Партиеу «Единэ Россием» иобщественнэ штаб тыгъуасэ гуфэкIо купэу «Сетевой плацдарм 01» зыфиIорэм хэтхэр къырагъэблэгъагъэх.

ГуфэкIо купыр зызэхащагъэр мы мафэхэм илъэс хъугъэ. АшIэрэ Iофым мэхьанэ ин зэриIэр, хэушъхьафыкIыгъэ дзэ операцием хэлажьэхэрэм апае зыухъумэхэрэ хъытыухэу ашIыхэрэм яшIуагъэ къызэрэкIорэр араIуагъ, рэзэныгъэ тхылъхэр афагъэшъошагъэх.
— ХэушъхьафыкIыгъэ дзэ операцием хэтхэм апае Iофышхо шъогъэцакIэ, агу къэшъоIэты, ащ мэхьанэшхо иI. АщкIэ лъэшэу тышъуфэраз. ТидзэкIолIхэм шъуа­къоуцуагъэу шъуишIуагъэ яшъогъэ­кIы. ТекIоныгъэ къызэрэдахыщтыми тицыхьэ телъ, — къыIуагъ партиеу «Единэ Россием» и Адыгэ шъолъыр къутамэ игъэцэкIэкIо комитет ипащэу АфэшIэгъо Рэмэзан.
ГуфэкIо купэу «Сетевой плацдарм 01» зыфиIорэр зызэхащагъэр Iоныгъом и 19-м илъэс хъугъэ. Непэрэ мафэм ащ нэбгырэ 300 фэдиз хэт, ахэр нахьыбэмкIэ зыныбжь хэкIотагъэх. Хъытыухэм яблэн чанэу хэлэжьэрэ нэбгырэ 25-рэ къыхагъэщыгъ, ахэр агъэшIуагъэх.
— Илъэсым къыкIоцI зыухъумэхэрэ хъытыу миным ехъу тшIыгъэ, ащ хэ­хьащтхэр къызэрытщэфыщт сомэ миллиони 2 фэдиз къэтыугъоигъ. Мыекъуа­пэ щыпсэухэрэм ямызакъоу, гъунэгъу районхэми бзылъфыгъэхэр къарэкIых. Купым хэтхэм агу къадеIэу, ом изытет емылъытыгъэу, мафэ къэс къэкIох, Iоф ашIэ. Нэбгырэ пэпчъ пшъэрылъ гъэнэфагъэ иI, пстэуми акIуачIэ халъхьэзэ яIофшIэн агъэцакIэ. ТидзэкIолIхэм текIоныгъэ къыдахынымкIэ IэпыIэгъу тафэхъу­нэу тыфай. Зыгъэпсэфыгъо уахътэ яIэ зыхъукIэ ахэр тадэжь къэкIох, къызэрэтфэразэхэр къытаIо. ТэркIэ ащ нахь лъапIэ щыIэп, — къыIуагъ купым ипащэу Алена Кутимскаям.
ДЕЛЭКЪО Анет.
Сурэтыр авторым ий.