Я IX-рэ Урысые фестивалэу «IофшIэным ыкIи зыкъэухъумэжьыным сафэхьазыр» зыфиIорэр непэ Ялтэ щырагъэжьэщт ыкIи чъэпыогъум и 8-м нэс кIощт. Гъэсэныгъэ организациехэм ащеджэхэрэр лагерэу «Артек» щызэIукIэщтых, Iофтхьабзэу «Тайны золотой параллели» хэлэжьэщтых.

Лъэпкъ проектэу «Демографием» къыдыхэлъытэгъэ федеральнэ проектэу «Спортыр – щыIэныгъэм ишапхъ» зыфиIорэм игъэцэкIэн ар епхыгъ. «Артекым» рагъэблэгъэнхэм ыпэкIэ кIэлэ­еджакIохэм муниципальнэ ыкIи шъолъыр хэшыпыкIын едзыгъохэр акIугъэх. Урысыем щыпсэурэ нэбгырэ мин 200-м ехъумэ лъэныкъо зэфэшъхьафхэмкIэ заушэтыгъ: къызэдэчъагъэх, есыгъэх, щэрыуагъэх. Ахэм язэфэхьысыжьхэмкIэ, къэралыгъом ишъолъыр 47-мэ ялIыкIо 371-рэ финал уцугъом ихьагъ.
Адыгэ Республикэр кIэлэеджэкIуи 8-мэ къагъэлъагъо. Командэм хэхьагъэх: Даниил Сосновскэр, Арсений Третьяк-Боб­ровыр, Камилла Стребковар, Полина Титоренкэр, Ирина Власюковар, Владислав Агаджаньян, Мария Годовниковар ыкIи Матвей Петровыр. Мыхэм зэкIэми хэшыпыкIын едзыгъом дэгъу дэдэу зыкъыщагъэлъэгъуагъ. КIэлэцIыкIухэм ащыщхэр ятIонэрэу фес­тивалым хэлажьэх.
Мы илъэсым кIэлэеджакIохэр лъэныкъо зэфэшъхьафхэмкIэ зэнэкъокъущтых, шапхъэхэр атыщ­тых, яухьазырыныгъэ къагъэлъэгъощт. Джащ фэдэу ахэр мас­тер-классхэм ахэлэжьэщтых.
Фестивалым икъызэIухын фэгъэхьыгъэ мэфэкI зэхахьэр чъэпыогъум и 1-м рагъэкIокIыщт. ТекIоныгъэр къыдэзыхыгъэхэр агъэшIощтых ыкIи Iофтхьабзэр зэфашIыжьыщт чъэпыогъум и 8-м.
Чемпион хъугъэхэм ыкIи хагъэунэфыкIырэ чIыпIэхэр къыдэзыхыгъэхэм УФ-м спортымкIэ и Министерствэ икубокхэр ыкIи имедальхэр афагъэшъошэщт. Джащ фэдэу зэхэщакIохэм къагъэхьазырыгъэ дипломхэр ыкIи шIухьафтынхэр, командэхэм язэнэкъокъу текIоныгъэр къыщыдэзыхыгъэм фестивалым и Кубок аратыщт.