ТхэкIо цIэрыIоу, адыгэ литературэм илъэпсэхэщэу КIэрэщэ Тембот къызыхъугъэр илъэси 122-рэ зэрэхъугъэм фэгъэхьыгъэ Iофтхьабзэ литературнэ музеим инаучнэ IофышIэу Хъот Саидэ зэхищагъ. АР-м и Лъэпкъ музей ар щыкIуагъ.

Адыгэ шэн-хабзэхэр тхакIом ипроизведениехэм къызэращигъэлъэгъуагъэм къэзэрэугъоигъэхэр тегущыIагъэх. ШIэныгъэлэжьхэу Агъыржьанэкъо Симхъан, ЖакIэмыкъо Зарим, ШэкIо Мирэ, Тыгъужъ Гощсымэ, Атэжьахьэ Сайхьат, Тэу Нуриет, Барцо Рустам, Сихъу СултIан ыкIи нэмыкIхэри ягупшысэхэмкIэ зэIукIэм къекIолIагъэхэм къадэгощагъэх.
КIэрэщэ Тембот адыгэ литературэм Iофышхоу щилэжьыгъэр, тхакIом ищыIэныгъэ гъогу зыфэдагъэр Хъот Саидэ къыIотагъ. Этнографиер ащ зэриугъоижьыгъэр, зэрэзэригъэкIужьыгъэр, адыгэ лъэпкъым ихабзэхэм, икультурэ къа­рыкIуагъэр зэрэзэригъэшIагъэр, ахэр ухъумэгъэнхэм зэрэфэлэжьагъэр къыхигъэщыгъ.
КIэращэм ипроизведениехэмкIэ адыгэ шэн-хабзэхэр, шIыкIэ-гъэпсыкIэхэр, адыгэ щыIакIэр, лъэпкъым итарихъ хэти зэрегъашIэ, джарэу ахэр купкI зиIэх, гъэшIэгъоных, еджэгъошIух. ШIэныгъэлэжьэу ШэкIо Мирэ ныбжьыкIэхэр ­лъэпкъ литературэм нахь пэблагъэ хъунхэм къыфэджагъ. Адыгабзэм иамалхэр къыз­фигъэфедэзэ, илъэпкъ шэн-хабзэхэр ыгъэлъапIэзэ тхэгъэ КIэрэщэ Тембот адыгэ литературэм ибаиныгъэ зэрэхигъэхъуагъэр къыIотагъ, ащ итхыгъэхэр гъашIэм зэрэхэмыкIокIэщтхэр къыкIигъэтхъыгъ.
— КIэрэщэ Тембот ытхыгъэ новеллэу «Адыгэмэ анахь ящыкIэгъэ пкъыгъуищым итхыд» зыфиIорэм исатыр пэпчъ адыгэ хабзэр къыреIотыкIы, нэкIубгъо пэпчъ лъэпкъ гупшысэр хэолъагъо. Сыд
фэдэха а пкъыгъуищыр шъуIоу шъу­къыкIэупчIэмэ — IэшэшIу, шъузышIу, шышIу. НыбжьыкIэхэр ащ еджэхэмэ сшIоигъу, — еIо гуманитар ушэтынхэмкIэ Адыгэ республикэ институтым инаучнэ IофышIэ ныбжьыкIэу Барцо Рустам.
«ГущыIэ зэгъусэ зэпхыгъэхэм тхакIом итхыгъэхэм чIыпIэшхо щаубыты, — къы­Iотагъ Тыгъужъ Гощсымэ. — Аужырэ илъэси 10-м адыгабзэм фразеологизмэр нахь зэригъашIэ хъугъэ. КIэращэм ипроизведениехэр ахэмкIэ баи, анахьэу «Насыпым игъогу» зыфиIорэр».
ШIэныгъэлэжьэу Атэжьахьэ Сайхьат къызэриIуагъэмкIэ, «Партизан шыпхъу» зыфиIорэр жэбзэ дахэкIэ КIэращэм ытхыгъ.
ЦIыфым игулъытэ къагъэущэу, узыгъэгупшысэрэ кIуачIэрэ акъылрэкIэ тхакIом ипроизведениехэр ушъагъэх. КIэрэщэ Тембот лъэуж мыкIодыжьынэу къыгъэнагъэр ренэу тигъого­гъущт.
Джащ фэдэу Адыгэ кIэлэегъэджэ колледжэу Андырхъое Хъусенэ ыцIэ зыхьырэм истудентхэри зэхахьэм хэлэжьагъэх.