«Урысыем итыгъэкъокIыпIэ Къыбл» зыфиIорэ зекIо гъогууанэм дэлажьэхэрэм зекIоным ылъэныкъокIэ Адыгеим амалэу иIэхэр зэрагъэшIагъэх. Компаниеу «ПроГород» ыкIи проектнэ-ушэтэкIо гупчэу «Картфондым» ялIыкIохэр республикэм щыIагъэх. «Урысыем итыгъэкъокIыпIэ Къыбл» зыцIэ гъогууанэм ипхырыщынкIэ IофшIэнхэм ар яятIонэрэ едзыгъу.

Апэрэ мафэм культурнэ кIэнхэм якъэухъу­мэнрэ ыкIи ягъэфедэнрэкIэ АР-м и ГъэIорышIапIэ ипащэу ЦIыпIынэ Рустем, муниципалитетхэм япащэхэм хьакIэхэр ягъусэхэу «Псыхъоу Пшызэ исэмэгубгъукIэ» заджэхэрэ зекIо чIы­налъэм нэIуасэ зыфашIыгъ. Хы ШIуцIэ Iушъом зыщагъэпсэфынэу кIохэрэм, гъунэгъу шъолъырхэм къарыкIыхэрэм лъэпкъ, археологическэ, пцэжъыеешэн- шэкIон, мэкъумэщ зекIонхэм гъогубгъум зыщягъэушъомбгъугъэнымкIэ чIыпIэм икъэкIуапIэхэр зыфэдэхэр агъэнэфагъэх.
ЯтIонэрэ мафэм лIыкIо купым хэтхэм зигугъу тшIырэ зекIо гъогууанэм иапэрэ едзыгъо изэфэхьысыжьхэр Мыекъуапэ шъхьэихыгъэ къыщашIыгъэх. Ащ хэлэ­жьагъэх АР-м зекIонымрэ зыгъэпсэфыпIэ чIыпIэхэмрэкIэ и Комитет итхьаматэ, районхэм ялIыкIохэр. ЗэхэгущыIэжьым зыдэлэжьэщтхэ лъэныкъуитIур щагъэнэфагъ: проектхэу «Псыхъоу Пшызэ исэмэгубгъурэ» «Къушъхьэпэ чIына­лъэмрэ». Къушъхьэлъэ Адыгеим хабзэ хъугъэ зекIо лъэныкъохэм зыщаушъомбгъун фаеу къыхагъэщыгъ: чIыопс-экологическэ ыкIи спортивнэ зекIонхэр. ГугъэпIэшIухэр къэзытынэу агъэнэфагъэх лъэпкъ, археологическэ зекIонхэр.
Джащ фэдэу компаниеу «ПроГород» ыкIи проектнэ-ушэтэкIо гупчэу «Картфондым» ялIыкIохэр Адыгеим изекIо чIыпIэхэу псэупIэу Хьаджыкъо, Дахъо, Гъозэрыплъэ адэхьагъэх, нэIуасэ зафашIыгъ.
ЗекIо гъогуонакIэр «ЗекIонымрэ хьакIэпэгъокIынымрэ» зыцIэ лъэпкъ проектым къыдыхэлъытагъэу, УФ-м экономикэ хэхъоныгъэмкIэ и Министерствэ икIэщакIоу дэлажьэх. Адыгеим фэшъхьафэу Ростов хэкумрэ Пшызэ шъолъыррэ ащ хэлажьэх.
Анцокъо Ирин.
Сурэтыр: АР-м зекIонымрэ зыгъэпсэфыпIэ чIыпIэхэмрэкIэ и Комитет ителеграм-нэкIубгъу.