Москва икорпорациеу «Туризм. РФ» зыфиIорэм тыгъуасэ щыкIогъэ зэIукIэм зыгъэпсэфыпIэу «Лэгъонакъэ» Адыгеим щыгъэпсыгъэным телъытэгъэ инвестиционнэ проектым Iоф зэрэдашIэрэм щыхэплъагъэх.

Iофтхьабзэм хэлэжьагъэх Адыгэ Рес­публикэм и ЛIышъхьэу КъумпIыл Мурат, АР-м иминистрэхэм я Кабинет и Тхьаматэу КIэрэщэ Анзаур, корпорациеу «Туризм. РФ» игенеральнэ пащэу Сергей Сухановыр, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Мантера-Групп» игенеральнэ пащэу Вадим Трукшиныр, инвесторхэр, подрядчикхэр.
Лъэпкъ проектэу «ЗекIонымрэ хьакIэпэгъокIынымрэ» зыфиIорэм чанэу зэрэхэлажьэрэм ишIуагъэкIэ Адыгеим зекIонымкIэ гъэхъагъэхэр зэришIыгъэхэр зэIукIэм щыхагъэунэфыкIыгъ. Модульнэ хьакIэщхэр Адыгеим къитэджагъэх, инфраструктурэм зеушъомбгъу, зекIонымкIэ фэIо-фашIэхэр нахь дэгъоу фагъэцакIэхэ хъугъэ. Зызыгъэпсэфынэу Адыгеим къакIохэрэм къазэрахэхъуа­гъэм ишIуагъэкIэ лъэныкъо зэфэшъхьафхэмкIэ зекIоным епхыгъэ фэIо-фашIэхэр нахьыбэу агъэцакIэхэ хъугъэ. Анахь зыгъэпсэфыпIэ дэгъухэу хэгъэгум къыщыхахырэ шъолъыри 5-мэ ясатырэ республикэр хэуцуагъ. БлэкIыгъэ илъэсым егъэпшагъэмэ, процент 20-кIэ нахьыбэу зекIохэр мыгъэ гъэмафэ Адыгеим къэкIуагъэх. Нэбгырэ мин 200-мэ республикэр зэрагъэлъэгъугъ. ЗыгъэпсэфыпIэу «Лэгъонакъэр» загъэпсыкIэ, зекIохэм япчъагъэ джыри къыхэхъощт.
«Мы гъэмафэр Адыгеим гъэшIэгъонэу зэрэщыкIуагъэр, зекIохэм япчъагъэ нахьыбэ зэрэхъугъэр къыдэплъытэхэмэ, зекIонымкIэ республикэм амалыкIэхэр иIэ зэрэхъугъэм гу лъыотэ. Мэхьанэшхо зиIэ лъэныкъохэм ащыщ зекIонымкIэ инфраструктурэм тапэкIэ зегъэушъомбгъугъэныр. Къушъхьэ зыгъэпсэфыпIэу «Лэгъонакъэ» республикэм илъэгъупхъэ чIыпIэу, ианахь цIыф кIуапIэу хъущт. ЗатIупщыкIэ, илъэсым къыкIоцI зекIо нэбгырэ мин 500-м нэс мыщ щырагъэ­блэгъэн алъэкIыщт», — къыIуагъ Сергей Сухановым.
Адыгеим и ЛIышъхьэ зэрэхигъэунэфыкIыгъэмкIэ, проектым иапэрэ чэзыу джыдэдэм Iоф дашIэ. АщкIэ ищыкIэгъэ инфраструктурэр республикэм щагъэпсы. КъумпIыл Мурат агу къызэригъэкIыжьыгъэмкIэ, инвестиционнэ проектыр пхыращы зыхъукIэ, тыкъэзыуцухьэрэ дунаим изытет зэщымыгъэкъогъэным лъэшэу гъунэ лъафыщт.
«Мы аужырэ илъэсхэм федеральнэ IэпыIэгъоу къытIукIэрэм ишIуагъэкIэ зыгъэпсэфыпIэу «Лэгъонакъэ» иинфраструктурэ игъэпсынкIэ пшъэрылъхэр гъэхъагъэ хэлъэу зэшIотэхых. Корпорациеу «Туризм. РФ» зыфиIорэми, инвесторхэми акIуачIэ рахьылIэзэ джырэ шапхъэхэм адиштэрэ комплексыр гъэ­псыгъэ хъущт», — къыIуагъ АР-м и ЛIышъхьэу КъумпIыл Мурат.
2024-рэ илъэсым электрическэ, газ сетьхэм апышIэгъэнхэмкIэ, псыр аIэкIэзыгъэхьэрэ ыкIи Iузыщырэ псэуалъэхэм яшIынкIэ Iофтхьабзэхэр зэрахьэх. Проектым къыдыхэлъытэгъэ псэолъэшIын-монтаж IофшIэнхэр зэхэщэгъэнхэм пае апэрэ чэзыум телъытэгъэ Iофхэр аухыгъэх.