УФ-м и Социальнэ фонд и Къутамэу АР-м щыIэм 2024-рэ илъэсыр къызихьагъэм къыщыублагъэу родовой сертификатым къызэрэдилъытэу, пстэумкIи сомэ миллион 21,7-рэ ытыгъ. Нэбгырэ мини 6-м ехъу ар зыфэкIуагъэр.

Мы сертификатым бзылъфыгъэу сабый ежэрэм зыщылъыплъэщтхэ учреждениер, кIэлэцIыкIур къызщыхъущтыр, ащ ­ыныбжь илъэс мэхъуфэкIэ медицинэ уплъэкIунхэр зыщикIущтхэ IэзапIэр ежь-ежьырэу къыхихын амал къыреты. Ар электроннэ шIыкIэм тетэу гъэпсыгъэ.
— Бзылъфыгъэу урысые гражданствэ зиIэм е IэкIыб къэрал къикIыгъэу тихэгъэгу щыпсэунэу фитыныгъэ зэратыгъэм мы тхылъыр къытефэ. Мы сертификатымкIэ шIокI зимыIэ медицинэ страхованием къыхиубытэу псауныгъэм икъэ­ухъумэн фэгъэзэгъэ организациехэм фэIо-фашIэу агъэцакIэхэрэм апкIэ птын плъэкIыщт. Бзылъфыгъэу сабый ежэрэм ыпкIэ хэлъэу Iоф зышIэрэ учреждением зыфигъэзагъэмэ, сертификатыр ыгъэфедэн ылъэкIыщтэп. Ащ имызакъоу, тхылъым къыдилъытэрэ ахъщэр къаIып­хын плъэкIынэу щытэп, — къыIуагъ УФ-м и Социальнэ фонд и Къутамэу АР-м щыIэм ипащэу МэщлIэкъо Хьамидэ.
Сертификатыр псауныгъэм икъэухъу­мэн фэгъэзэгъэ учреждениехэр ары зыгъэхьазырырэр. Къэралыгъо фэIо-фашIэхэм япортал ар къырагъахьэ. Ащ талонищ хэхьэ. АхэмкIэ бзылъфыгъэу сабый ежэрэм изытет зыщылъыплъэ­хэрэм, кIэлэцIыкIур къызщыхъугъэм, IэзапIэу зэпхыгъэм яфэIо-фашIэхэм атефэрэр птынэу щыт.
Мы лъэныкъомкIэ упчIэ зиIэр УФ-м и Социальнэ фонд и Къутамэу АР-м щыIэм испециалистхэм къафытеон ылъэ­кIыщт. Телефонхэр: 8(800)200-01-48. Блыпэ – мэфэку мафэхэм сыхьатыр 9-м къыщыублагъэу пчыхьэм сыхьатыр 6-м нэс, бэрэскэшхом 9-м къыщыублагъэу 5-м нэс Iоф ашIэ.
Джащ фэдэу социальнэ хъытыум тит: https://vk.com/sfr.respublikaadigeya, https://ok.ru/group/7000000I89II68, https://t.me/osfrrespublikaadigeya.
УФ-м и Социальнэ фонд и Къутамэу АР-м щыIэм ипресс-къулыкъу.