм елъытыгъэу аптечкэ зэфэшъхьафхэр зыдаштэх, килограмми 3 — 4 яхьылъагъ. ЗэкIэ хэушъхьафыкIыгъэ шъуашэу ащыгъыр килограмм 30 мэхъу.
СшIогъэшIэгъонэу къыщыслъэ­гъугъэхэм ащыщ «пыим» ипытапIэ къыхагъэщи, Iэшэ зэфэ­шъхьафхэр ыкIи къэзыбыбыхьэрэ аппаратхэр агъэфедэхэзэ ар «зэраштагъэр». Щэрыон макъэ­хэри инхэу, сэпэ Iугъори ашъхьа­рихэу щытыгъ, сахэтым фэдэу къысщыхъугъ.
КIэух зэфэхьысыжь полковникэу Юрий Юрченкэм къы­шIыгъ.
— ЧIыпIэ зэфэшъхьафэу тызэрыфэн ылъэкIыщтхэм ялъытыгъэу хэушъхьафыкIыгъэ подразделением къулыкъу щызыхьы­хэрэм зэпымыоу ухьазырынхэр тэкIух. Ащ уигъэпшъынэу е уезэщынэу щытэп. Мыщ фэдэ тренировкэхэм яшIуагъэкIэ тиотряд зыч-зыпчэгъоу, механизмэ гъэпсыгъэм фэдэу ипшъэрылъхэр зэшIуихынхэ елъэкIы, — хигъэу­нэфыкIыгъ отрядым ипащэ.
Iэшъынэ Сусан.
Сурэтхэр: Шэртэнэ Мурат, Урысые гвардиер.