Адыгеим и ЛIышъхьэу КъумпIыл Мурат Росфинмониторингым Къыблэ Федеральнэ шъолъырымкIэ и ГъэIорышIапIэ ипащэу Максим Ходоровскэм IофшIэгъу зэIукIэгъу дыриIагъ.

Республикэм мылъкум ылъэныкъокIэ ищынэгъончъагъэ нахь шIуагъэ къегъэтыгъэным, мылъкум епхыгъэ Iофтхьабзэхэу хэб­зэнчъэу зэрахьэхэрэм апэуцужьыгъэным япхыгъэ Iофыгъо­хэм ахэр атегущыIагъэх.

«Нахьыпэм фэдэу Адыгеир мылъкум пэщэныгъэ дызехьэгъэ­нымкIэ ыкIи бюджетым къыди­лъытэрэ лъэныкъохэм икъоу цIыф­хэр зэкIэ ащыгъэгъозэгъэнхэм зынаIэ лъэшэу атезгъэтырэ шъолъырэу къэнэжьы. Ренэу тынаIэ зытедгъэтырэр бюджет къэкIуапIэхэр зыфытегъэпсыхьэгъэхэ лъэныкъохэм анэмыкIхэм апэIуамыгъэхьаныр, шэпхъэ гъэнэфагъэу щыIэхэр укъуагъэ мыхъунхэр ары.
«Мы IофшIэныр нахьышIоу зэхэщэгъэным пае Росфинмони­торингым тыдэлэжьэным тифедэ хэлъ ыкIи Максим Ходоровскэм тыфэраз тишъолъыр ынаIэ къызэрэтыригъэтырэм пае. ТапэкIи Iофтхьабзэхэу зэдызэшIотхыхэ­рэм зядгъэушъомбгъущт, а лъэ­ныкъомкIэ амалыкIэхэр дгъэфе­дэщтых ыкIи Iофыгъо гъэнэфагъэхэм тызэгъусэу тызэдяусэщт. Мылъкум игъэзекIонкIэ шэпхъэ гъэнэфагъэу щыIэхэм икъоу цIыфхэр ащыгъэгъозэгъэнхэмкIэ, мылъкум епхыгъэ бзэджэшIагъэ­хэм гъогур афыпыбзыкIыгъэнымкIэ игъоу алъэгъурэ Iофтхьабзэхэм тэри адетэгъаштэ», — къыIуагъ Адыгеим и ЛIышъхьэ.