Лъэс зекIонымкIэ Урысыем ичемпионат рагъэжьагъ. Мыщ икIэщакIох УФ-м спортымкIэ и Министерствэрэ общественнэ организациеу «Лига здоровья нации» зыфиIорэмрэ.

Джырэ уахътэм ехъулIэу къэралыгъом ишъолъыр зэфэшъхьафхэм якомандэ 2000-м ехъумэ зэнэкъокъум хэлэжьэнхэу зарагъэтхыгъ. Командэ пэпчъ нэбгырэ 20-м щегъэжьагъэу 50-м нэс хэт. Адыгеим икъэлэ шъхьаIэ къэзыгъэлъагъорэр «Мыекъуапэ 01-р» ары.
Iоныгъом и 26-м щегъэжьагъэу чъэпыогъум и 10-м нэс пэшIорыгъэшъ едзыгъор макIо. Чъэпыогъум и 15-м щыублагъэу уцугъо шъхьаIэр рагъэжьэщт. Ащ хэлажьэхэрэм мафэм лъэбэкъу мин 25-рэ къакIун фае. Анахь рейтингышхо зиIэ командэр ары текIоныгъэр къыдэзыхыщтыр. Командэхэм ярейтинг зэфэдиз хъумэ, апэрэ чIыпIэр зыфагъэшъошэщтыр нахьыбэ зыхэтыр ары.
Зэнэкъокъум зыщызыушэтыхэрэм зэкIэми электроннэ сертификатхэр аратыщт. Едзыгъо шъхьаIэм ащытекIохэрэм кубокхэр, медальхэр, бгъэхалъхьэхэр, дипломхэр афагъэшъо­шэщт.
Адыгеим икомандэ блэкIыгъэ чемпионатым ящэнэрэ чIыпIэр къыщыдихыгъагъ. Арышъ, Мые­къуапэ илIыкIохэм джыри ащ нахь гъэхъэгъэшIухэр ашIынхэу афэтэIо.