УФ-м и Правительствэ и Тхьаматэ игуадзэу Дмитрий Чернышенкэмрэ Адыгэ Республикэм и ЛIышъхьэу КъумпIыл Муратрэ зэIукIэгъу тыгъуасэ Москва щызэдыряIагъ. Гъэсэныгъэм, шIэныгъэм, ныбжьыкIэ политикэм, спортым, зекIоным респуб­ликэм зыщягъэушъомбгъугъэным епхыгъэ Iофыгъохэм ар афэгъэхьыгъагъ.

Джащ фэдэу Адыгеим и ЛIышъхьэ проект шъхьаIэхэр зэрагъэцакIэхэрэм, республикэм и Мафэу илъэс къэс чъэпыогъум и 5-м хагъэунэфыкIырэм гъэ­хъагъэхэр иIэхэу АР-р къызэрекIолIа­гъэм афэгъэхьыгъэу Дмитрий Чернышенкэм къыфиIотагъ.
«Президентэу Владимир Путиным къыгъэуцугъэ пшъэрылъхэм ащыщ нэбгырэ пэпчъ иамалхэм зыкъызэIуягъэхыгъэныр, зэчыишIоу, и Хэгъэгу шIу ылъэгъоу, щыIэныгъэм къыщыхъухэрэмкIэ пшъэдэкIыжь зэрихьырэр къыгурыIоу ар пIугъэныр. Гъэсэныгъэм зыкъемыгъэ­Iэтэу ар зэшIопхын плъэкIыщтэп. Гъэхъа­гъэ хэлъэу Адыгеим лъэпкъ проектэу «Гъэсэныгъэр» щыпхыращы. Джырэ шапхъэхэм адиштэрэ инфраструктурэр, еджэпIакIэхэр республикэм щагъэпсых. Лъэпкъ проектымрэ къэралыгъо программэу «Гъэсэныгъэм зыкъегъэIэтыгъэ­ныр» зыфиIорэмрэ адиштэу гъэсэныгъэ языгъэгъотырэ организации 8-мэ чIыпIэ мини 7-м ехъу ащызэхащэн ягухэлъ. 2022-рэ илъэсым къыщегъэжьагъэу ­2025-рэ илъэсым нэс унэ 30-мэ гъэцэкIэжьын IофшIэнхэр арашIылIэнэу рахъухьэ», — къыIуагъ Дмитрий Чернышенкэм.
КъумпIыл Мурат социальнэ инфраструктурэр зэрагъэкIэжьырэм къытегущыIагъ. Гъэсэныгъэ зыщарагъэгъотырэ, спорт псэуалъэхэр, культурэмкIэ учреждениехэр республикэм зэрэщашIыхэрэр ыкIи зэрэщагъэцэкIэжьхэрэр, кIэлэцIыкIу сэнаущхэм IэпыIэгъу зэращыфэхъухэрэр къыIотагъ. «Точка роста» зыфиIорэ гупчэхэм, «Кванториумхэм», «IТ-кубхэм» афэдэхэу 100-м ехъу республикэм къыщызэIуахыгъ. ШIэныгъэм, литературэм, искусствэм алъэныкъокIэ илъэс къэс АР-м и Къэралыгъо шIухьафтынхэр аратых.
Республикэм ищыкIэгъэ IофышIэхэм ягъэхьазырын мэхьанэ икъу Адыгеим щыраты. Программэу «Профессионалитет» зыфиIорэр чанэу пхыращы: гурыт сэнэхьат гъэсэныгъэ языгъэгъотырэ кластери 2 зэхащагъ. Предприятие ­25-рэ студент мини 10 фэдизрэ мы программэм къыхэлажьэ. Дзэ сэнэхьатхэр аIэ къызщырагъэхьащт гупчэрэ медицинэ кластерэу «ПрофиМед» зыфиIорэмрэ мы мазэм Мыекъопэ къэралыгъо технологическэ университетым къыщызэIуа­хыгъэх. Спортым ылъэныкъокIи Адыгеим гъэхъагъэхэр зэришIыгъэхэр Дмитрий Чернышенкэм къыхигъэщыгъ. ГущыIэм пае, физическэ культурэмрэ спортымрэ апылъхэр нахьыбэ хъугъэ. Федеральнэ проектэу «Спортыр – щыIэныгъэ шапхъ» зыфиIорэмрэ проектэу «Бизнес-спринт» зыцIэмрэ адиштэу псэолъакIэхэр зэрашIыхэрэм мыщкIэ ишIуагъэ къэкIо.
