ФутболымкIэ Урысыем ихэшыпыкIыгъэ командэ хэтэу, клубэу «Краснодар» иешIакIоу Никита Кривцовыр Адыгэ къэралыгъо университетым физическэ культурэмкIэ ыкIи дзюдомкIэ и Институт ибакалавриат иапэрэ курс аштагъ. Ащ Мыекъуапэ нэIуасэ зыфишIыгъ ыкIи еджэным фэхьазыр.

— Краснодар елъытыгъэмэ, Мыекъуапэ бэкIэ нахь гупсэф. Такъикъ 40-кIэ къушъхьэхэм уанэ­сыщт. Ащ дакIоу сызычIэхьэгъэ апшъэрэ еджапIэр шэпхъэшIухэм адиштэу зэтегъэпсыхьагъ, — къы­Iуагъ спортсмен ныбжьыкIэм.
Никитэ очнэ-заочнэ шIыкIэм тетэу гъэсэныгъэ зэригъэгъотыщт. Къэралыгъом ихэшыпыкIыгъэ командэ ыкIи «Краснодар» зэращешIэрэм, ащ охътабэ зэрихьырэм къахэкIэу унэе егъэджэн программэ фызэхагъэуцуагъ. Ащ къыкIэлъэIугъ спортсменыр зыгъасэу, клубэу «Краснодар» игенеральнэ пащэ игуадзэу Хьакъунэ Нурбый.
— ФутболымкIэ Дунэе федерацием тренерэу лицензие къыритыным фэшI ащ фытегъэпсыхьэгъэ сэнэхьат Никитэ зэригъэгъо­тын фае. АКъУ-м физическэ культурэмкIэ ыкIи дзюдомкIэ и Институт ащ къыгъэнэфэрэ шап­хъэхэм адештэ. КIэлакIэм къыхихыгъэ апшъэрэ еджапIэм Iут кIэлэегъаджэхэм шIуагъэ къэзытыщт унэе программэ фызэхагъэ­уцонэу, ащ зэфэхьысыжь дэгъу­хэр фэхъунхэу тыщэгугъы, — къы­Iуагъ Хьакъунэ Нурбый.
Никита Кривцовыр шышъхьэIум и 18-м, 2002-рэ илъэсым Нижегородскэ хэкум икъалэу Дзержинскэ къыщыхъугъ, джырэ уахътэм командэу «Краснодар» хэт. ­2021-рэ илъэсым Урысыем иныбжьыкIэ командэ рагъэблэгъагъ. ШэкIогъум и 20-м, 2023-рэ илъэ­сым къэралыгъом ихэшыпыкIыгъэ командэ Кубэм дыриIэгъэ ­ныбджэгъу зэIукIэгъум ар хэлэжьагъ, къэлапчъэм зэ Iэгуаор дидзагъ.
Адыгэ къэралыгъо универ­ситетым ипресс-къулыкъу