Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытагъэу 2019-рэ илъэсым къыщегъэжьагъэу 2023-рэ илъэсым нэс километрэ 450-рэ хъурэ псэолъэ 300-м ехъу шапхъэхэм адиштэу Адыгеим щызэтырагъэпсыхьагъ ыкIи щатыгъ.

Автомобиль гъогухэмкIэ ГъэIорышIапIэу «Адыгеяавтодорым» къызэритыгъэм­кIэ, мы илъэсым телъытэгъэ гъогушIын IофшIэнхэр аухыгъэх, 2025-рэ илъэсым агъэцэкIэн фаеу щытыгъэ IофшIэнхэм афежьагъэх. 2024-рэ илъэсым гъогушIхэм километрэ 48-рэ зикIыхьэгъэ автомобль гъогухэм яIахь 18-у республикэ мэхьанэ зиIэхэр агъэцэкIэжьыгъэх.
«Лъэпкъ проектым игъэцэкIэн­кIэ Адыгеим дисциплинэ дэгъу зэрэхэлъыр къыгъэлъэгъуагъ. Джары лъэпкъ проектымкIэ гъэхъагъэхэм якъэкIуапIэр», — къыIуагъ Росавтодорым ипащэу Роман Новиковым лъэпкъ проектым игъэцэкIэнкIэ Адыгеим гъэхъагъэу иIэхэм къатегущыIэзэ.
2025-рэ илъэсымкIэ Адыгеим гухэлъышхохэр иIэх. Километрэ 50 фэдиз хъурэ автомобиль гъогухэу республикэ мэхьанэ зиIэхэм яIахь 19-р шапхъэхэм адиштэу зэтырагъэпсыхьащтых. Урысыем транспортымкIэ и Министерствэрэ гъогушIынымкIэ Федеральнэ агентствэмрэ игъусэхэу мэхьанэшхо зиIэ проект заулэ Адыгеим ыгъэцэкIагъ. Ащ хэхьэ къушъхьэлъэ чIыпIэхэм гъогухэр зэращашIыхэрэр. ЗекIоным зызэриушъом­бгъурэм, автомобильхэу гъогухэм атетхэр нахьыбэ зэрэхъурэм япхыгъэу рес­публикэм игъоу ылъэгъугъэ проектхэр къыдалъытэхэзэ, гъогушIыным нахь зырагъэушъомбгъунэу рахъухьэ. Ахэм зэу ащыщ Краснодар екIурэ автомобиль гъогур нахь шъуамбгъо шIыгъэныр, къа­лэу Мыекъуапэ къэзыухьэрэ гъогум игъэпсын ухыгъэныр.

«ГъогушIынымкIэ Адыгеим гъэхъэ­гъэшхохэр иIэх. Респуб­ликэ гъогухэм япроцент 66,5-р шапхъэхэм адиштэу зэтыра­гъэпсыхьагъэх. Адыгеим зекIонымкIэ амалышхохэр IэкIэлъых. Мы лъэныкъомкIэ ящыкIэгъэ инфраструктурэм игъэпсын тапэкIи тыдэлэжьэщт. Iофхэр зэрэкIорэм тылъыплъэщт», —къыIуагъ Урысые Федерацием ивице-премьерэу Марат Хуснуллиным.
ГъогушIыным епхыгъэ лъэпкъ проектыр зэрагъэцакIэрэм ишIуагъэкIэ Адыгеим гъогухэмкIэ иинфраструктурэ илъэс къэс нахьышIу мэхъу зэпыт, гъогу­хэм ящынэгъончъагъэ къыхэхъо. Джащ фэдэу хэгъэунэфыкIыгъэн фае автомобиль гъогухэу шапхъэхэм ади­штэу зэтырагъэпсыхьагъэхэр нахьыбэ зэрэхъу­гъэм къыхэкIэу гъогухэм атехъу­хьэрэ тхьамыкIагъохэм нахь къазэракIичыгъэр.