АР-м и ЛIышъхьэу КъумпIыл Мурат пшъэрылъ къызэрэфишIыгъэу, шъолъыр Парламентым и Тхьаматэу Владимир Нарожнэм гъэстыныпхъэ шхъуантIэр цIыфхэм аIэкIэгъэхьэгъэным фэгъэзэгъэ штабым изэхэсыгъо зэрищагъ.

Iофтхьабзэм хэлэжьагъэх АР-м иминистрэхэм я Кабинет ипащэ игуадзэу ЛIыхэсэ Махьмудэ, экономикэ хэхъоныгъэхэмкIэ ыкIи сатыумкIэ министру Шэуджэн Заур, акционер обществэу «Газпром газораспределение Майкоп» ипащэу ЕкъутэкI Аслъан. Видеоконференцие шIыкIэм тетэу зэхэсыгъом къы­хэлэжьагъэх муниципальнэ образованиехэм япащэхэри.
УФ-м и Президентэу Владимир Путиныр кIэщакIо зыфэхъугъэ программэу «социальнэ догазификацием» фэгъэхьыгъэм къыдыхэлъытэгъэ IофшIэнхэр зэ­рэлъыкIуатэхэрэр ары анахьэу зигугъу ашIыгъэр. Чъыгхэтэ товариществэхэм ащыпсэухэрэм гъэстыныпхъэ шхъуантIэр аIэкIэгъэхьэгъэным епхыгъэ Iофхэр нахьыбэу къыхагъэщыгъэх.
Планым зэрэщыгъэнэфагъэмкIэ, товариществэ 23-мэ ящагу 2134-мэ газыр аращэлIэн фае. Ахэм ащыщэу 2041-р Мыекъуапэ хэхьэх, 67-р — Тэхъутэмыкъое, 25-р — Теуцожь районхэм арытых. «Догазификацием» къыдыхэлъытагъэу ищагу фыращэлIэнэу лъэIу тхылъ къэзытыгъэр унэгъо 92-рэ мэхъу, 26-мэ зэзэгъыныгъэм адыкIэтхагъэх, чIыгу Iахь 13-мэ ягъунапкъэхэм аращэлIэгъах. Республикэм ит псэупIэхэм ягъунапкъэ­хэм апэблагъэу гъэпсыгъэ товариществэхэр зэкIэмкIи 43-рэ мэхъу.
— «Социальнэ догазификацием» фэгъэхьыгъэ программэр Адыгеим зэрэщылъыкIуатэрэм респуб­ликэм ипащэ лъэшэу ынаIэ тет. Джащ фэдэу Iофхэр зэрэзэ­шIуахыхэрэм парламентариехэр лъэп­лъэх. ТапэкIи а IофшIэныр лъыдгъэкIотэщт, — къыIуагъ Владимир Нарожнэм.
Сурэтыр: АР-м и Къэралыгъо Совет — Хасэр.