ХэушъхьафыкIыгъэ дзэ операцием хэлажьэхэрэм, Херсон хэкумкIэ Геническэ районым IэпыIэгъу ягъэгъотыгъэ­ныр анахьэу анаIэ зытырагъэтырэ лъэ­ныкъохэм ащыщ.
ЗекIоным зегъэушъомбгъугъэным, республикэр лъэпкъ проектэу «ЗекIонымрэ хьакIэпэгъокIынымрэ» зыфиIорэм зэрэхэлажьэрэм япхыгъэ Iофыгъохэми шъхьафэу зэIукIэгъум щахэплъагъэх. АР-м и ЛIышъхьэ модульнэ хьакIэщхэм яшIынкIэ, проектэу «Лэгъонакъэм» диштэу инфраструктурэр гъэпсыгъэнымкIэ, нэмыкI лъэныкъохэмкIэ Iофэу зэшIуахыгъэхэм къатегущыIагъ. Мыгъэ гъэмафэ зекIо нэбгырэ мин 200 Адыгеим къэкIуагъ. БлэкIыгъэ илъэсым джащ фэдэ илъэхъан егъэпшагъэмэ, процент 20-кIэ ар нахьыб.
«Тэ тишъыпкъэу тапэкIи тызыпылъыщ­тыр цIыфхэм ящыIэкIэ-псэукIэ зыкъегъэ­IэтыгъэнымкIэ Урысые Федерацием и Президент пшъэрылъэу къыгъэуцугъэхэр гъэцэкIэгъэнхэр ары. Федеральнэ гупчэм игукъэкIхэм тарыгъуазэзэ, ренэу тиIоф­шIэн зэхэтэщэ. РеспубликэмкIэ мэхьа­нэшхо зиIэ пшъэрылъхэм язэшIохынкIэ IэпыIэгъу къызэрэтфэхъугъэм фэшI УФ-м и Правительствэ и Тхьаматэ игуадзэу Дмитрий Чернышенкэм лъэшэу тыфэраз. Типшъэрылъ шъхьаIэхэм ащыщ зекIонымкIэ Адыгеим амалэу иIэхэм ахэгъэ­хъогъэныр. Проект шъхьаIэу Iоф зыдатшIэрэр зыгъэпсэфыпIэу ­«Лэгъона­къэм» игъэпсын епхыгъэр ары. Дмитрий Чернышенкэр ышъхьэкIэ а псэолъэшIыпIэм щыIагъ, Iофхэр зэрэкIорэм зыщигъэгъозагъ. Лъэпкъ проектэу «ЗекIонымрэ хьакIэпэгъокIынымрэ» зыфиIорэм диштэу ищыкIэгъэ инфраструктурэр тэгъэпсы. Лъэпкъ парк ДжэгокIо гъэхъу­нэм щышIыгъэным епхыгъэ проектми Iоф дэтэшIэ. Адыгэ къуаем ифестиваль мыщ тапэкIэ щызэхэтщэн тимурад. Мыгъэ нэбгырэ мин 50 фэдиз ащ къекIо­лIагъ. УФ-м и Правительствэ иIэпыIэгъу ишIуагъэкIэ нэмыкI лъэныкъохэу Дмитрий Николай ыкъор зыфэ­гъэзагъэхэми шIукIаеу ыпэкIэ тащылъы­кIотагъ», — къыIуагъ КъумпIыл Мурат зэIукIэм икIэуххэр къызэфихьысыжьхэзэ.
АР-м и ЛIышъхьэ зэрэхигъэунэфыкIыгъэмкIэ, республикэм ихэбзэ къулыкъухэм лъэпкъ проектхэмрэ къэралыгъо программэхэмрэ амалэу къатыхэрэр къызфагъэфедэхэзэ, Адыгеим хэхъоныгъэ егъэшIыгъэным тегъэпсыхьэгъэ амалхэр тапэкIи зэрахьащтых.
«УФ-м и Правительствэ пшъэрылъэу къытфишIыхэрэр зэкIэ дгъэцэкIэщтых, федеральнэ гупчэм амалэу къытитыхэрэр икъоу къызфэдгъэфедэщтых», — къы­Iуагъ республикэм и ЛIышъхьэ.
ЗэIукIэгъум икIэухым Дмитрий Чернышенкэм АР-м и ЛIышъхьэ пшъэрылъ заулэ къыфишIыгъ. Ахэм ащыщ еджэпIакIэхэу Адыгэ Республикэм щагъэ­псыхэрэм гъунэ алъыфыгъэныр.
АР-м и ЛIышъхьэ ипресс-къулыкъу къытыгъэ къэбархэмкIэ
ЛIышэ Саныет.