Адыгэ шъуашэм и Мафэ фэгъэхьыгъэ мэфэкI Iофтхьабзэр Пушкиным и Унэ щыкIуагъ. Общественнэ движениеу «Адыгэ Хасэм», АР-м иминистрэхэм я Кабинет ялIыкIохэр, общественностыр, динлэжьхэр, еджэкIо ныбжьыкIэхэр зэхахьэм хэлэжьагъэх. Iофтхьабзэр зэрищагъ АР-м изаслуженнэ журналистэу ТIэшъу Светланэ.

МэфэкIым ипэублэм Адыгэ Респуб­ликэм идизайнер пэрытхэм ашIыгъэ адыгэ шъуашэхэр къагъэлъэгъуагъэх. Модельерхэу Мыгу Рузанэ, Пэрэныкъо Рузанэ, Блэгъожъ Зулифа, Акъущ Фатимэ, ХъокIо Рузанэ ыкIи нэмыкI IэпэIасэхэм яIофшIагъэхэр къэгъэлъэгъоным хагъэхьагъэх.
Нэбгырэ пэпчъ иIофшIагъэ ыпсэ щыщ хилъхьагъ, гъэшIэрэ лъэпкъ шъуашэр непэрэ уахътэм зэрэдырагъэштэщтым пылъыгъэх. Адыгэ саер шIыкIэ зэфэшъхьафыбэу къагъэлъэгъон алъэкIыгъ. Модельерхэм яIофшIагъэхэр адыгэ лъэп­къым фагъэхьыгъ, ащ итарихъ, лIы­хъужъныгъэу зэрихьагъэр къырагъэлъэ­гъукIыгъ.
Адыгеим искусствэхэмкIэ иIоф­ы­шIэхэм къатыгъэ концертыр ащ къыкIэ­лъыкIуагъ. Лъэпкъ орэдхэмкIэ ыкIи къашъомкIэ къэралыгъо ансамблэхэу «Ислъамыем», «Зэрдахэм», «Абреки», «Ащэмэзым», «Мыекъуапэ инэфылъэ­хэм», «Насыпым», орэдыIохэу Даутэ Сусаннэ, Цышэ Зарэ мэфэкI Iофтхьаб­зэм хэлажьэхэрэр агъэ­гушIуагъэх.
Адыгэ шъуашэм хэхьэрэ пкъыгъохэм афэгъэхьыгъэу кIэкIэу Iофтхьабзэм къы­щиIотагъ ТIэшъу Светланэ.

Непи хъулъфыгъэ ыкIи бзылъфыгъэ адыгэ шъуашэхэр тищыIэныгъэ изы lахьых. Адыгэ джэгухэм, унэгъо мэфэкIхэм ыкIи нэмыкI зэхахьэхэм ахэр ащыплъэгъун плъэкIыщт. Тятэжъ пIашъэ­хэм яхэбзэ шIагъохэр зэрифэшъуашэу лъызыгъэкIуатэхэу, адыгэ лъэпкъ шъуа­шэр зэлъязыгъэшIэрэ IэпэIасэхэм Iофышхо агъэцакIэ. Уилъэпкъ шIу плъэгъун, уитарихърэ уикультурэрэ къэу­ухъу­мэнхэ зэрэфаем ятамыгъэу адыгэ шъуашэр ренэу щэрэт!
Пушкиным и Унэ ыIупэ щызэхащэгъэ адыгэ джэгумкIэ мэфэкIыр аухыгъ.
Лъэпшъыкъо Фатим.
Сурэтхэр: Iэшъынэ Аслъан.