Федеральнэ гъэсэныгъэ программэу «Мама-предприниматель» зыфиIорэм изэфэхьысыжьхэр мы мафэхэм къэнэфагъэх. Бзылъфыгъэ бизнесым зегъэушъомбгъугъэным ар фэIорышIэ.

Зэнэкъокъум Къохъужъ Саидэ ипроектэу «Школа современной черкешенки» зыцIэм текIоныгъэ къыщыдихыгъ. ШIушIэ фондым ыгъэнэфэгъэ грантэу сомэ мини 100 хъурэр ащ къыфагъэшъошагъ. Бизнес-проектыр щыIэныгъэм щыпхырищыным мылъкур ащ пэIуигъэхьащт.
ТекIоныгъэ къыдэзыхыгъэ Саидэ гущыIэгъу тыфэхъугъ.
— Саида, уипроект сыда зыфэгъэхьыгъэр?
— Адыгагъэм, унагъом илъ шэн-хабзэхэм, культурэм афэгъэхьыгъэ Iоф­тхьабзэхэм язэхэщэн илъэсым къыкIоцI жъугъэу зэхэсщэным проектыр фэлэ­жьэщт.
— Хэта ащ хэлэжьэн зылъэ­кIыщтыр?
— Пшъэшъэ ныбжьыкIэхэр егъэджэнхэм ахэлэжьэнхэ алъэкIыщт. Бзэр, лъэпкъ шэн-хабзэхэр, намысыр къэ­ухъу­мэ­гъэнхэр, нахь куоу зэрагъэшIэным кIэгъэгушIугъэнхэр симурад шъхьаI.
— Зэнэкъокъоу узыхэлэжьагъэр сыдэущтэу рекIокIыгъа?
— Адыгеим щыщ бзылъфыгъэ 50-м ехъу зэнэкъокъум къекIолIэгъагъ. Ахэм ащыщэу анахь дэгъоу къыхахыгъэ 12-р ары ащ хэлэжьагъэхэр. Мэфитфым бизнесым епхыгъэу бзылъфыгъэхэм яшIэныгъэхэм ахагъэхъуагъ, хэушъхьафыкIыгъэ егъэджэнхэр тфызэхащагъэх, бизнес-планыр зэрэзэхэдгъэуцощтым тыфырагъэджагъ. Аужырэ мафэм бизнесым ылъэныкъокIэ гухэлъэу яIэхэм осэшIхэр хэплъагъэх. СиIофтхьабзэу «Непэрэ адыгэ пшъашъэм иеджапIэ» уасэ къыфашIыгъ.

— Iофтхьабзэу зэхэпщагъэхэм ыкIи уапэкIэ зэхэпщэщтхэм ягугъу къытфэшIба.
— Сэ АР-м ибзылъфыгъэхэм я Союз сыхэт. СиеджэпIэ сервис, АР-м ибзылъфыгъэхэм я Союз ыкIи АР-м иIэпэIасэхэм, лъэпкъ IэпэщысэшIыным пылъхэм я Ассоциацие тызэгъусэхэу ыпкIэ зыхэмылъ Iофтхьабзэхэу «Адыгэ тхыпхъэхэр лъэхъаным диштэу сыдэущтэу бгъэфедэщтха?», «Дышъэидэным идесэхэр» зыфиIохэрэр редгъэкIокIыгъэх. «Нахьы­жъым­рэ нахьыкIэмрэ язэфыщытыкI» зыцIэ десэхэр филологие шIэныгъэхэмкIэ докторэу, профессорэу Унэрэкъо Рае сигъусэу зэхэтщагъ.
Адыгэ лъэпкъым икультурэ, ишэн-хабзэхэм, ыбзэ язэгъэшIэн лъэныкъорыгъазэу щымытэу, лъэныкъо пстэури зэфэщэгъэнхэр пшъэрылъ шъхьаIэу зыфэзгъэуцужьыгъ.
— Зэнэкъокъум ыуж зэхэщакIо­хэм яIоф аухыгъа?
— ЗэхэщакIохэм къызэрэтаIуагъэмкIэ, зэнэкъокъу ужым программэм изэхэгъэу­цонкIэ, лицензием игъэпсынкIэ ыкIи нэмыкI IофхэмкIэ яIэпыIэгъу къытагъэ­кIыщт.
Федеральнэ программэу «Мама-предприниматель» зыфиIорэм хэлэжьагъэ­хэм зэнэкъокъу ужым Iоф адашIэныр зэпыурэп. ТапэкIэ Адыгеим ибзылъфыгъэ предпринимательхэм «Мой бизнес» зыфиIорэ Гупчэм иIэпыIэгъу къызфагъэфедэн, джащ фэдэу программэм ифедеральнэ едзыгъо хэлэжьэнхэ алъэ­кIыщт. Зигугъу къэтшIыгъэ федеральнэ программэр зытегъэпсыхьагъэр бзылъфыгъэ предпринимательхэм IэпыIэгъу ягъэгъотыгъэныр ары. Программэр зэрагъэцакIэрэм лъэплъэ УФ-м экономикэ хэхъоныгъэмкIэ иминистрэ игуа­дзэу Татьяна Илюшниковар. Урысыем и Президентэу В.Путиныр зикIэщэкIо лъэпкъ проектэу «Предпринимательствэ цIыкIумрэ гурытымрэ» диштэу программэр пхыращы.
Лъэпшъыкъо Фатим.