Урысые Федерацием и Следственнэ комитет транспортымкIэ и КъохьэпIэ шъолъыр следственнэ гъэIорышIапIэ иегъэджэн Къыблэ таможеннэ гъэIорышIапIэм икинологическэ гупчэ зэрэщыкIорэм Адыгеим и ЛIышъхьэу КъумпIыл Мурат тыгъуасэ зыщигъэгъозагъ.

Iофтхьабзэм хэлэжьагъэх Урысыем и Следственнэ комитет транспортымкIэ и КъохьэпIэ шъолъыр следственнэ гъэ­IорышIапIэ ипащэу Павел Выменец, ащ игуадзэу Сергей Сумароковыр, Урысыем и Следственнэ комитет Адыгэ Рес­публикэмкIэ иследственнэ гъэIорышIапIэ ипащэу Василий Лариныр.
Егъэджэныр зэхащэнэу къырагъэблэгъагъэх ошъогу транспортымкIэ федеральнэ агентствэм и Къыблэ шъолъыр чIыпIэ гъэIорышIапIэ (Росавиацием), Урысыем хэгъэгу кIоцI IофхэмкIэ и Министерствэ Къыблэ федеральнэ шъо­лъырымкIэ и ГъэIорышIапIэ иэксперт-криминалистическэ гупчэ, Урысыем и МЧС Краснодар краимкIэ и ГъэIорышIэпIэ шъхьаIэ къухьэ цIыкIухэмкIэ и Къэралыгъо инспекцие, зэIухыгъэ Iахьзэхэлъ обществэу «РЖД»-м Темыр КавказымкIэ и Къутамэ ялIыкIохэр.
АР-м и ЛIышъхьэ егъэджэным щагъэ­федэгъэ амалхэм нэIуасэ зафишIыгъ, ошIэ-дэмышIэ тхьамыкIагъохэм къыз­дахьырэ гумэкIыгъохэм ядэгъэзыжьын, бзэджэшIэгъэ лъэпкъ заулэмэ язэхэфын зэрэфэхьазырхэм уасэ къыфишIыгъ.
Авиацие, псы, мэшIокугъогу транспортым ошIэ-дэмышIэ тхьамыкIагъохэр къызехъулIэкIэ зэрэзекIонхэ фаер чIыпIэ гъэнэфагъэм къыщагъэлъэгъуагъ.
ГущыIэм пае, аварие къызэхъулIэгъэ къухьэлъатэр къетIысэхы зыхъукIэ, къу­хьитIур зызэутэкIыкIэ, цIыфхэр зэрэзэращэрэ мэшIокум пэблагъэу къагъэорэ пкъыкъо къызыщагъотыкIэ зэрэзекIонхэ фэе шIыкIэр егъэджэным хэлэжьагъэхэм къагъэлъэгъуагъ.

БзэджэшIэгъэ лъэпкъ заулэмэ язэхэфынкIэ, ошъогу, мэшIокугъогу, псы транспортэу аварие хъугъэхэм, тер­рористическэ актхэр зыщызэрахьэрэ чIыпIэхэм якъэплъыхьанкIэ пшъэрылъэу къафагъэуцугъэхэр егъэджэным хэлэжьагъэхэм агъэцэкIагъэх.
АР-м и ЛIышъхьэу КъумпIыл Муратрэ Урысые Федерацием и Следственнэ комитет транспортымкIэ и КъохьэпIэ шъолъыр следственнэ гъэIорышIапIэ ипащэу Павел Выменецрэ ­къыхагъэщыгъ ошIэ-дэмышIэ тхьамыкIагъохэр къэхъунхэм, террористическэ актхэр зэрахьанхэм ищынагъо щыIэ зэхъум къулыкъу пстэуми зэдырагъаштэу Iоф ­зэрашIагъэр. Къулыкъухэм язэдэлэжьэныгъэ тапэкIи нахь агъэлъэшын зэрэфаем Адыгеим и ЛIышъхьэ шъхьафэу анаIэ тыраригъэ­дзагъ.
«Террористическэ актхэр зэрамыхьанхэм, цIыфхэр ахэм ащыухъумэгъэнхэм япхыгъэ Iофыгъохэм лъэшэу гъунэ алъы­тэфы. Пшъэрылъэу яIэхэр блэкI имыIэу агъэцакIэхэзэ, аIэ зэкIэдзагъэу къулыкъухэр зэдэлэжьэнхэ, зэдырагъаштэу зекIонхэ фае. ЦIыфхэмрэ чIыпIэхэмрэ яухъумэн амалэу яIэр зэкIэ рахьылIэн, къулыкъухэм язэдэлэжьэныгъэ нахь агъэпытэн фае. Пащэ пэпчъ IофшIэнымкIэ лъэныкъо шъхьаIэр тэрэзэу къыхигъэщынэу щыт. Щынэгъончъагъэр ары мэхьэнэ шъхьаIэ зиIэр», — къыIуагъ АР-м и ЛIышъхьэ.
АР-м и ЛIышъхьэ ипресс-къулыкъу къытыгъэ къэбархэмкIэ
ЛIышэ Саныет.